ROSIISAANCHO 2 - Qullaawa Maxaafa

TENNE KALQE HAGIIRRI HAAFAHO

¹ Ani wodani'yanni, «Hagiirru maatiro afate anenee hagiirsiiseemmo!» yee hedoommo. Ikkollana kunino haafaho.

² Osolu gowwimma ikkinota, hagiirruno mullare ikkinota huwatoommo.

³ Surre'ya amadante heedheennanni umo'ya agattotenni hagiirsiise egenno afi'rate kaoommo. Mannu kalqete aana hee'ranno yanna tenne haranchote giddo woyyanno coye maricho loosa hasiissannosiro afate hasi'roommo.

⁴ Qoleno jajjabbare assoommo; minna mi'noommo; woyineno kaasi'roommo.

⁵ Caalu haqqe kaasi'roommo. Tenne haqqe giddono addi addi laalo uyitanno haqqe no.

⁶ Lophitanno haqqe dubbo asse kaasoommo. Tenne haqqera hayikkinsanni wayi eelanno kofammano umoommo.

⁷ Labbaahanna meya faantoota hidhoommo. Mine ilantinori wolootu faantootino nooe. Anera albaanni Yerusaalamete heedhinorinni roore lowo lalo, ge'reewonna me"e ceoommo.

⁸ Gashshoommo gobba baalantenni mootimma'ya minira lowo culkanna lowo birra gamba assi're duu'noommo. Guwisannoe labballinna meentino nooe. Hagiirsiisannohu woluno lowo meenti nooe.

⁹ Anera albaanni Yerusaalamete heedhinorinni roore lowo geeshsha ayirrado ikkoommo. Egenno'yano ledo'ya keeshshitino.

¹⁰ Ille'ya la'inore baala agure disaoommo; wodani'ya halchinore mittoreno assa diaguroommo. Wodani'ya loosi'ya baalunni hagiidhino. Kunino daafuri'ya waagaati.

¹¹ Hakkunni gedensaanni, loosoommo loosonna daafuroommo daafuro baala laoommo. Kuni baalunku haafaho; diilallo cu'mate gedeeti. Kalqete aana lexxinanniri mitturino dino.

¹² Mittu moote, albi mootoolla assitinorella assanno. Kunnira egenno, macharaarrenna gowwimma maatiro bade afate hasi'roommo.

¹³ «Xawaabbu tunsichunni, egenno gowwimmatenni woyyitannota afoommo.

¹⁴ Egennaammu hadhanni noowa affino; gowwootu kayinni diaffanno» yinanni. Ikkollana lamunku reyitannoreeti.

¹⁵ Ani wodani'yanni, «Gowwaho iillitanno kaayyo anerano iillitannoe; egennaamo ikka'yanni maa lexxoommo?» yee hedoommo. Kunino haafaho.

¹⁶ Kunni ka'a egennaamono gowwano qaagannosihu dihee'ranno; dagganno yannara baalunku hawamanno. Hada egennaamuno gowwu gede reyannoho!

¹⁷ Kalqete aana noori baalu dadillisannoha ikkinohura heeshshonti giwissinoe. Mannu assannori baalu haafaho. Diilallo cu'mate gedeeti.

DIINAGGAAWA MAA KAA'LITANNO?

¹⁸ Jiro'ya baala ane gedensaanni daannohura agure ha'reemmota ikkitino daafira, kalqete aana daafuroommo daafuri haafaho.

¹⁹ Ane darga amadannohu egennaamohorono gowwahoro bande dianfoonni. Ikkollana ani egenno'yanni daafure gamba assoommohura anna ikkanno. Kunino haafaho.

²⁰ Kunnira heeshsho'ya dirinni daafuroommo daafurira gaabboommo.

²¹ Noohe ogimmanni, egennotenninna hayyotenni daafurte loosoottoha mittoreno daafurinokkihura agurte ha'ratto. Kunino haafaho; garano di"ikkino.

²² Lubbotenni noo geeshsha mannu loosisi daafira yaadanni hee'ra maa kaa'litannosi?

²³ Barra baala loosisi daafira yaadanninna caaccaawanni hee'ranno. Wodanisi hashshano difooliishshi'ranno. Kunino haafaho.

²⁴ Mannaho daafure loosi'rinohunni hagiidhanni itatenna agate ka'aanni woliri kaa'lannosiri dino. Konne uyinohu nafa Magano ikkinota afoommo.

²⁵ Maganu yiikkinni itanninna aganni hagiirre afi'rannohu nooni?

²⁶ Tashshi assannosihura Maganu hayyo, egennonna hagiirre aannosi. Cubbaataamoho kayinni Magano hagiirsiisannohura aanno gede gamba assatenna duunate dilgo calla aannosi. Kunino haafaho; diilallo cu'mate gedeeti.