MARRO 27 - Qullaawa Maxaafa

GEBAALI ILAALI AANA BORREESSINOONNIHA KAALIIQI SEERA

¹ Muse Israeelete geerri ledo hee're mannaho, «Techo hajajeemmo'neta tenne hajajo baala agadhe.

² Yordaanoosi Waa fultine Magani'ne Kaaliiqi aanno'ne gobba iillitinanni yannara, hatte gobbara nootera shiima seeddaanna kinnara noora buurre.

³ Annuwa'ne Magani Kaaliiqi uyino'ne hexxo garinni, malawunna ado lolakkanno gobba iillitinanni yannara, konne seeranna roso tenne kinna aana borreesse.

⁴ Yordaanoosi Waa fultine heedhinanni yannara, techo hajajoommo'ne garinni tenne kinna Eebaali Ilaali aana uurrisse; aanahono noora buurre.

⁵ Hakkiichono Magani'ne Kaaliiqira kakkallanni darga kinchunni seekke. Kinna siwiilunni bonce seekkinoonke.

⁶ Magani'ne Kaaliiqiha kakkalote darga bonce biifinsoonnikki kinnanni seekke. Hakkiicho Magani'ne Kaaliiqira shilqote kakkalo shiqishshe.

⁷ Mittimmate kakkalo'neno hakkiichira shiqishshe. Ittinanni, Magani'ne Kaaliiqi albaanni hagiidhe.

⁸ Tenne kinna aana konne seera baalanka leellanno gede assitine borreesse» yii.

HAJAJAMA GIWA ABBITANNO RUMO

⁹ Muse Leewaawoota ikkitino qeesooti ledo hee're Israeelete manni baalunkura, «Israeelete manna! Seekkitine macciishshe! Ki'ne techo Magani'ne Kaaliiqi manna ikkitinoonni.

¹⁰ Kunnira, Magani'ne Kaaliiqira hajajamme; techo eemmo'neta hajajosinna seerasino agadhe» yiinsa.

¹¹ Muse hakko barranni manna,

¹² «Yordaanoosi Waa fultinanni yannara, Simiooni, Leewi, Yihudi, Yisaakoori, Yooseefinna Biiniyaami ga're Geriizaani Ilaala fulte Kaaliiqi maasso macciishshitona.

¹³ Roobeeli, Gaadi, Aseeri, Zaabilooni, Daaninna Niftaalemi ga'reno Eebaali Ilaala fulte Kaaliiqi rumo macciishshitona.

¹⁴ «Leewaawootu qoonqonsa naggi assite Israeelete manni baalaho:

¹⁵ «Ogeessu seekkannoha, Kaaliiqi giwannota misile siwiilunni, haqqetenni woy kinnatenni qixxeessi're maaxe wodhannohu rumaminoha ikko. Mannu baalunku, ‹Eewanni ikko!› yoo.

¹⁶ «Annasi woy amasi shollishannohu rumaminoha ikko. Mannu baalunku, ‹Eewanni ikko!› yoo.

¹⁷ «Olliichisi danna xiiwannohu rumaminoha ikko. Mannu baalunku, ‹Eewanni ikko!› yoo.

¹⁸ «Illete afannokkiha doogote aaninni wirri assannohu rumaminoha ikko. Mannu baalunku, ‹Eewanni ikko!› yoo.

¹⁹ «Manni gobba manniha, annunna ama noonsakkirihanna gunnootu halaale beeshshannohu rumaminoha ikko. Mannu baalunku, ‹Eewanni ikko!› yoo.

²⁰ «Annisi galte ledo goxe, annasi shollishannohu rumaminoha ikko. Mannu baalunku, ‹Eewanni ikko!› yoo.

²¹ «Saadate ledo foorannohu rumaminoha ikko. Mannu baalunku, ‹Eewanni ikko!› yoo.

²² «Annisi woy amasi beetto rodoosi ledo foorannohu rumaminoha ikko. Mannu baalunku, ‹Eewanni ikko!› yoo.

²³ «Ballosi ledo foorannohu rumaminoha ikko. Mannu baalunku, ‹Eewanni ikko!› yoo.

²⁴ «Maaxe olliichosi shaannohu rumaminoha ikko. Mannu baalunku, ‹Eewanni ikko!› yoo.

²⁵ «Keeraancho mancho shaara gubbo adhanno manchi rumaminoha ikko. Mannu baalunku, ‹Eewanni ikko!› yoo.

²⁶ «Kunni seerira gobbaanni ikkannohu rumaminoha ikko. Mannu baalunku, ‹Eewanni ikko!› yoo.