MARRO 14 - Qullaawa Maxaafa

HOOLLOONNI WI'LA

¹ «Ki'ne Magani'ne Kaaliiqi oosootina, reyino mannira biso'ne huduuxxitinoonte. Umono meexxitinoonte.

² Ki'ne Magani'ne Kaaliiqira qullaawa mannaati. Isira baxxitinoonni manna ikkitinara Kaaliiqi baattote aani gosa baalate giddonni doodhino'ne.

INTANNINNA INTANNIKKI SAADA

³ «Batte ikkinoricho ittinoonte.

⁴ Kunninni aante noo saada: Booto, ge'recho, meicho,

⁵ bulaa, geedimo, reerre, goda, bullicha, gaarraancho,

⁶ culunqa dadhantinotanna haancidhanno saada baala ittinara fajjinoonni'ne.

⁷ Haancidhanno woy culunqa dadhantino saada giddonni gaala, hilleessanna weceece ittinoonte. Insa haanci'rannore ikkiro nafa, culunqinsa dadhaminokki daafira, seeru garinni ki'nera battete.

⁸ Manchaameno battete; culunqa dadhantinota nafa ikkituro, haancidhannokki daafira, ki'nera battete. Kuri maala ittinoonte; raqensano kissinoonte.

⁹ «Wayi giddo hee'ranno kalaqama qoolanna goga afi'rinore baalanka itte.

¹⁰ Ki'nera battetena, qoolunna gogu noonsakkire ittinoonte.

¹¹ «Batte ikkitinokki cea baala ita dandiitinanni.

^12-18 Aante noori kayinni intannikkireeti. Insano: Allamurcho, awulcho, bajja, tillaallo, bodde haraqeessa, allaatte, haraqeeyye baala, balguda, shaallo, udumo, risa, afoo seeda bajja, qo'laante, waa-lixe, daakiyye, huummo, rumicha, shaallo baala, guuti-wobbo, rarraattete.

¹⁹ «Qoola afi'rino duuxi baalu ki'nera battete. Hakkoreno ittinoonte.

²⁰ Batte ikkinokkiha qoola afi'rinore kayinni itte.

²¹ «Ki'ne, Magani'ne Kaaliiqira qullaawa mannaatina reyinore baala ittinoonte. Katamma'ne giddo hee'rannohura manni gobba mannira itona uuyyensa; woy wole gobba mannira hirre. Meu woy ge'reewu wilii'licho amate adonni gaffinoonte.

TONNUNNI MITTO AATE SEERA

²² «Diru dirunkunni loosidhine afidhinoonni gidinni tonnunni mitte anga baddine worre.

²³ Aye yannarano Magano'ne Kaaliiqa ayirrisa rossinanni gede gidunniha, haaro woyinete xajjehanna zayite'neha tonnunni mitte anga, lalunniha, ge'reewunnihanna meunniha umo qalaminoha su'misi woshshamanno gede doodhanno dargira abbitine, Magani'ne Kaaliiqi albaanni ittenna agge.

²⁴ Ikkollana, Magani'ne Kaaliiqi maassi'rino'nehu giddonni haadhine massate, doogo xeertidhu'neronna Kaaliiqi magansi'nasira doodhanno dargi ki'newiinni lowo geeshsha fafeenna tonnunni mitto hakkiira iillisha hoogginiro,

²⁵ uyitinanniha woxeho soorre. Woxeno Magani'ne Kaaliiqi doodhanno dargira anga'nenni haadhine abbe.

²⁶ Woxunni baxisino'nere baalanka lalo, ge'reewo, woyinete xajje woy wole ago woy hasidhinanniha jawaata ago baalanka hidhe. Hakkunni gedensaanni, ki'nenna mini'ne manni Magani'ne Kaaliiqi albaanni hakkiicho ittinanni hagiidhe.

²⁷ Uminsa qeechi noonsakki daafira, katamma'nera heedhanno Leewaawoota towattensa.

²⁸ «Sayikki sayikki diri goofimarchira, hakko diri gidinni tonnunni mitte anga wo'manka fushshitine katamma'nera duunne.

²⁹ Konne assitinannihu uminsa qeecha woy iqqa afidhinokkiri Leewaawootunna manni gobba manni katamma'nera heedhannori annunna ama noonsakkirinna gunnootu daye ite duuwanno gedeeti. Ki'nerano Magani'ne Kaaliiqi assidhinoonnire baala maassi'ranno'ne.