MARRO 7 - Qullaawa Maxaafa

KAALIIQI MANNA

¹ «Magani'ne Kaaliiqi martine ragidhinanni baatto massanno'nenna haammata ki'ne roortannota jajjabbanna wolqaataamma 7 daga: Hitoota, Gergesoota, Amooraawoota, Kana"aanoota, Ferizoota, Hiwootanna Iyaabuusoota albi'nenni shorranno yannara,

² Magani'ne Kaaliiqi anga'nera sayise aanno'ne yannaranna ki'neno insa qeeltinanni yannara, baalanka co'o assitine hunne. Insa ledo namoontinoonte; marartinoontensa.

³ Insa ledo adhantinoonte. Ooso'ne seennensa adhitoonke; seenni'neno oosonsara assi'roonke.

⁴ Kunino, ooso'ne ane hoode hadhannota hoolte wole maganna magansidhanno gede assitannohuranna hakkunninni kainohunni Kaaliiqi hanqi aana'ne buwe, rahe hunanno'nekki gedeeti.

⁵ Kunnira, assa hasiissanno'neri kunninni aane nooho: Kakka'litanno darga diigge; magansidhanno sooddiyye hiiqqaqqe. Asheera yinanni magano mokkollo murmurre; misillaseno cancanne.

⁶ Ki'ne Israeele, Magani'ne Kaaliiqira qullaawa gosa ikkitinoonnihura, umisi woxe ikkitinanni gede baattote aana hee'ranno manni baalu giddonni ki'ne doodhino'ne.

⁷ «Kaaliiqi ki'ne baxino'nehunna doodhino'nehu wole gosanni kiiro roortineenna di"ikkino. Kiiro'ne gosa baalatewiinni lowo geeshsha ajjinote.

⁸ Ikkollana, ki'ne jawaata angasinni fushshino'nehu, borojjimmatenninna Gibitsete moote Feriooni anganni wodino'nehu, Kaaliiqi ki'ne baxino'nehuraatinna annuwa'nera xaarino xaaro agarinohuraati.

⁹ Kunnira, Magani'ne Kaaliiqi baxxannosiriranna hajajosi agadhitannorira gondoorosinna bagamannokki baxillesi kume ilama geeshsha agarannoha ikkinota habbinoonte. Isi ammanamino Maganooti.

¹⁰ Gibbannosire kayinni qorichishanno; gibbannosire shee gudanno.

¹¹ «Kunnira techo barra eemmo'neta hajajosi, wogasinna seerasi seekkitine agadhe.

¹² «Konne seera macciishshitinironna seekkitine agadhitiniro, Magani'ne Kaaliiqi annuwa'nera xaari xaaro garinni xaano gondoorosinna bagamannokki baxillesi disoorranno.

¹³ Kaaliiqi baxanno'ne; maassi'ranno'ne; batisanno'ne. Annuwa'nera aara xaarino baatto godowi'ne guma, baatto'ne laalcho, gide'ne, haaro woyinete xajje'nenna zayite'ne, lalo'nenna siitta'ne, ge'reewo'ne, me"e'nenna wilii'le'ne maassi'ranno.

¹⁴ Gosa baalantenni roore ki'ne maassantinanni. Manni'ne giddo ilannokkihu saada'ne giddo qalannokkihu dihee'ranno.

¹⁵ Kaaliiqi bushu dhibbi baalunkunni agaranno'ne. Gibitsete gobbara heedhine affinoonnihu hakku lowo geeshsha shetisanno dhibbi ki'ne dikisanno'ne. Gibbanno'neri aana kayinni dirranno.

¹⁶ Magani'ne Kaaliiqi anga'nera sayise aanno'ne gosa baala gatissinikkinni shiiyye; marartinoonte. Woshshaadote gede ikkite amaddanno'nena, magannansa magansidhinoonte.

¹⁷ «‹Tini daga ninke roortinona hiitto assine hunneemmo?› yitine wodani'nenni yaaddinoonte.

¹⁸ Insa waajjitinoonte. Magani'ne Kaaliiqi Feriooninna Gibitsootu aana assinore baala qaagge.

¹⁹ Ille'nenni la'inoonninte gede lowo geeshsha waajjishanno qoomaminninna dhaggete malaatinni Magani'ne Kaaliiqi jawaata anganninna wolqaataame cigilenni fushshino'ne. Magani'ne Kaaliiqi tenne dagano hatto asse hunanno.

²⁰ Magani'ne Kaaliiqi ki'newiinni gatte maaxantinorira harridiida soyanno.

²¹ Mereero'ne noohu Magani'ne Kaaliiqi jawanna waajjishanno Magano ikkino daafira insa waajjitinoonte.

²² Magani'ne Kaaliiqi tenne gosa shiimu shiimunni albi'nenni hoolanno. Dubbu moyichi bati'ranno daafira, baalanka mitte higgine huntinara difajjinanni'ne.

²³ Magani'ne Kaaliiqi kayinni diinna'ne anga'nera sayise ee darante ba'anno gede assanno.

²⁴ Mootoollansa anga'nera sayise aanno; baattote aaninni su'minsa hawamanno. Insa huntina geeshsha, ittisa'nera dandaannohu mittuno dihee'ranno.

²⁵ Magannansa misilla giirre. Misillate aana worroonni birranna culka halchitinoonte; adhitinoonte. Adhitiniro kayinni, Magani'ne Kaaliiqi konne coye lowo geeshsha giwanno daafira, woshshaado ikkanno'ne.

²⁶ Giwisanno coye mini'nera woy umi'nera abbidhinoonte. Hatto assitiniro, ki'neno hakkuri gede baote gaamantinannina, horonta makkidhine gibbe. Kuri Maganu giwinnoreeti.