MARRO 32 - Qullaawa Maxaafa

¹ «Gordonna baatto, macciishshe"e; ani coyi'reemmona, ki'neno yeemmota macciishshe.

² Rosi'ya xeenu gede ikke dirro; qaali'yano loju gede ikke dirro. Mudhino hayisso aana shoru gede ikke, kaashshu aanano ga'labbichu xeeni gede ikke dirro.

³ Ani Kaaliiqi su'ma galateemmo; Maganinkerano ayirrinye uyino!

⁴ «Isi jawaata go'linanni kinchooti; loosisino guutaho. Doogosi baalanti suwashshote; halaalaanchohonna ammanammo Maganooti; suwashshunna taalu Magani isooti.

⁵ Isi aana bunshe assitino; bunshensanni kainohunni kunni ka'a oososi di"ikkitanno; yawaawulootahonna shokkadda gosaati.

⁶ Ki'ne gowwootunna wodanchitinannikki gosa, Kaaliiqira qoltinanni galati konneeti? Isi kalaqino'neha anna'ne di"ikkino? Ki'ne gosa assino'nehu iso di"ikkino?

⁷ Alba saino dirire qaagge; kultanno'nena annuwa'ne xa'me. Alba sainore kultanno'nena geerra'ne xa'me.

⁸ Wo'munkura Aliidi Magani, dagate heedhanno baatto beehinonsa. Mannu hee'rannowano badino; Israeelete ooso kiiro garinni dagate baattora danna worino.

⁹ Kaaliiqi Yaiqoobi sircho, umisi manna asse doodhino.

¹⁰ «Ki'ne Israeelete manna, moola baattora, woggartanno diilallo noowa halallitte gobbara, raataabbinanni heedhinoonnire afe, illesi gumi gede asse seekke agarino'ne.

¹¹ Qoolasi aanansa diriirse caacurresi agadhanno allamurchi gede, Kaaliiqino qoolasi diriirse, mannasi uwannokki gede duhanno.

¹² Ayetano wolu magani kaa'lo hasi'rikkinni, Mannasi Kaaliiqi callisi massagino.

¹³ «Kaaliiqi, mannisi gaaraame Kana"aani baatto gashshanno gede assino; gatinsa laalchono ittanno gede assinonsa. Kinnate giddonni malawo itisinonsa; kinnaame baattora zayitete ejersa fushshinonsa.

¹⁴ Lowo adonna buuro aanno lalo, coomino ge'reewo, deesallo me"e, hardinoha Baasaani lalo uyinonsa. Dancha qamadenna, xuma woyinete xajje uyinonsa.

¹⁵ «Israeele duubbe maahoyye gibbino; manninatinsa kee'mino; sagaleno qawaaxxidhino. Kalaqinonsa Magano agurtino; wolqaataamo gatisaanchonsa mishshino.

¹⁶ Kaphu maganna magansi'ratenni, Magano hinaasiisse hanqissinosi. Hakkore magansi'ratenni battete coye assitino.

¹⁷ Halaalaasine ikkitinokkirira, annuwansa affinokkirira haaro magannara, kunni albaanni Israeele soqqante egentinokkirira kakkaltino.

¹⁸ Kalaqaanchinsa Maganuwiinni wirri yitino. Ilinonsaha jawaata golonsa habbino.

¹⁹ «Kaaliiqi konne coye lae hanqe, oososinna seennesi giwi.

²⁰ Isino, ‹Mokkookkanna ammanantinokki ilama ikkitinohura, alba'ya insawiinni shawwu asseemmo; marte fultannowano afeemmo.

²¹ Tidhitinokkitenni kaphu magannanni hinaasiisse hanqissinoe. Anino hinaasiissannonsanna hanqissannonsa gede, tidhitinokkita gowwa gosa soyemmonsa.

²² Hanqi'ya giirate gede buwe, baattote aana noore baala gudanno. Giirano jeennaatu geeshsha iillitanno; ilaallate safono ittanno.

²³ « ‹Higgannokki bao abbeemmonsa; bagado'yano aanansa gudeemmo.

²⁴ Hude guddannonsa; buwanno fooggali itannonsa. Shettote dhibbinni reyitanno; gawajjannonsa gede dubbu moyicho, iddannonsa gede harfaamo hamaso soyemmo.

²⁵ Oosonna seenne, qaaqquullenna geerra, dooggate shinanni. Mine minesi noohuno waajjillunni kainohunni reyanno.

²⁶ Insa ayino qaagannonsakki gede asse, billaallisammora dandeemmo.

