MARRO 8 - Qullaawa Maxaafa

MAGANO HABBINOONTE

¹ «Lubbotenni heedhinanni gede, batidhinanni gedenna Kaaliiqi annuwa'nera aara xaarino baatto martine ragidhinanni gede techo ani eemmo'ne hajajo baala seekkitine agadhe.

² Magani'ne Kaaliiqi hajajosi agadhitinannitanna hoogginannita afara, affinanni gede assa'neranna jife la"a'nera kunni shoyilluu diri giddo tenne halallitte baatto baalate asse haa're ha'rino'ne gara qaagge.

³ Kaaliiqi affinaranna rosiisa'nera yee hudiissino'ne. Ki'nenna annuwa'ne affinoonnikkita menna yinanni sagale itisino'ne. Hatto assinohu mannu Maganu afiinni fulanno qaali baalunni ikkinnina sagale callatenni hee'rannokkita egensiisa'neraati.

⁴ Kunni shoyilluu diri giddo uddano'ne diakkaltino; lekka'neno didarshitino.

⁵ Mannu oosichosi seejji'rannonte gede, Magani'ne Kaaliiqi ki'neno seejjanno'neta egenne.

⁶ «Iso ayirrisatenninna doogosi ha'ratenni Magani'ne Kaaliiqi hajajo agadhe.

⁷ Magani'ne Kaaliiqi gaarratenni lolahanno xashshinna laggatenni fultanno bu'a noowa dancha baatto haa're massanno'ne.

⁸ Iseno qamade, hayixe, woyinetenna balasete haqqe, roomaanete laalo, zayitete ejedhenna malawu hee'ranno baattooti.

⁹ Mitturino xeannokkiwa, sagale hooggannokkiwa, siwiila giddo afidhino kinna noowa, gaarratennino duumo siwiila u'mitine fushshi'ra dandiitinanniwa massanno'ne.

¹⁰ «Ittine duubbinanni yannara, tenne shaqqado baatto uyino'neha Magano'ne Kaaliiqa galatte.

¹¹ Techo barra eemmo'ne hajajo, seerasinna wogasi agadha hooggine Magano'ne Kaaliiqa habbinannikki gede qorophe.

¹² Ittine duubbinanni woyitenna dancha mine mi'nitine heedhinanni yannara,

¹³ qoleno lalu, ge'reewunna meu bati'ranno'ne yannara, birrunna culku haammatanno'ne yannara, noo'neri baalu kiiro lexxanno woyite,

¹⁴ wodani'ne naaxxeenna borojjimmatenni Gibitsete baattonni fushshino'neha Magano'ne Kaaliiqa habbinannikki gede agadhe.

¹⁵ Hakko hala'ladonna waajjishshanno baatto halallitera, hattenne goo'riissitannoteranna wayi nookkitera, harfaamu hamasinna iddu noo baattora albisino'ne; jaamu kinchi giddonnino waa fushshino'ne.

¹⁶ Gedensaannino seyanno'neta affinanni gede assa'neranna jife la"a'nera, annuwa'ne affe egentinokki sagale menna halallitte baattora itisino'ne.

¹⁷ Miteekkitine wodani'nenni, ‹Tenne jiro afi'noommohu wolqankenniitinna jawaantenkenniiti› yitine heddinoonte.

¹⁸ Hatteentenni techo la'ininte gede jiro afidhinanni gede wolqa uyino'nehu, annuwa'nera xaarino gondoori wo'manno gede assinohu iso ikkinohura, Magano'ne Kaaliiqa qaagge.

¹⁹ «Magano'ne Kaaliiqa habbinironna wole maganna hoode hadhiniro, soqqantininsaronna magansidhininsaro halaalintanni ba'inannita techo seekke kuleemmo'ne.

²⁰ Magani'ne Kaaliiqi alba'neenni noo daga hunannonte gede, hajajama gibbinisiro ki'neno hunanno'ne.