RUUTI 1 - Qullaawa Maxaafa

ELIMELEEKINNA MAATESI FULTE MOAABI GOBBA BA'U

^1-2 Israeelete gobbara mootoolla mookkara albaanni gobbate aana hude ubbino. Kunninni kainohunni ilama Efiraatichu Yihudu gobbara Beetelihemete Katamira hee'rannohu Elimeleeki yinanni manchi galtesi Naoominna 2 labballi oososi Mahilooninna Kelewooni yinannire anga adhe hude sa'a geeshsha yee Moaabi gobba fule bai. Hakko heedheenna,

³ Elimeleeki reyi. Naoomino lamente oosose ledo calla gattu.

⁴ Oososeno Orfanna Ruuti yinannire Moaabi gobba seenne adhitino. Tonnu diri gedensaanni,

⁵ Mahilooninna Kelewoonino reyitu. Naoomi ayiddaannasenna oosose hoogge callichose gattu.

NAOOMI RUUTI LEDO BEETELIHEME HIGGU

⁶ Naoomi Moaabi gobbara heedhe Kaaliiqi Israeelete manna towatinotanna lowo jajja uyinonsata macciishshitu. Kunnira, lamente oosose seenni ledo Moaabi agurte Israeelete gobba hadhara ka'u.

⁷ Iseno lamente oosose seenni ledo heedhanno gobba agurte Yihudu gobba hadhanni heedheenna,

⁸ Naoomi oosose seenne, «Xaate ilantinoonni qae higgine ayiddi'ne ledo heedhe. Aneranna reyiturira assitininte gede Kaaliiqi ki'nera danchare asso'ne.

⁹ Lamenti galagaltine mine assidhine galte afidhinanni gede Kaaliiqi kaa'lo'ne» yitunsa. Hakkunni gedensaanni, Naoomi keerunni yitansara sunqitunsa. Insa kayinni qaalensa naggi asse wi'lanni,

¹⁰ «Dee'ni! Ninke ate ledo gosakkiwa ha'neemmota ikkinnina atewiinni badamme diganteemmo» yiise.

¹¹ Naoomino, «Seenne'ya ballo higge! Ane ledo hadhinara mayira hasidhinanni? Ki'nera galte ikkitanno ooso galagale ilammara dandeemmaha lawanno'neni?

¹² Seenne'ya, qae qae'ne higge! Ane mine assi'rate diri'ya diuyinoe; adhamate hexxo heedhoomme"eronna techonni mine assi're ooso ilummaro nafa,

¹³ insa iillita geeshsha agadha dandiitinannini? Kunninni kainohunni mine assidhinikkinni gattinaraatini? Seenne'ya ballo, kuni horontanni dandaamannokki coye ikkinota affinoonni. Anera Kaaliiqi alba shawwu yiinoe; ki'ne aana ikkino coyirano lowo geeshsha dadilloomma» yitunsa.

¹⁴ Insano galagale wi'li. Tenne giddo Orfa ballose sunqite keerunni yite ayiddisera higgu. Ruuti kayinni ballosewiinni baxxitannokki gede murcidhu.

¹⁵ Kunnira Naoomi, «Ruuti'ya ballo, mateekki fiixisewanna magannasewa higgino; atino ise ledo higittaro woyyanno» yituse.

¹⁶ Ruutino, «Atewiinni baxxe higeemma gede qarrissootie; ledokki ha'reemmana agurie. Ati ha'rattawa baala ha'reemma; ati hee'rattawa hee'reemma. Xaanni kayise mannikki manna'yaati; Maganikkino Magano'yaati.

¹⁷ Ati reyattawa reemma; ati madaaramattawa madaarameemma. Reyo agurranna atewiinni badannoeri dino; atewiinni baxxummaro Kaaliiqi afoe!» yitu.

¹⁸ Ruuti ledose hadhara murcidhinota affuhu gedensaanni, Naoomi wole coye dicoyidhino.

¹⁹ Kunnira, lamenti mitteenni Beeteliheme ha'ri. Beeteliheme iilli woyite katamu manni baalunku maala'li. Hakkiicho noo meentino dhaggeeffatanni, «Halaalinta tini Naoomiinti?» yii.

²⁰ Iseno, «Wo'manka Dandaanno Magani heeshsho'ya qaraartannota assinona, Maara yiiyye"e ikkinnina, Naoomi yitine woshshitinoonte"e yitunsa.

²¹ Tenne gobbanni ha'rumma waro lowori nooe. Xa kayinni Kaaliiqi mulla anganni qolinoe; Wo'manka Dandaannohu Kaaliiqi shollishe, tenne baala shetto iillishe hee'reennae, Naoomi yitine mayira woshshitinannie?» yitu.

²² Naoomi Moaabitte beettise beetto Ruuti ledo Moaabi gobbanni higginohu kunni garinniiti. Insa Beeteliheme iillinohu hayixe gamba assinanni wogga umiraati.