NAHOOMI 2 - Qullaawa Maxaafa

NENNEWE UWA

¹ Nennewe! Kade gashshanno diini dayinohe. Kunnira, qiishokki kaajjishi'ri, doogokki seekkite agadhi; hallokki qodhi. Wolqakki baala kaajjishidhe olaho qixxaawi.

² Diinna mulqitunsarono, woyinete kaashshonsa baalanka hunturono; Kaaliiqi Israeelete ayirrinye bashshowa qolanno.

³ Diinu gaaddo duummaadda wonquwa amaxxitino; duummaadda uddannano uddidhino. Gaadunniti faradu gaarensano, giirate buwani gede wala wala yitanno. Faradinsa hookkisanno; urdensannino hemmeeqidhanno; kunni garinni olaho qixxaabbanno.

⁴ Faradi gaarensano doogga baalate lowo geeshsha rakke doddanno. Kawanna ka'a lowo geeshsha buubbanni katamu gudumaalla doyitanno. Wala wala yaanno caabbicho labbanno, banqote gede beleqqanno.

⁵ Olu hajajaano baalanti woshshante gamba yitanno. Ikkollana dirante hadhanno woyite gufidhanno. Diinu gaaddo doddanni dagge, katamu huxxa dhoosse e'ara qixxaabbino.

⁶ Xashshu ragaanni nooti katamu huxxi waalchuwa, macaqqi yite fa'nantu. Gashshootu mini mannino hembeelami.

⁷ Mootitteno qafadantu, seennu soqqamaanose gagaso ga'nanni, bukukkaama gede ikke wi'li.

⁸ Kofame dhoonseenna co'o yee fule goofanno wayi gede, Nennewe mannino katamu giddonni mucuqqi yee fulanno. «Xooqqinoonte!» yine woshshininsaro nafa, ayino badhera dihiganno.

⁹ Katamu jiro kiirre didandiinannite; kunnira, hadhine birranna culka saantine adhe.

¹⁰ Nennewe Katami co'o yee bai; diigame ona ikke gati. Mannu baalunku wodani waajjillunni kainohunni daaqi. Guluchu baalunku qece yii; mannu baalunku halli leqe yii; baalunku albi xawulushshi yii.

¹¹ Doobbiyu hosannowa, doobbiyu ooso heedhannowa; labballunna meentu doobbiyi, qaaqquullinsa ledo yaaddo nookkiha galanno ga'rimmo lawannohu; hakku katami hanni xa hiikko nooyya?

¹² Doobbiichu ugaaxe abbe, oososiranna ledosi heedhannotera meya doobbiichora ikkannonsa geeshshire shiqishannonsa. Godinsara ugaaxe abbino maala wonshanno.

¹³ Olantote Mootichi Kaaliiqi, «Kuneeti ani diinoomunni kaoommohe. Faradi gaarekkino giireemmo; doobbiichu gede waajjishshannota gaaddokki bisetenni gudeemmo. Wolu manniwiinni mulqidhe gamba assi'roottaha baala huneemmo; kunni ka'a ate daafira coyidhannorita, soqqamaanokki huuro horontanni dimacciishshinanni» yaanno.