NEHIMIYA 3 - Qullaawa Maxaafa

YERUSAALAMETE HUXXI GALAGALE HUXXAMI

¹ Katamu huxxi galagale huxxaminohu kunnira woroonni kulloonni garinniiti: Qeesootu roorrichi Eeliyaashiibinna ledosi qeesooti, «Ge'reewu Waalcho» yinanni huxxa galagalchite huxxite uyitu. Cufannano seekkitu. Huxxano, «Xibbe» yinanni shae kinchunnitanna, «Hanaanieeli» yinanni shae kinchunnite geeshsha huxxite uyitu.

² Iyyaarkote manni hakkunninni aanino gafa huxxeenna, Zakuuri yinannihu Imiiri beetti hakkunnira aanino gafa huxxi.

³ Hasina"a boosaalli manni, «Qulxu'mu Waalcho» yinanniwa huxxi. Mokkollono dirte wortu; waalchuwano xaadissu; waalchohono cufana, waawannanna magadaancho seekkitu.

⁴ Haqoosira beettisi beetto ikkinohu Ooriyo beetti Meremooti hakkiinni aane noo gafa huxxi. Meshazaabieelira beettisi beetto ikkinohu Berakiya beetti Meshulaami aane noo gafa huxxi. Hakkiinni aane noo gafa Beaana beetti Saadooqi huxxi.

⁵ Teqoa Katami manni hakkiinni aane noo gafa huxxi. Kayinnilla, katamu ayirraddi loosiissannori uyitinoha wolqate looso loosa gibbu.

⁶ Faaseha beetti Yoyadai, Besoodiya beetti Meshulaami, Yishana waalcho huxxitu. Mokkollono dirte wortu; waalchuwano xaadissu; cufannateno waawannanna magadaancho seekkitu.

⁷ Gebaooni gobbahu Melaaxiya, Meronooti gobbahu Yadooni, Gebaooninna Mitsipha manni Galchimi Awuraajji Efiraaxisihu gashshaanchi mini geeshsha noo gafa huxxitu.

⁸ Culka daashshannohu Harihaya beetti Uzieeli hakkiinni aane noo gafa huxxi. Aane noo gafa shitto qixxeessitannori giddonni Hanaaniya yinannihu huxxi. Kuni manni, «Hala'lado Huxxa» yinanni dargi geeshsha nooha baala huxxe gudi.

⁹ Hakkiinni aane noo gafa, Yerusaalamenniha darate worada gashshinohu Huuri beetti Refaya huxxi.

¹⁰ Harumaafi beetti Yidaiya minisira albaanni noo gafa huxxi. Aane noo gafano Hashebaaniya beetti Haxuushi huxxi.

¹¹ Hariimi beetti Malkiyanna Pohaati-Moaabi beetti Hashuubi hakkiinni aane noo gafanna, «Giirate Booso Shae» yinanniwa huxxitu.

¹² Aane noo gafano, wolu Yerusaalamete daratu woradi gashshaanchi Haloheshi beetti Shaluumi huxxi; seennisino huxxa kaa'lisi.

¹³ Hanooni yinanni manchinna Zanoha gobbara hee'ranno manni kaa'lame Lagichu Waalcho haaroonsite huxxitu; cufannano seekkitu; cufannateno waawannanna magadaancho seekkitu; ishine tunganni waalchi geeshsha, 440 qaafo ikkanno huxxa galagalchite huxxitu.

¹⁴ Beetihakaremi woradi gashshaanchi Rekaabi beetti Malkiya ishine tunganni waalcho huxxi. Cufannano seekki; cufannateno waawannanna magadaancho seekki.

¹⁵ Mitsipha woradi gashshaanchi Kolihooze beetti Shaluumi Buichote Huxxi Waalcho galagalche huxxi; gafo fukkihu gedensaanni cufanna uurrisi; cufannateno waawannanna magadaancho seekki. Sheelahi Kofame widoonni gashshootu mini gatinni kayise, Daawiti Katama fullanni dirimi geeshsha noo gafa galagalche huxxi.

