MARRO 17 - Qullaawa Maxaafa

¹ «Muso woy xe'ne afidhino saada woy ge'reewo Magani'ne Kaaliiqi dibaxannona isira kakkaltinoonte.

² «Kaaliiqi aanno'ne katammara ledo'ne hee'rannohu labbaahu woy meyati gondooro diigatenni Magani'ne Kaaliiqi albaanni bunshe assituro,

³ hooloommorira wole magannara yaano arrishshote woy aganaho woy gordu beeddahera soqqantannohanna magansidhannoha ikkiro,

⁴ ki'neno tenne ikkito macciishshitiniro, coye seekkitine buuxxe. Yinoonniri adda ikkironna hattoohu battete coyi Israeelete giddo noota buuxxiniro,

⁵ konne busha coye assinoha labbaaha ikko meyata katamu waalchira gobbaanni massitine, reyita geeshsha kinnatenni awwaalle.

⁶ «Reyo maltinosihu, lamu woy rooru manni naqqasihu gedensaanni reyona. Mittu manchi callu naqqaseenna aye manchono shinoonke.

⁷ Shinanni woyite kinnatenni balaxxe naqaashshe gantona; hakkiinni aanche wolu manni awwaalona. Kunni garinni busha mereeri'nenni hunne.

QARRISANNO COYI YOO

⁸ «Jajju annimma daafira woy mannimmate gawajjamara, woy anfannino ikko danotenni manna shinoonni coye coyi'ra moronsiissannota ikkitara dandiitanno. Hattoo coyi xaadanno'ne yannara, Magani'ne Kaaliiqi doodhanno dargira martine,

⁹ Leewaawoota ikkitino qeesootiwanna hatte yanna daanyichiwa martine coye kultineenna, assate hasiisannore kultanno'ne.

¹⁰ Ki'neno insa Kaaliiqi doodhino darga heedhe kultanno'ne coye seekkitine asse.

¹¹ Insa rosiissanno'ne seerinninna uyitanno'ne hajajo garinni gudde. Insa uyitanno'ne hajajowiinni wirri yitinoonte.

¹² Magani'ne Kaaliiqi albaanni hakkiicho soqqanshote uurrannoha qeesicha woy daanya mishannoha shinona. Kunni garinni Israeelete manni mereerinni busha hunne.

¹³ Mannu baalu konne macciishshanno woyite waajjanno. Hakkunni gedensaanni, hattoo seyanyooti dihee'ranno.

MOOTE MOOHINSANNI GARA

¹⁴ «Magani'ne Kaaliiqi aanno'ne baatto iillitinanni yannara, ragidhinanninna heedhinanni baattora, ‹Gaangaawinkera noo daga gede, ninkeno moote hasi'neemmo› yitiniro,

¹⁵ Magani'ne Kaaliiqi dooranno moote moohisidhinanni. Umi'ne roduuwi mereerinni ikkinnina, Israeelicha ikkinokkiha allaggicho moohisidhinoonte.

¹⁶ «Mootete olantora lowo faradi hee'roonkensa. Farado hidhateno manna qole Gibitse soonke; Kaaliiqi hakkiichira hingannikki gede hajajino.

¹⁷ Kaaliiqiwiinni xeertisannosina lowo meento adhoonke; lowo birranna culka batise duu'noonke.

¹⁸ «Gashshootu barcimi ayirrinyunnihura ofollanno yannara, qeesootu anga noo seera wolu maxaafira galchine isirano uyinosina.

¹⁹ Maganosi Kaaliiqa ayirrisa rosanno gede, kunni seeri giddo noo hajajo baalantanna tenne woga seekke agadhanno gede mulisinni faffoonke. Heeshshosi diri baalunkunni nabbawona.

²⁰ Isinna sirchisi Israeelete manna seeda diro gashshitanno gede, mayi garinnino seeruwiinni wirri yoonke. Umosino wolootu Israeelootinni roore woyyinoha asse kiiroonke.