MIKIYAASI 4 - Qullaawa Maxaafa

KEERU WO'MINOHU KAALIIQI GASHSHOOTI DAANNO

¹ Goofimarchu iillanno yannara, Kaaliiqi mini minamino ilaali, wole ilaalla duuchantenni roore leellanno Gaaru wo'munkunni roore gotti yaanno. Lowo gobba manni isiwa lolahanno;

² kuni mannino, «Seera Tsiyooni, Maganu qaaleno Yerusaalamete anfanni daafira, amme Kaaliiqi ilaala fullona; amme ka'a Yaiqoobi Magani mini huuccattonnihuwa ha'nona. Isi hedinore assineemmo gede rosiisannonke; ninkeno isi doogo hinge ha'neemmo» yaanno.

³ Isi lowo daga mereero yoo yaanno. Mulenna xeertote noo gashshaasine jajjabbunnite mereero nooha, babbadooshshe hoolanno. Kunnira, bisensa heellakkote, urdensa haantote soorritanno. Gashshootu gashshootu aana ola dikayisanno. Kunni ka'a olu roso rosannohu dihee'ranno.

⁴ Mannu annu annunkunni kaasi'rino balasenna woyinete caali hunda, harshammi yite fooliishshidhanno; masisannonsari dihee'ranno. Konne coye coyi'rinohu Olantote Mootichi Kaaliiqaati.

⁵ Daga wo'manti uminsa maganna magansidhanno. Ninke kayinni hegere geeshsha Kaaliiqa Maganonke magansi'neemmo; isira hajajammeemmo.

ISRAEELETE MANNI QAFADOTEWIINNI HIGI

⁶ Kaaliiqi, «Ani qorichishoommonsa daafira, qafadameenna lowo qarrinna mitiimma amaddinoha manna'ya gamba asseemmo yanna dagganno.

⁷ Qarrunni dintinori mereerinni shiimu manni gatanno gede asseemmo. Tugante heedhannore jawaata manna asseemmonsa. Anino Tsiyooni Ilaali aana hattenne yannanni kayise hegerera insa moote ikkeemmo» yaanno.

⁸ Maganu mannasi allaalaasinchu gede asse towatanno shae ati Yerusaalame! Albi gashshootikkino galagale higannohe.

⁹ Togo raartanni wi'lattahunna ilate game amaddino mancho gede hinciiccamattahu mayiraati? Moote noohekkihuraatinso, amaalannohehu hooginohehuraati?

¹⁰ Yerusaalamete manna! Ilate game amaddino mancho gede haafattinanni urre. Mayira yitiniro, katamunni shorrantine minu nookki gobbara tugantinanni. Baxxinikkinni Baabilooni hadhinanni gede assinanni'ne. Ikkeennano, Maganu hakkono gatisanno'ne; diini'ne angannino wodanno'ne.

¹¹ «Yerusaalame ba'o; diigamaserano tashshi yoonke» yitanni lowo gosa ki'ne aana hendoonnikki mitiimma tuggara gamba yitino.

¹² Hatti gashshaasine kayinni, Kaaliiqi hedo diaffino. Gannanni gide nadala nadala assine ayiddummete gamba assinannihu gede Maganu gamba assinonsahu qorichishate ikkinota diwodanchitino.

¹³ Kaaliiqi, «Ki'ne Yerusaalamete manna! Martine diina'ne gidu gede assitine ganne; buudasi siwiila, culunqasi camo ikkino woraami gede jawaatoota asseemmo'ne. Co'o assitine huntinanni. Beebbatenni adhitinoonni jironna beehacho wo'manka gobba wo'mante Mooticha ikkoommohura anera abbitinanni» yaanno.