MIKIYAASI 5 - Qullaawa Maxaafa

¹ Ki'ne Yerusaalamete manna! Kuneeti diinu gaangeesse noonkena, Israeelete gashshaanchi baqqaallasi siqqotenni ganaraatina, olanto'ne mitteenni qixxeessidhe.

BEETELIHEMETENNI GASHSHAANCHU FULANNOTA HIMANNOONNI

² Maganu, «Ati Efiraata baattora hee'rattati Beeteliheme! Ayee geeshshano Yihudu katammanni maa'ne ikkittarono, hundunni kayise hegerera ikkannohu Israeelete gashshaanchi atewiinni fulanno» yaanno.

³ Kunnira, amasi iso ilta geeshsha Kaaliiqi mannasi diinaho sayise aanno. Hakkunni gedensaanni, qafadante heedhannori roduuwisi higge ga'rensa ledo karsantanno.

⁴ Isi daanno yannara, Kaaliiqiwiinni afi'ranno jawaantenninna xirchinni Kaaliiqi Maganu su'minni mannasi gashshanno. Lowimmasi gobbate qacce geeshsha egennantanno daafira, ga'resi massukkinni heedhanno.

⁵ Isino keerensa ikkanno. Asoori manni gobbanke horranno woyitenna qiishonke kade eanno woyite, manna agartannore 7 woy 8 olantote roorroota sonke olammeemmo.

QORICHISHANNA WOXXA

⁶ Olantonsa wolqanni Asoori manna qeelte amaddanno. Namiruudi gashshoote ikkitino gobba cufanna hiiqqaqqite e'anno. Asoori manni gobbanke horritannonna maassantinota gobbanke kaddanno woyite, isi angansanni gatisannonke.

⁷ Qarrunni gattinori Israeelete manni lowo daga mereero Kaaliiqi Maganu soyenna baatto duushshanno shori xeenunnihu gede ikkitanno. Hexxotenni agadhitannohu manna ikkikkinni Magano calla ikkanno.

⁸ Kuni qarruwiinni gatinohu Israeelete manni, lowo daga gashshooti mereero hee'ranni dubbu moyicho ugaaxanni hee'ranno doobbiichi gedeeha ikkanno. Hattono mitteno xooqe fulate hexxo afi'rinokki ge'reewo hedeweelcho e"e, hiiqqaqqe bibbide itannohu aju doobbiichi gedeere ikkitanno.

⁹ Israeeleno wolqatenni ka'e diinansa qeelte guddanno.

¹⁰ Kaaliiqi, «Hattenne yannara, farado'ne baala huneemmo. Faradi gaare'ne duuchanta hiiqqaqqeemmo.

¹¹ Gobba'nera noo katamma huneemmo. Qiisho'ne wo'manta diigeemmo.

¹² Kiilunni assitinanniha murgote coye'ne huneemmo. Bitaammuno kunni ka'a mereero'ne diheedhanno.

¹³ Kaphu maganna'nenna angatenni seesiinse loonsoonni misilla'nera dikumbuultinanni.

¹⁴ Asheera mokkollono baatto'nenni huneemmo; katamma'neno diigeemmo.

¹⁵ Anera hajajama gibbino gosa duuchanta hanqi'yanninna aari'yanni rabbisi'reemmo» yaanno.