¹⁶ Beeti-Tsuuri Awuraajja darate gashshinohu Azibuqi beetti Nehimiya, Daawiti moogi geeshsha mannu ummo kofamenna olantote qachi geeshsha noo gafa huxxi.

HUXXA HUXXATE LEDO NOO LEEWAAWOOTA

¹⁷ Huxxu loosira ledo noo Leewaawooti su'mi kunninni aane nooho: Baani beetti Rehuumi hakkiinni aane noo gafa huxxi. Qeila woradi darate gashshinohu Hashaabiya woradisi su'minni aane noo gafa huxxi.

¹⁸ Hakkiichinni aane noo gafa, Qeila woradi darate gashshinohu Henadaadi beetti Binuwi huxxi.

¹⁹ Mitsipha gashshaanchi Iyyaasu beetti Ezeeri olu bagado duunnannihura albaanni nooha huxxu eramme geeshsha nooha baala huxxi.

²⁰ Zaabaya beetti Baarookino, qeesootu qari Eeliyaashiibi minira e'nanni waalchi geeshsha nooha diinaggaawe huxxi.

²¹ Haqoosira beettu beetto ikkinohu Ooriyo beetti Meremooti hakkiinni kayise, Eeliyaashiibi mini qacce geeshsha nooha huxxi.

HUXXA HUXXATE LEDO NOO QEESOOTA

²² Hakkiichinni aane nooha huxxitino qeesooti su'mi kunninni aane nooho: Yerusaalamete gaangaawira noo qeesooti hakkiichinni aane noo gafa huxxitu.

²³ Insanni aanchite, Biiniyaaminna Hashuubi mininsara albaanni noo gafa huxxitu. Anaaniyara beettu beetto ikkinohu Maiseya beetti Azaariya umisi mini mule noo gafa huxxi.

²⁴ Henadaadi beetti Binuwi, Azaariya mininni kayise huxxu eramme geeshsha nooha huxxi.

^25-26 Uzayi beetti Palaali huxxu erammenninna mootete mine agarranni shae aliidi gashshootu minitenni kayise, agarranni nafari mule noo gafa baala huxxi. Paariooshi beetti Pedaya qole, wayi waalchi mule soojjaatoonni noo darganna, Qullaawa Mine agarranni shae, yaano Qullaawu Mini loosaasine heedhannoha katamunniha mitto gafa, «Oofeeli» yinanniwa noo gafa huxxi.

LOOSOHO LEDO NOOTI WOLE LOOSAASINE

²⁷ Teqoanni dayino mannino hakkiichinni sufe layinkimeeshsho Qullaawa Mine agarrara seekkinoonnitenni jawa shae albiidinni kayise, Oofeeli mule noo huxxi geeshsha huxxi.

²⁸ Gamu qeesootino, umi uminsa minira albaanni noo gafa, «Faradu Waalcho» yinannihura aliyyeenni noo gafa huxxitu.

²⁹ Imeeri beetti Saadooqi minisira albaanni nooha huxxeenna, soojjaati huxxi waalcho agarannohu Shakaaniya beetti Shemaiya hakkiichinni aane nooha huxxi.

³⁰ Shelemiya beetti Hanaaniyanna Tsalaafihu leelki beetti Hanooni, layinkimeeshsho uyinoonninsa gafa huxxitu. Berakiya beetti Meshulaami minisira albaanni noo gafa huxxi.

³¹ Culka daashshannohu Malkiya aane noo gafa huxxu erammera Aliyye Soojjaati mule noohu towantanni waalchi geeshsha nooha soqqamaanotenna daddalaasinete mini geeshsha noo hulfama huxxi.

³² Culka daashshitannorinna daddalaasineno huxxu maddera noo gafinni kayisse, ge'reewu huxxi waalchi geeshsha nooha goofimarchu hulfama huxxitu.