NEHIMIYA 6 - Qullaawa Maxaafa

NEHIMIYARA GANNOONNITA WOLE GANO

¹ Sanbalaaxi, Xobbiya, Arabichu Geesaaminna wole diinnanke huxxa huxxine gudankenna huxxamikkinni gatinohu fanu dargi nookkita macciishshitu. Ikkollana huxxu waalchuwara cufanna diuurrinsoommo.

² Kunnira, Sanbalaaxinna Geesaami, Oono yinanni xawira mittu qachira xaandeemmo gede sokka sokkinoe. Tinino ane gawajjate gannoonni gano ikkitinota afoommo.

³ Anino, «Loosanni noommoha ayirrado looso agure ki'newa daammora didandeemmo» yee soommonsa.

⁴ Hakkunni gari sokka hoode hoodete 4 higge sokkeennae, anino mittu gari dawaro qoloommonsa.

⁵ Hakkunni gedensaanni Sanbalaaxi soqqamaanosi giddonni mitto ontimeeshsho borrote sokka anga wore anewa soyi. Sonkoonniti fano borrote sokkano,

⁶ «Atinna fiixakki ikkitino Ayihudooti kinchu huxxa huxxitinannihu gibbo kayisate ikkinota, ollaanke ikkino manni hasaawinota Geesaami kulinonke. Kunni aanano ati umokki moohisate hedakinna,

⁷ Yihudu moote ikkakki Yerusaalamete lallabbanno gede himanaano dooroottota Geesaami lede kulinoe. Konne duduwono mootoollate moote macciishshikkinni digatanno. Kunnira, tenne haja atinna ani xaande hasaamboommoro woyyate» yitannote.

⁸ Anino, «Kuni yaatto coyi baalu dihalaaleho; atilla yootto ikkinnina dinooreeti» yee dawaroommosi.

⁹ Kunni garinni looso uurrinseemmo gede assitara waajjishiishshinonke. Kunnira, «Kaaliiqa Magano'ya, eeggatena jawaachishie» yee huucci'roommo.

¹⁰ Hattenne yannara ani Mehexaabieeli beetti beetto ikkinohuwa Delayi beetti Shemaiyawa maroommo. Isino lowo geeshsha waajje maaxame noo daafira, «Hashsha shitahera dagganno daafira atinna ani Maganu mine Qullaawa Darga e'ne waalchuwa cufi'ne maaxammo» yiinoe.

¹¹ Ani kayinni, «Ane gedee manchi xooqe maaxamannoha lawannoheni? Qullaawu Mini giddora e"e lubbo'ya gatisi'rate hasi'reemmoha lawannoheni? Horontanni hatto di"ikkeemmo» yee dawaroommosi.

¹² Konne coye wodani'yanni hede laummo woyite, isi Xobbiyanna Sanbalaaxi woxe uyitinosi daafiralla yaanni nooena, Maganu yiinosire kulanni nooekkita buuxoommo.

¹³ Addintanni konne coye assatenni sao assaranna anerano busha duduwo duduwe waajjishiishanni su'ma'ya hunatenni shollishannoe gede woxe uyitinosi.

¹⁴ Anino, «Magano'ya ballo, Xobbiyanna Sanbalaaxi assitinore baala qaagge, insa qorichishi. Noaadiya yinanniti meya himanaanchonna wolootu kaphu himanaano ane waajjishiishshara assitinore baala habbooti» yee huucci'roommo.

KINCHU HUXXI HUXXAME GOOFI

¹⁵ Huxxu baalunku 52 barri gedensaanni, Eluuli yinanni agani eihunni lemiina ontikki barra goofi.

¹⁶ Gaangaawinkera nooti diinnanke tenne macciishshitu yannara loosu Maganu kaa'lonni goofinota affe saalfattu.

¹⁷ Hatte yannara Ayihudootu albisootinna Xobbiya mimmitoho sokka sokkanni no.

¹⁸ Kuni ikkinohuno Araahi beetti Shakaaniya ballosi ikkinohura, Ayihudete manni giddonni haammatu iso kaa'lino daafiraati. Qoleno Yihohanaani yinannihu beettisi Berakiya beetti Meshulaami beetto adhino.

¹⁹ Mannu Xobbiya assinoha dancha coye anera kulinoe. Ani yeemmore baalankano isira kultinosi. Isino ane waajjishiishate borrote sokka soya diagurino.