MARRO 28 - Qullaawa Maxaafa

HAJAJAMATENNI AFI'NANNI MAASSO

¹ «Magani'ne Kaaliiqira wo'mu wodaninni hajajantinironna ani techo eemmo'ne hajajo baalanta seekkitine agadhitiniro, Magani'ne Kaaliiqi baattote aana heedhanno gosa baalantenni roorsanno'ne.

² Magani'ne Kaaliiqira hajajantiniro, kunninni aante noo maasso baala wo'manka woyite ki'neta ikkitanno.

³ «Katamahonna gate'ne assidhinanniri maassamanno'ne.

⁴ «Godowi'ne gumi, baatto'ne laalchi, jajjabbunna hooffille saada'neno maassantanno.

⁵ «Qaldu gidinna qinshanni sagaleno atoottanno'ne.

⁶ «Ea'nenninna fula'ne baalantenni maassantinanni.

⁷ «Kaaliiqi ki'ne aana ka'anno diinna qeelantanno gede assanno. Mitte faro higge dagganno. Lamala faro higge ki'newiinni xooqqanno.

⁸ «Kaaliiqi qaldi'neranna assidhinoonniri baalu aana atootesi soyanno'ne. Magani'ne Kaaliiqi aanno'ne baatto aana maassi'ranno'ne.

⁹ «Magani'ne Kaaliiqi hajajo agadhitinironna doogosi hadhiniro, uyino'ne hexxo garinni qullaawa mannasi asse uurrisanno'ne.

¹⁰ Hakkunni gedensaanni, baattote aana noo gosa baala Kaaliiqi su'minni woshshama'ne affe waajjitanno'ne.

¹¹ Kaaliiqi aa'nera annuwa'nera xaarino baattora godowi'ne guminni, saada'ne qallonninna baatto'ne laalchinni ikkite gattanno jiro aanno'ne.

¹² «Kaaliiqi baatto'nera yannatenni xeena aa'neranna assidhinoonnire baala maassi'ra'nera, xeena amadinoha dancha gordunniha miinju mine fananno'ne. Ki'neno lowo gosara liqiissitinanni ikkinnina ayewiinnino diliqiidhinanni.

¹³ Kaaliiqino sooreeyye ikkinnina maaheeyye diassanno'ne. Techo eemmo'neta Magani'ne Kaaliiqi hajajo seekkitine agadhitiniro, aye woyiteno aliidire ikkinnina woriidire horonta di"ikitinanni.

¹⁴ Wole maganna hoode hadhine insara soqqamatenni techo hajajoommo'ne hajajowiinni ka'anna kawa higginoonte.

HAJAJAMA GIWATENNI DAGGANNO RUMO

¹⁵ «Ikkollana kayinni, Magani'ne Kaaliiqira hajajama giwatenni techo barra eemmo'neta hajajosinna seerasi baala seekkitine agadha gibbiniro, tini rumo baala dagganno'ne; doyissite amaddanno'ne.

¹⁶ «Katamahonna gate'ne assidhinanniri rumamanno.

¹⁷ «Qaldu gidinna qinshanni sagale diatoottanno'ne.

¹⁸ «Godowi'ne gumi, baatto'ne laalchi, lali'ne, ge'reewi'nenna mei'ne dihala'lanno.

¹⁹ «Ea"a'nenninna fula'ne baalantenni rumantinoonnire ikkitinanni.

²⁰ «Kaaliiqa agura'nenni assitinoonni bunshenni kainohunni, co'o yitine rahotenni ba'ina geeshsha, assidhinoonniri baalu aana Kaaliiqi dano, sianna quuxxo abbanno'ne.

²¹ Kaaliiqi martine ragidhinara aanno'ne baatto aaninni hunate jaddote dhibbinni gananno'ne.

²² Kaaliiqi ba'ina geeshsha shotisanno dhibbinni, fooggalunni, darshetenni, moolletenni, shawalletenninna shammetenni gananno'ne.

²³ Umi'nera aleenni noo gordi camo, lekka'nera woroonni noo baatto siwiila ikkitanno'ne.

²⁴ Kaaliiqi baatto'ne xeena bukotenna buluuloho soorranno. Kunino ki'ne hunate gordunni dirranno.

²⁵ «Kaaliiqi diinna'ne qeeltanno'ne gede assanno. Mitte faro higgine dagginanni; lamala faro higgine albinsanni xooqqinanni. Gosa baalate busha lawishsha ikkitinanni.

²⁶ Reeshshi'ne allaattetenna moyichoho sagale ikkanno. Shorre aani'nenni hoolannohu mittuno dihee'ranno.

