MARRO 15 - Qullaawa Maxaafa

ASALE AGURRANNI DIRO

¹ «Lamalki lamalki diri goofimarchira liqiissitinoonnirira asale agurrensa.

² Assa hasiissannohu: Mittu mittunku liqii'rino Israeelichira asale agurresi. Kaaliiqi asale agurranni gede lallawinona, liqiissannohu gobbasi mancho asale yaa'noonke.

³ Manni mannira liqiissitinoonniha yaa'na dandiitinanni. Roduuwi'nera liqiissitinoonniha baala kayinni agurrensa.

⁴ «Magani'ne Kaaliiqi ragidhinara aanno'ne baatto aana maassi'ranno'ne daafira, mereero'ne buxichu dihee'ranno.

⁵ Kuni ikkannohu Magani'ne Kaaliiqira hajajantinironna, techo hajajoommo'nere baala seekkitine agadhitinirooti.

⁶ Magani'ne Kaaliiqi uyino'ne hexxo garinni maassi'ranno'ne daafira, ki'ne lowo gosara liqiissitinannita ikkinnina ayewiinnino diliqiidhinanni. Lowo gosara aliidire ikkitinanni. Insa ki'nera aliidire di"ikkitanno.

⁷ «Magani'ne Kaaliiqi aanno'ne baatto aana noo katamma mittu giddono buxichu hee'riro, buxichu rodii'nera qakkinoontesi; woy anga huru'mitinoontesi.

⁸ Anga hiixattesi; hasiisannosire baala liqiissesi.

⁹ ‹Asale agurrannihu lamalki diri iillino› yitannoti busha hedo galteenna'ne qarraataamu rodii'nera kaajjitinannikki gedenna, mittoreno uyitinisikkinni gattinannikki gede, isino Kaaliiqira ku'leenna saote kiiranno'nekki gede qorophe!

¹⁰ Uyitinannire shooshanqetenni uuyyesi ikkinnina honqooqoo'mitinoonte. Kunninni kainohunni Magani'ne Kaaliiqi loosidhinoonnihanna anga'ne amaddinoha baala maassi'ranno'ne.

¹¹ Baattote aana buxane aye yannarano dihoogganno. Kunnira, hakko heedhannorira buxanetenna qarraataammu roduuwi'nera anga'ne hiixattinanninsa gede hajajeemmo'ne.

MANNA BOROJJIMMATENNI FUSHSHINANNI GARA

¹² «Fiixa'ne ikkinori meya woy labbaa Ibiraawooti lee diro hirame soqqami'nero, lamalki diro borojjimmatenni fushshensa.

¹³ Borojjimmatenni fushshitinanninsa yannara, mulla anganni ha'rissinoontensa.

¹⁴ Magani'ne Kaaliiqi uyino'ne jiro deerrinni me"enna ge'reewo, gidenna woyine'ne marartinikkinni uuyyensa.

¹⁵ Ki'ne umi'ne Gibitsete gobbara borojje ikkitine heedhinoonnitanna Magani'ne Kaaliiqi wode haa'rino'neta qaagge. Techo tenne hajajo eemmo'nehu kunni daafiraati.

¹⁶ «Ikkollana, borojji'ne qawaaxxissinoonninsa daafira, ki'nenna mini'ne manna baxe ha'rate hasi'ra hoogiro,

¹⁷ macca mini'ne waalchira irkissine gontimunni qassinanni. Hakkunni gedensaanni, dironsa baala borojje'ne ikkite heedhanno. Meya borojje'neno hattonni asse.

¹⁸ «Borojjimmatenni fushsha ayirrino coye lawoonke'ne. Mittu loosaasinchira baantanniha darate calla baanteennasi 6 diro wo'ma soqqamino'nehura, assitinanni coyi baalaho Magani'ne Kaaliiqi maassi'ranno'ne.

UMO QALANTANNO SAADA SEERA

¹⁹ «Lalu giddonni umo qalamino booto, ge'reewunna meu giddonni umo qalamino goco baala Magani'ne Kaaliiqira shiqishshe. Umo qalamino booto hawuudhitinoonte. Umo qalamino ge'rechi ordano haxxinoonte.

²⁰ Hakkiicho isi doorino darga ki'nenna maate'ne diru dirunkunni Magani'ne Kaaliiqi albaanni gorritine ittinanni.

²¹ Tini saada muso afidhinota ikkituro, naafimma, ballimma, woy additi lowo xe'ne noonsare ikkituro, Magani'ne Kaaliiqira kakkaltinoonte.

²² Hattoo saada mine'ne ita dandiitinanni. Wogate garinni keeraa'minohu ikko keeraa'minokkihu geedimonna bulaa itannonte gede ita dandaanno.

²³ Mundee kayinni, wayi gede baattote aana dunne ikkinnina agginoonte.