MARRO 20 - Qullaawa Maxaafa

OLU DAAFIRA UYINOONNI BIDDISHSHA

¹ «Diinna'ne qassinara olaho fultinanni yannara, faradi gaarensanna faradinsa ki'nerinni roore leelli'nero nafa waajjitinoonte. Gibitsetenni fushshino'nehu Magani'ne Kaaliiqi ki'ne ledo no.

² Ola hanaffinara albaanni, qeesichu olantote albaanni sae,

³ ‹Israeele macciishshe! Techo diinna'ne ledo ola hanaffinanniha ikkino daafira, wodani'ne masoonke; waajjitinoonte. Diinna'ne albaanni shoondartinoonte.

⁴ Magani'ne Kaaliiqi ki'ne ledo olaho fule olamanno daafira qeelle afidhinanni› yee coyi'rona.

⁵ «Olantote hajajaano, ‹Haaro mine mi'ne imaansiisi'rinokkihu hee'riro, minisira galagale higo. Hatto ikka hoogiro, olu giddo reenna minesi wolu manchi imaansiisanno.

⁶ Woyine kaasi're laalose itinokki manchi hee'riro, minisira galagale higo. Hatto ikka hoogiro, olu giddo reenna woyinesi laalo wolu itanno.

⁷ Seenne huucci're adhikkinni dayinohu hee'riro minisira higo. Hatto ikka hoogiro olu giddo reenna huucci'rino beetto wolu adhanno› yitu.

⁸ Qolteno, ‹Goonte afi'rinokkihu woy wodana shashino manchi hee'riro, ledosi noorira wolqa hunannokki gede minisira higo› yite coyidhona.

⁹ «Olantote hajajaano konne coye coyidhe ka'uhu gedensaanni, mitte mitte gaamora sooreessa wortona.

¹⁰ «Mitto katama qasate gaaddinanni yannara, balaxxine hakko katamira hee'ranno manni keerunni anga aanno gede asse.

¹¹ Kataminsa waalcho fante haadhu'neronna keerunni anga uyituro, mannu wo'munku ki'ne borojje ikke, wolqate looso looso'nena.

¹² Keerunni anga aa gibbe ola doodhituro, katamansa doyissitine amadde.

¹³ Magani'ne Kaaliiqi anga'nera sayise aanno'ne yannara, kataminsa giddo heedhanno labballo baala shitine gudde.

¹⁴ Meentonna qaaqquulle kayinni, qafaddine borojje assidhe; saadanna katamu giddonni afidhinannire baala umi'neha assidhe. Magani'ne Kaaliiqi diinna'newiinni aanno'ne qafado umi'ne qiniite assi'ra dandiitinanni.

¹⁵ Mule'ne noo gosata ikkitukkinni faffe noo katamma hatto assitinanni.

¹⁶ «Ikkollana, Magani'ne Kaaliiqi iqqa asse aanno'ne katamma dagannite giddonni mittorichono gatissinikkinni shiiyye.

¹⁷ Hitoota, Amooraawoota, Kana"aanoota, Ferizoota, Hiwootanna Iyaabuusoota Magani'ne Kaaliiqi hajajino'ne garinni co'o assitine gudde.

¹⁸ Insa shaa hoogginiro magannansa magansidhanno gara rosiisseenna'ne, Magani'ne Kaaliiqi aana cubbo loossinanni.

¹⁹ «Mitto katama gaarantine amadate seeda yanna adhi'nero nafa, laalanno haqqa murtinoonte. Haqqu diina'ne ikkinokki daafira, laalosi ita dandiitinanni.

²⁰ Ikkollana, guma laalannokki haqqa affiniro, murtine gaarantinanni katama qeeltina geeshsha doyisse amadate shaenna taqa seekki'ra dandiitinanni.