²⁷ Kaaliiqi Gibitsete soyi fulaattinni gananno'ne. Hurtinannikki madanni, biso mundaatenninna laanshaambetenni hattono bijaajotenni shetisanno'ne.

²⁸ Kaaliiqi macharaarretenni, ballimmatenninna jallaangetenni shetisanno'ne.

²⁹ Barru taalo, tunsote noo ballichi gede malaatunni hadhinanni. Assidhinannihu baalu diqinaanno'ne. Wo'manka woyite okkantinanni; saamantinanni; ha'lanno'nehuno dihee'ranno.

³⁰ «Adhitinara huuccidhinoonnita, wolu amade shollishanno. Mi'nitinoonni minira wolu galanno. Kaasidhinoonni woyineta laalose di"ittinanni.

³¹ Saada'ne ki'ne albaanni gorrantanno; maalansa kayinni di"ittinanni. Harre'nenna ge'reewo'ne wolqatenni adhinanni; qolsiisanno'nehuno dihee'ranno.

³² Labballunna seennu ooso'ne borojju gede allaggaho aamantanno. Anga'ne kayissine hoolate wolqa diafidhinanni. Techo woy ga'a daggannoha lawanna'ne ille'nenni wo'manka woyite doogo la'inanni. Ikkollana assitine affinanniri dino.

³³ Baatto'ne laalchonna daafuro'ne baalanka affinoonnikki gosa ittanno. Mararro nookkiha gadadantine heedhinannita ikkinnina lexxitinanniri dihee'ranno.

³⁴ Konne baala coye la'inanni yannara, wodana kisantinanni.

³⁵ Kaaliiqi lekka'ne culunqichinni kayise, umi'ne dananchi geeshsha hurtannokki madanni biso'ne baala kunni hurannokki dhibbinni gananno'ne.

³⁶ «Kaaliiqi ki'nenna mootoolla'ne assidhinoonnire, ki'nenna annuwa'ne affinoonnikkiwa manni gobba haa're ha'ranno. Hakkiicho martine haqqetenninna kinnatenni seekkinoonni maganna magansidhinanni.

³⁷ Kaaliiqi baatto baalate billaalliseenna'ne heedhinanni yannara, hatte gobbara heedhanno gosa ki'ne aana iillino coye baala la'e bararraaqqannno. Ki'neno arrassitanno'ne; qacifattanno'ne.

³⁸ «Baatto'nera lowo wixa wixidhinanni. Kanchafaru gudanno daafira, shiima gide calla gamba assidhinanni.

³⁹ Woyinete kaashsho kaasidhinanni; seekkitine loosidhinanni. Ikkollana, da'muulchu itanno daafira, laalose gamba diassidhinanni; woyinete xajjeno diwodhitinanni.

⁴⁰ Baatto'ne baalate ejedhete haqqe heedhanno. Ikkollana gumu giggile ba"anno daafira, buudhitinanni zayite diafidhinanni.

⁴¹ Labballonna seenne ooso iltinanni. Ikkollana, diinna'ne qafadde adhite hadhanno daafira, calluwi'ne gattinanni.

⁴² Haqqa'nenna baatto'ne laalcho baala kanchafaru gudanno.

⁴³ «Baatto'nera heedhannori wole gobba manni wolqaataamma ikkitanno. Ki'ne wolqa kayinni barru barrunkunni ajjanno.

⁴⁴ Insa liqiissitanno'ne ikkinnina ki'ne diliqiissitinanninsa. Insa sooreeyye ikkitanno. Ki'ne kayinni maaheeyye ikkitinanni.

⁴⁵ «Tini bao baala ki'ne aana dagganno; horonta ba'ina geeshsha ki'newiinni difaffanno. Kuni ikkannohu ki'ne Magani'ne Kaaliiqira hajajamanna isi uyino'ne seeranna rososi adha gibbinoonnihuraati.

⁴⁶ Kuni coyi baalu ki'neranna sirchi'nera malaatenna maalale ikke hegere geeshsha hee'ranno.

⁴⁷ Magani'ne Kaaliiqi lowo coyinni maassi'rino'ne. Ki'ne kayinni hagiirrunninna owaantetenni disoqqantinoonnisi.

⁴⁸ Kunni ka'a, Kaaliiqi soyanno diinnara borojje ikkitinanni. Co'o yitine ba'ina geeshsha diinna'ne qarrissanno'ne. Wo'mu coyinni qarrantine hudidhinanni; goodhinanni; kallitinanni. Co'o yitine ba'ina geeshsha qambara aani'nenni dihoollanni.

