MILKIYAASI 1 - Qullaawa Maxaafa

KAALIIQI ISRAEELETE MANNA BAXINO GARA

¹ Kaaliiqi himanaanchu Milkiyaasi widoonni qole Israeelete mannira coyi'rino himani kunninni aane nooho:

² Kaaliiqi mannisira, «Ani ki'ne baxoommo'ne» yaanno. Mannu kayinni, «Baxattonketa mayinni leellishattonke?» yiino. Kaaliiqino, «Eesawunna Yaiqoobi roduuwaho; ani Yaiqoobi baxoommo

³ Eesawu kayinni giwoommo. Eesawuta gaaraame gobba moola asse aguroommo. Hattenne gobba yeedaala findiriiqqannota assoommo» yii.

⁴ Eesawu sircho ikkitinori Edoomootu, «Katammanke diigantino. Ikkirono galagalchine mi'nineemmo» yituro, Olantote Mootichi Kaaliiqi, «Insa mintanno. Ani kayinni diigeemmo. Wolu manni insa, ‹Busha gobbaati; Kaaliiqi hegere geeshsha hanqino gosaati› yaannonsa» yii.

⁵ Israeelete mannino konne baala illensanni lae, «Kaaliiqi Israeelete gobbaanni nafa wolqaataamoho» yaanno.

KAALIIQI QEESOOTA RUFI

⁶ Olantote Mootichi Kaaliiqi qeesootaho, «Beettu anna, soqqamaanchuno mootichasi ayirrisanno. Ani anna'neeti; mayira diayirrissinannieyya? Ani Mooticha'neeti; mayira ayirrinye diuyitinannie? Ki'ne ane mishshinoonnie. Tenne affinanni heedhine, ‹Hiitto assine minshummohe?› yitinoonnie.

⁷ Kakkallannie dargira battaabbino sagale kakkalote shiqishshinanni, ‹Ate ayirrisa hiitto hoongeemmo?› yitinanni. Anino, ‹Kakkalo'ya darga shotisatenniiti› yeemmo'ne.

⁸ Ballitinota, dhiwatinotanna naaffino saada kakkalote shiqisha bunshe assitinoonniha dilabbanno'ne? Hattoo saada gashshaanchi'nera afansha assitine uyitinanniha ikkiro, hagiidhe adhanno'nehanna galatanno'neha lawanno'neni?» yii.

⁹ Qoleno Olantote Mootichi Kaaliiqi, «Xa ki'ne qeesootu, eleemmo'ne gede ane Magano huuccidhe. Ki'newiinni hattoo afansha adhe huuccatto'ne macciishsheemmoha lawanno'neni?

¹⁰ Kakkalo'ya darga haafu kakkalo shilqishshinantenni, ki'ne giddonni Qullaawa Mine cufannohu mayi mittu hee'ra! Ki'nenni hagiidheemmokki daafira anera shiqishshinanni fushshaate diadheemmo.

¹¹ Arrishsho fultannowiinni kayise e'annowi geeshsha su'mi'ya dagate mereero ayirradoho. Darga baalaho anera hixaana giirtannanna dancha kakkalo shiqishshanna mannu baalu ayirrisannoe.

¹² Ki'ne qeesootu kayinni, kakkalo'ya darga battaawinoha assitine kiiratenninna mishshinoonni sagale shiqisha'nenni ane shollishshinoonnie.

¹³ Qoltineno, ‹Kuni mayi qarraati!› yitinanni ceeggifattinoonni. Kakkalo'ya darga mishshinoonni. Kakkalote moorroonnita, dhiwantinotanna naaffino saada abbitinanni. Hattoo kakkalo ani Olantote Mootichi Kaaliiqi anga'nenni adheemmoha lawanno'neni?

¹⁴ Saadasi giddo dancha saada aate xa'ne kae, minshoonni saada shiqishannohu dogaanchu manchi rumaminoha ikko. Ani jawa mooteeti; Olantote Mootichaati; daga baalano su'ma'ya waajjitanno» yii.