MARRO 24 - Qullaawa Maxaafa

GALTE HA'RISATENNA QO'LATE SEERA

¹ «Mittu manchi galte adhiro, adhihu gedensaanni giwisannosi coye aanase afironna hasi'rannosekkiha ikkiro, ha'risate woraqata ee minisinni ha'risa dandaanno.

² Minisinni fultuhu gedensaanni, wolu ayiddaannira assidhuro,

³ layinki ayiddaanniseno hatto albihu gede giwe ha'risate woraqata ee minisinni fushshe ha'risisero woy reyiro,

⁴ hakkunni gedensaanni muttaarise battaabbino daafira galagale adhasera didandaanno. Konne coye Kaaliiqi tiyyi're giwinona, Magani'ne Kaaliiqi iqqa asse aanno'ne baatto aanira cubbo abbitinoonte.

WOLE ADDI ADDI SEERA

⁵ «Mule seenne adhinohu, olaho ha'roonke. Woy wole looso loosanno gede wolqa assinoonke. Mitto diro mine fooliishshi're, galtesi hagiirsiisona.

⁶ «Mittore liqiissitinanni yannara, daamma woy daammi-beetto amadote adhitinoonte. Hatto assa mannu lubbo amadote adhate ledo mittete.

⁷ «Mittu manchi Israeelootu fiixisi giddonni mitto mancho fuge adhe ha're borojjicho assi'riro woy woleho hiriro, hakku manchi reyo. Kunni garinni busha mereeri'nenni hunne.

⁸ «Taraawannohu gogu dhibbi amadanno'ne yannara, ani oommonsa seeri garinni Leewaawoota ikkitino qeesooti kultanno'nere baala assate qixxaabbe.

⁹ Gibitsetenni fultinihu gedensaanni, doogote aana heedhineenna Magani'ne Kaaliiqi Maariyaami aana assinore qaagge.

¹⁰ «Ki'ne giddonni mittichu mittore olliichi'nera liqiissanno woyite, amadote aannosire adhate minisira eoonke.

¹¹ Liqii'ranno manchi amadisiisannore mininni abba geeshsha isi gobbaanni agarona.

¹² Liqii'rannohu buxicho ikkiro, liqiissannohu amadino uddano minesi gashshi'roonke.

¹³ Arrishsho e'ukkinni diphe galanno uddano qolosina; isino maassi'rannosi. Kunino Magani'ne Kaaliiqi albaanni keeraanchimmate kiiramanno'ne.

¹⁴ «Fiixi'ne Israeelenniha ikko katamma'nera hee'rannohu manni gobba manni buxenna gadadame soqqamino'neha hunkeensa ittinoonte.

¹⁵ Buxane ikkitinohura quqquxamatenni agadhitannona, hunkeensa hakko barranni, arrishsho e'ukkinni uuyyensa. Hatto ikka hoogiro kayinni, Kaaliiqiwa higge raarte cubbo abbitanno'ne.

¹⁶ «Annanna ama oosonsa daafira, oosono annunna amate daafira shinoonke. Annu annunku umisi cubbi daafira reyona.

¹⁷ «Manni gobba mannira woy annu nookki oosora halaale beeshshitinoonte. Gunnittete imaana amadote adhitinoonte.

¹⁸ Ki'neno Gibitsete borojje ikkitine heedhinoonnitanna Magani'ne Kaaliiqi hakkiinni wode abbino'neta qaagge. Togo assitinanni gede hajajoommo'nehu kunniraati.

¹⁹ «Loosidhinoonni gide gamba assidhinanni yannara, qarmete habbinoonni gidi hee'riro, adhitinara galagaltine higginoonte. Magani'ne Kaaliiqi loosidhinoonniha baalanka maassi'ranno'ne gede, qarmete habbinoonni gide manni gobba manni, anna afidhinokki oosonna gunnootu adhona agurre.

²⁰ Ejedhete laalo dirrisidhinanni yannara, sinnate aana gattinota xinqidhinara galagaltine hadhinoonte. Konneno wole gobba mannira, annu nookki oosoranna gunnootaho agurrensa.

²¹ Woyinete laalo gamba assidhinanni yannara, sinnate aana gatinoha xinqidhinara galagaltine hadhinoonte. Gatinoha wole gobba mannira, annu nookki oosoranna gunnootaho agurrensa.

²² Ki'ne Gibitsete gobbara borojje ikkitinoonnita qaagge. Togo assitinanni gede hajajoommo'nehu kunniraati.