⁴⁹ «Kaaliiqi qaalensa egentinoonnikki gosa, baattote qaccenni allamurchu gede buuwise abbe aana'ne dirrisanno.

⁵⁰ Kuni manni jajjabba diayirrisanno; qaaqquulleno mararannokki kaajjadooti.

⁵¹ Kuni manni gooffina geeshsha lalo'ne, me"e'ne, ge'reewo'nenna baatto'ne laalcho itanno. Huna'ne geeshsha gide'ne haaro woyine ikkito zayite, siitta'ne woy ge'reewi'nehanna mei'ne wilii'le digatisanno'ne.

⁵² Hexxitinannire jajjabba qiinshoonni huxxuwa ubba geeshsha gobba'nera noo katamma baalanta doyissitanno. Magani'ne Kaaliiqi aanno'ne baattora noo katamma baala amaddanno.

⁵³ «Diinna'ne doyissite qarrissanno'ne yannara, shettotenni kainohunni, Magani'ne Kaaliiqi uyino'neriha godowi'ne gumiha ooso'nehanna seenni'ne maala ittinanni.

⁵⁴ Wole agurranna, mereero'ne noohu lowo geeshsha danchanna shaqqado ikkino manchi nafa umisi rodiira woy baxannotera galtesira woy gattino oososirano diaanno.

⁵⁵ Itannohu oososi maali aaninni shiima nafa woleho diaanno. Katamma'ne baalanta doyissite amaddannohura ittinannire hooggine ooso'ne maala calla ittinanni.

⁵⁶ Mereero'ne la'mite lekkatenni bushsha kaxxitannokkiti danchanna shaqqado mancho, baxxannohu ayiddaannisera, oososeranna seennisera diuyitanno.

⁵⁷ Diinna'ne katamma'ne doyissite amadde qarrissanno'ne yannara, giddosenni fulino moyenna iltinota oosose, umise calla ittara maaxidhanno.

⁵⁸ «Kunni maxaafira borreessinoonniha konne seera seekkitine agadha hoogginiro, dhaggennihanna waajjishannoha Magani'ne Kaaliiqi su'ma ayirrisa gibbiniro,

⁵⁹ Kaaliiqi waajjishanno qoomama, qarrisannohanna lowo yannara keeshshanno qoomama, shetisannohanna shiimunni ba'annokki xisso ki'neranna sirchi'ne aana soyanno.

⁶⁰ Waajjitinanniha Gibitsete dhibba baala abbanno'ne. Dhibbuno aani'nenni dika"anno.

⁶¹ Qoleno Kaaliiqi ba'ina geeshsha kunni Seeru Maxaafira borreessinoonnikkiha babbaxxino dhibbanna qarra abbanno'ne.

⁶² Magani'ne Kaaliiqira hajajama gibbinoonnihura, gordu beeddahe gede batidhine heedhinoonniri shiimu manni callu gattinanni.

⁶³ Kaaliiqi ki'ne duroonsatenninna kiiro'ne batisatenni hagiidhinte gede, ki'ne hunatenninna heedhinannikki gede assatenni hagiidhanno. Ragidhinara e'inanni gobbanni buqqisanno'ne.

⁶⁴ «Hakkiinnino Kaaliiqi gobbate qaccenni qaccete geeshsha gosa baalate mereero billaallisanno'ne. Hakkiicho ki'neno annuwa'neno affinoonnikkita haqqetenninna kinnatenni seekkinoonnita wole maganna magansidhinanni.

⁶⁵ Hattenne gosa mereero keere diafidhinanni. Ninkeho yitine fooliishshidhinanni dargi dihee'ranno'ne. Hakkiicho Kaaliiqi qarrissanno hedonna surre, hattono hexxo nookki wodana aanno'ne.

⁶⁶ Wo'manka woyite qarru giddo heedhinanni. Hashshano barrano wodanaho reyo leeltanna'ne yaaddinanni heedhinanni.

⁶⁷ Ille'nenni la'inanniri baalu, masisanno'ne daafira, wodani'nera waajjillu wo'manno. Soodanno woyite, ‹Xa mayi rahella hashsha!› hashshanno woyiteno, ‹Xa mayi rahella sooda!› yitinanni.

⁶⁸ Kaaliiqi galagaltine Gibitsete gobba dihadhinanni yiinoha ikkiro nafa, yowolotenni Gibitse qolanno'ne. Hakkiicho umo'ne diini'nera borojje assitine hirate hasidhinanni. Hidhanno'nehu kayinni dihee'ranno» yii.