²⁷ Kayinnilla, diinnansa togo assinoommori ninkeeti ikkinnina, Kaaliiqa di"ikkino yite naaxxitara hasi'reemmokki daafira aguroommo› yiino.

²⁸ «Tini wodancha afidhinokki gosaati; egennono horonta dinonsa.

²⁹ Wodancha noonsaha ikkoommero, konne coye buuxxanno; marte gawa'litannowano affanno.

³⁰ Wolqaataamu Magani callachisha hoogoommensaro, Kaaliiqi facci asse agura hoogoommensaro, kume manna mittu manchi, tonne kume lamu manchi, hiitto asse qeelara dandaanno?

³¹ Magannansa Maganinke gedee jawaata ikkitinokkita, diinnanke nafa affino.

³² Diinnansa Soddoomunna Gomooru gate, kaasantino haqqicho woyinennite gede battabbinoreeti; insano qaraaronna harfu wo'mino laalo gedeereeti.

³³ Woyinensano hamashshu harfi gedeeti.

³⁴ «Kaaliiqino, ‹Insara hedoommore, ani miinju gede asse agare noommo.

³⁵ Rabba anete; rabba ani qoleemmo; lekkansa sarraaqantannohu baonsa barri gamba yiino; qorichishantanno barri iillino› yiino.

³⁶ Wolqa noonsakkitanna mannu goofita afe, mannasi keereensanno; soqqantannosire baala mararannonsa.

³⁷ Hakkunni gedensaanni Kaaliiqi, ‹Wolqaataame maganna'ne, hanni hiikko nooyya?

³⁸ Kakkalo'ne cooma ittuti, agatto'ne afanshita woyinete xajje aggu maganna hiikko no? Hanni dagge kaa'lito'ne! Hanni dagge golanto'ne!

³⁹ « ‹Ani calli'ya Maganoho; ane ka'a wolu magani dino. Sheemmo; gatiseemmo; madiisseemmo; hurseemmo; anga'yanni gatisara dandaannohu mittuno dino.

⁴⁰ Hegerera hee'reemmoha ikka'yanni, anga'ya ale qole kayise xaareemmo.

⁴¹ Bise'ya gamaxe bilicci yitanno gede asseemmo; halaalaancho yoo rakkanno gede ise anga amadeemmo. Diinna'ya rabbisi'reemmo; gibbannoereno qorichisheemmo.

⁴² Bise'ya diinna'ya maala ittanno yannara, bagadi'ya mundee aganno gede asseemmo. Diinna'yaha seeda danancho: umo mure tayiseemmo; qafadantinore baala sheemmo› yiino.

⁴³ «Daga! Kaaliiqi manna jajje; mannasi shitinore baala qorichishanno. Diinnasi rabbisi'ranno; mannisi cubbono maaranno» yee nabbawi.

⁴⁴ Museno Newe beetti Iyyaasu ledo daye tenne faarso mannu macciishshanna rosiise gudi.

MUSE UYINOTI JEEFOTE SEEJJO

⁴⁵ Muse tenne baalanta faarso Israeelete manni wo'munkura kulihu gedensaanni,

⁴⁶ «Konne Seera baalanka seekkite agadhitanno gede ooso'neno hajajjinara, ani techo faajjete kuleemmo'ne coye baala wodani'nera wodhe.

⁴⁷ Kuni qaali ki'nera seeda heeshsho aanno'neho ikkinnina, mullicho qaale di"ikkino. Kunni qaalinni Yordaanoosi Waa fultine ragidhinanni baattora seeda diro heedhinanni» yiinsa.

MUSE HEXXOTE GOBBA ILLE CALLATENNI LAI

⁴⁸ Hakko barra Kaaliiqi Musera,

⁴⁹ «Moaabi baattora Iyyaarko Katamira albaanni noo ilaalla Abariimitewa marte, Nebo Ilaala giddi. Hakkunni gedensaanni, Israeelete mannira ragisiiseemmota Kana"aani baatto lai.

⁵⁰ Rodiikki Aarooni Hoori Ilaalira reyinte gede, atino kunni Nabawo Ilaali aana reyatto.

⁵¹ Kuni ikkannohuno, ki'ne lamunku anera ammanama hoogginoonnihuraati. Ani Maganoho; kayinnilla, halallitte baatto Tsiinitera, Qaadesi Meriiba Wayi mule Israeelete manni albaanni, anera hasiisino ayirrinye diuyitinoonnie.

⁵² Kunni daafira, fafowa heedhe la"attota ikkinnina, Israeelete mannira eemmo baatto marte di"iillatto» yiisi.