RUUTI 2 - Qullaawa Maxaafa

RUUTI BOEEZI FISHSHIRA DUUGGE XINQIDHU

¹ Naoomi muttaarisera fiixa ikkinoha egennaminoha dureessa mancho Boeezi yinanniha afidhu.

² Mitto barra Moaabitte Ruuti Naoomi, «Mindanna giggilanno duugge xinqi'rate gide gamba assinanniwa ha'roni? Xinqi'rate fajjannoehu dihoogannona» yitu. Naoomino, «Maahoyye beetto'ya ha'ri!» yituse.

³ Ruutino gide mindanniwa hadhu. Middannori hoode hadhanni angansanni giggilino duugge xinqidhu. Xinqidhinohuno Elimeleekira gamba yiino fiixi Boeezi fishshi giddonni ikkinota affu.

⁴ Shiima yanna gedensaanni Boeezi umisi Beetelihemetenni kae gatisira dayi. Middanni nooreno, «Keerunni hossini! Maganu maassi'ro'ne!» yiinsa. Insano, «Maganu ateno maassi'rohe!» yitusi.

⁵ Hakkunni gedensaanni Boeezi gide middannore hajajannoha woshshe, «Hatti aja beetto ayete?» yee xa'mi.

⁶ Manchuno, «Ise Naoomi ledo Moaabi gobbanni daggino wosinchooti.

⁷ Middannori hoode hadhanni nadallate mereerinni duugge xinqidhara xa'mitinoe. Soodinni xaa geeshsha xinqidhanni nooti foole qo'litaralla kawa daasunniwa shiqqi yitino» yii.

⁸ Boeezino Ruuti, «Tee beetto, amaaleemmohere macciishshi; soqqamannoe seenni hoode hadhanni xinqi'rattata ikkinnina agurte wole fishsha hadhooti.

⁹ Mannootu middannowa la'anni seennu ledo keeshshi; mannootu kissannohekki gede kuloommonsa. Waa goo'rittaro marte wodhitino gambayichi giddonni xorshidhe agi» yiise.

¹⁰ Ruutino Boeezi albaanni gombisante, «Hanni anera mayira qarramitto? Ani dimanni mannaati; kageeshshi elle assate mayira mitii'mittoe?» yitusi.

¹¹ Boeezino, «Ayiddaannikki reyinkunni ballokkira assoottasere baala macciishshoommo; annakkinna amakki, ilamoottata gobbakkino agurte dayottatanna affe egennoottakki manni ledo hee'rattara dayottata afoommo.

¹² Assootta coyi baalunkura Kaaliiqi maassi'rohe; qoolisi giddo amadahera dayottahu Israeelete Magani Kaaliiqi ba'raa'ra oohe» yiise.

¹³ Ruutino, «Mooticha'ya, ati anera lowore assoottoe. Soqqamaanokkinni mittichote gede assite kiirattoera nafa ikkoommakkita shaqqillu hasaawikkinni hagiirsiisoottoe» yitusi.

¹⁴ Barra hurbaatu yannara Boeezi Ruuti, «Amo sagalenniwa shiqqi yii; timano qaamattotenni qaante iti» yiise. Iseno loosino manni ledo ofoltu. Boeezino xoxxiissinoonni gide uyise. Sagaleno itte duubbe gatisidhu.

¹⁵ Ledde xinqidhara ka'uta, Boeezi loossannosire, «Nadallate mereerono xinqidhona hooltinoontese.

¹⁶ Nadallate giddonnino luqqissine tuggineenna xinqidhona uffinoontese» yiinsa.

¹⁷ Ruutino hawarra geeshsha duugge xinqidhanni hossu. Xinqidhino gidino cuukkidheenna mitto gimboola ikkise.

¹⁸ Gide bayidhe qaera hadhu. Gamba assidhino gide ballosera leellishshu. Ittanna gattino sagaleno uyituse.

¹⁹ Balloseno, «Konne duucha maminni gudhitta? Aye gatinni xinqi'ritta? Togo elihe mancho Maganu maassi'rosi!» yitu. Ruutino, «Xinqi'roommahu Boeezi yinanni manchi gatinniiti» yite kultuse.

²⁰ Naoomino, «Nooriranna reyitinorira uyino hexxo wonshanno Magani iso maassi'rosi!» yitu. Qolteno, «Isi ninkera gamba yiino fiixaati; raggeteno aaninonkeho» yite kultuse.

²¹ Hakkunni gedensaanni Ruuti, «Duuchunkunni roore dhagge ikkinoehu, ‹Gudda geeshsha gide middannoriwiinni baxxittakkinni xinqi'ri› yiinoe coyeti» yituse.

²² Naoomino beettise beettora Ruutira, «Halaaleho beetto'ya, Boeezi gate noo meenti ledo xinqi'rittaro woyyannohe; wolu gatira ha'rittaro qarrissannohe» yituse.

²³ Kunni daafira hayixenna qamade gamba assine ka'na geeshsha hakkunni seenni ledo heedhe xinqidhanni ballosewiinnino baxxitukkinni keeshshitu.