MARRO 31 - Qullaawa Maxaafa

IYYAASU MUSE DARGA AMADI

¹ Hakkunni gedensaanni, Muse Israeelete mannira lede,

² «Kuneeti, anera 120 diro ikkinoe. Kunni ka'a gashshammoranna hosiisammora didandeemmo. Kaaliiqino, ‹Yordaanoosi Waa difulatto› yiinoe.

³ Magani'ne Kaaliiqi umisi alba'neenni balaxe fulanno. Hakkiicho heedhanno dagano hunanno. Ki'neno baattonsa ragidhinanni. Kaaliiqi coyi'rinonte gede, Iyyaasu sooreessa'ne ikkanno.

⁴ Kaaliiqi Amooraawootu mootoolla Sewooninna Aagi baattonsa ledo huninte gede, koreno hunanno.

⁵ Kaaliiqi insa anga'nera sayise aanno. Ki'neno insa ani hajajoommo'ne gede assitinanni.

⁶ Jawaatte; kaajje; insa horonta waajjitinoonte. Magani'ne Kaaliiqi ledo'ne hee'ranno; diaguranno'ne; dicallachishanno'ne» yee coyi'ri.

⁷ «Hakkunni gedensaanni, Muse Iyyaasu woshshe, Israeelete manni baalunku albaanni, Kaaliiqi annuwansara aara xaarino baatto ragi'ranno gede konne manna haadhe massattohu ateetina, jawaati; kaajji.

⁸ Albakkiinni ha'rannohu Kaaliiqaati. Isi ate ledo hee'ranno. Dicallachishannohena, horontanni yaaddooti; waajjitooti» yiisi.

SEERA LAMALU DIRINNI MITTE HINGE NABBAMBANNI GEDE HAJAJO UYINI

⁹ Museno konne Seera borreesse, Kaaliiqiha Gondooru Taaboota dukkannorira Leewaawootu qeesootiranna Israeelete manni geerri baalunkura uyi.

¹⁰ Museno insa, «Asale agurrannihura lamalkihura Daasu Ayyaanira,

¹¹ Israeelete manni baalunku magansi'nannisi gede Magani'ne Kaaliiqi doodhino dargira daanno woyite, konne Seera albansaanni qoonqo'ne naggi assitine nabbabbinanni.

¹² Macciishshe Magano'ne Kaaliiqa ayirrisa rose, seerasi baala seekke agadhanno labballo, meento, oosonna katamma'nera hee'rannoha manni gobba manna gamba asse.

¹³ Kunni garinni Magani'ne Kaaliiqi Seera affe egentinokkiti ooso'ne macciishsha dandiitanno. Kunnira, Yordaanoosi Waa fultine ragidhinanni baattora heedhinanni diri baalunkunni Magano ayirrisa rossanno» yee hajaji.

ISRAEELETE MANNITA HAJAJAMA GIWANSA BALANXE KULLI

¹⁴ Kaaliiqi Muse, «Kuneeti reyatto barri iillinona sooreessimmate buureemmosi gede Iyyaasu woshshiteenna ledosi Qullaawu Dukkaniwa amme» yiisi. Musenna Iyyaasuno Qullaawu Dukkaniwa martu.

¹⁵ Kaaliiqino Dukkanu aana gomichu giddo hee're leellinsa. Gomichuno Qullaawu Dukkani waalchira uurri.

¹⁶ Kaaliiqino Musera, «Kuneeti annuwakkiwa ha'ratto; ati reyittohu gedensaanni, kuni manni ane agure hattenne ragi'ranno baattora noota dagate maganna magansi'ranno. Ledonsa eoommo gondoorono diiganno.

¹⁷ Hatte yannara hanqi'ya aanansa buwanno. Anino callachisheemmonsa; alba'ya insawiinni shawwu asseemmo; insano ba'anno. Lowo qarrinna lowo shetto iillitannonsa. Hakko barra, ‹Tini bao iillitinonkehu Maganinke ledonke nookkihuraati› yitanno.

¹⁸ Kaphu magannawa higatenni assitino bunshenni kainohunni, hakka waro horontanni alba'ya insawiinni shawwu asseemmo.

¹⁹ «Kunnira tenne faarso umi'nera borreessidhe; Israeelete mannirano rosiisse. Tini faarsono ani assate hasi'roommore qaagiissitanni wodaninsara naqaashshe ikkitanno.

²⁰ Adonna malawu lolahannota danchanna shaqqado baatto annuwansara aate xaaroommotewa haa're masseemmonsa yannara, itte duubbe kee'mituhu gedensaanni, ane mishshe gondooro'yano diigge, alba kaphu magannawa higge, insa magansidhanno.

²¹ Lowo qarrinna lowo shetto iillitannonsa yannara, hajajama hoogansanni kainohunni qorichisha'yara tenne faarso oosonsa habbannokki gede faarsitanna naqaashshe ikkite heedhannonsa. Aammonsara hedoommo baatto iillishammonsara albaanni, wodaninsara noota busha yorto afoommo» yii.

²² Museno tenne faarso hakko barranni borreesse, Israeelete mannira rosiisi.

²³ Kaaliiqino Newe beetto Iyyaasu, «Jawaati, kaajji! Israeelete mannira aammonsara xaaroommo baatto haadhe massattonsana. Anino ledokki hee'reemmo» yee hajajo uyisi.

²⁴ Museno mittoreno gatisikkinni Kaaliiqi Seera seekke maxaafaho gudise borreessi.

²⁵ Borreesse gudihu gedensaanni, Kaaliiqiha Gondooru Taaboota dukkanno Leewaawoota,

²⁶ «Konne Seeru Maxaafa haadhine, mannu baalunkura naqaashshe ikkanno gede Magani'ne Kaaliiqi Gondoori Taabooti mule worre.

²⁷ Ki'ne baalunku mageeshshi geeshsha haxawarrootanna mokkookkoota ikkitinoonniro afoommo. Ani lubbotenni hee'reenna togo ikkitinoonniri, ani noommokki waro mageeshshi geeshsha haxawarritinanni ikka!

²⁸ Konne coye kuleemmonsa gede ga're'ne geerranna roorroota gamba asse. Anino gordonna baatto naqaashshe asse kiidheemmo.

²⁹ Ani reemmo waro horonta battaabbinannita, hajajoommo'ne doogonnino wirri yitinannita afoommo. Kaaliiqi giwanno coye assatenni iso hanqissineenna bao dagganno'ne» yee coyi'ri.

MUSE FAARSO

³⁰ Museno tenne faarso baalanta, gamba yiinohura Israeelete manni baalunkura: