MARRO 5 - Qullaawa Maxaafa

TONNE HAJAJO

¹ Muse Israeelete manna baalanka woshshe, «Israeele, techo barra macca'nera kuleemmo'neta woganna seera macciishshe; buuxxe; seekkitine agadhe.

² Maganinke Kaaliiqi Siina Ilaalira ninke ledo gondooro eino.

³ Kaaliiqi konne gondooro einohu annuwanke ledo calla ikkikkinni, techo konne lubbotenni hee'noommori ninke baalunku ledooti.

⁴ Kaaliiqi ki'nera ilaalu aana giirate mereero alba'neenni hee're isi umisi coyirino'ne.

⁵ Ki'ne kayinni, giira waajjitine ilaalu iimira fula hoogginoonnihura, Kaaliiqi qaale kuleemmo'ne gede ki'nenna Kaaliiqi mereero uurroommo.

⁶ «Kaaliiqino, ‹Borojjimmate giddonni Gibitsete baattonni fushshummohehu Maganikki Kaaliiqi aneeti.

⁷ « ‹Ane agurranna wole maganna heedhoonkehe.

⁸ Iima gordoho, uulla baattote aana noorinni woy baattote woroonni wayi giddo hee'rannori daninni mayi misileno umikkira magano assidhe seekkidhooti.

⁹ Ani Maganikki Kaaliiqi giwannoehanna sirchosi sasenna shoole ilama geeshsha qorichisheemmo. Ani wole magano banxanna lae dicinceemmohona, wole magannara soqqantooti.

¹⁰ Baxannoehuranna hajajo'ya agadhannohura kayinni, kume ilama geeshsha bagamannokkiha baxille'ya leellisheemmo.

¹¹ « ‹Ani Kaaliiqi, su'ma'ya kaphunni kayisannoha qorichishummokkinni diagureemmona, ane Maganikki Kaaliiqi su'ma kaphunni kayissooti.

¹² « ‹Ani Maganikki Kaaliiqi hajajoommohe garinni Fooliishshote Barra qullaawa assidhe ayirrisi.

¹³ Lee barra loosokki baalanka loosi'ri.

¹⁴ Lamalki barri kayinni, Maganikki Kaaliiqira Fooliishshote Barraati. Hakko barra ati, oosokki, seennikki, faantichikkinna faantittekki, handikki, harrichikki, woy aye saadano, woy qole manni gobba manni mittoreno assoonke. Kunino ati fooliishshi'rittonte gede faantichikkinna faantittekki fooliishshidhanno gedeeti.

¹⁵ Gibitsete heedhini yannara, borojje ikkitine heedhinoonnita qaagi. Ani Maganikki Kaaliiqi hakkiinni jawaata anganninna wolqaataame cigilenni fushshoommo'neta huwati. Kunnira, Fooliishshote Barra ayirrisatto gede hajajoommohe.

¹⁶ « ‹Ani Maganikki Kaaliiqi eemmohe baatto aana diru seedannohe gedenna seyannohe gede, hajajoommohe garinni annakkinna amakki ayirrisi.

¹⁷ « ‹Shitooti.

¹⁸ Foortooti.

¹⁹ Moortooti.

²⁰ Afoottokkire beebbatenni naqqassooti.

²¹ Wolu galte yortooti. Wolu mine, baattosi, faantichasinna faantittesi, handosinna harrichosi, woy mannire mittoreno yortooti› yii.

²² «Ilaalu aana gamba yitini yannara giirate, gomichunninna dhi'mote tunsichi mereero jawaata huurosinni coyi'ranni uyino'ne hajajo tenneeti ikkinnina wole di"ikkitino. Tenne hajajono 2 bocame kinna aana borreesse uyinoe.

MUSE MANNUNNA MAGANU MEREERO UURRI

²³ «Ilaalu aana giira bubbanna, tunsichu mereero huurosi macciishshitini yannara, ki'ne ga're ga're'ne sooreeyyenna geerri'ne baalunku anewa daggine,

²⁴ ‹Maganinke Kaaliiqi ayirrinyesinna xirchosi leellishinonke. Giirate giddo hee're huurosi macciishshiinshonke. Maganu hasaawisinosi manchi lubbotenni hee'ra dandaannota techo anfoommo.

²⁵ Kunni ka'a Maganinke Kaaliiqi huuro macciishshinummoro reyineemmo. Tini wolqaataame giira co'o assite huntannonke. Hakkawoyiteetiro, reyo mayira hasi'noyya?

²⁶ Isi anfina, giirate giddo hee're coyi'ranna ninke macciishshinummonte gede, Heeshshote Magani huuro macciishshe lubbotenni hee'ra dandaanno manni wolu nooni?

²⁷ Ati Muse shiqqi yite, Maganinke Kaaliiqi yaannore baala macciishshi. Hakkunni gedensaanni yaannore gudisse kulinke. Ninkeno macciishshine wonshineemmo› yitinoonni.

²⁸ «Hatto yitinannae Kaaliiqi macciishshe, ‹Kuni manni yiinore macciishshoommo; yitinohu baalunku garaho.

²⁹ Wo'manka woyite hattoo wodani he'roommensaro, ayirrissoomme"eronna hajajo'ya baala wonshitoommero, insaranna sirchinsara geedote geeshsha wo'munku coyi qinaannonsahu baino.

³⁰ « ‹Xa marte dukkana dukkanansa higganno gede kulinsa.

³¹ Ati kayinni, ragidhara eemmonsa baattora agadhitanno gede rosiisattonsa hajajo, woganna seera baalanka eemmohe gede konne anewa agari› yiinoe.

³² «Israeelete manna, Magani'ne Kaaliiqi hajajino'nere wonshate qixxaabbe. Ka'anna kawa yitinoonte.

³³ Lubbotenni heedhinanni gede, seyanno'ne gedenna ragidhinanni baatto aana seeda diro heedhinanni gede, Kaaliiqi hajajino'nere baala wonshe.