MARRO 13 - Qullaawa Maxaafa

¹ «Himanaanchu woy haaqii'raanchu mereeri'nenni kae, malaate woy dhagge asseemmo yii'nero,

² coyi'rinohu malaatu woy dhagge wo'mituro nafa, ‹Ki'ne affinoonnikki maganna magansi'no› yaanno'neha ikkiro,

³ Magani'ne Kaaliiqi wo'mu wodani'nenninna wo'ma lubbo'nenni baxxinannisi gedeenni jife la"a'nera assino coye ikkino daafira, hakkunni himanaanchinna haaqii'raanchi coye macciishshitinoonte.

⁴ Magani'ne Kaaliiqi hoode hadhe. Ayirrissesi; hajajosino agadhe. Hajajammesi; soqqammesi. Isi ledo mitto ikke.

⁵ Gibitsete gobbanni borojjimmatenni wode fushshino'nehu Magani'ne Kaaliiqi aana bunshe assitinanni gede kayisanno'ne. Magani'ne Kaaliiqi doogonni wirri yitinanni gede assanno'nena, konne himanaanchonna haaqii'raancho shinona. Kunni garinni busha mereeri'nenni hunne.

⁶ «Rodiikki, oosokki, woy baxattoti galtekki woy lubbote jaalikki, maaxame atewa daye atinna ate annuwa affinoonnikkita kaphu maganna magansi'ratto gede so'risiisahera wo'naaliro,

⁷ muleno ikko xeertowa, gobbate qaccenni qaccete geeshsha gaangaawikkira noo daga maganna magansi'no yiihero,

⁸ maahoyye yitooti; yiinore macciishshitooti; marartootisi; bunshesino maaxxooti.

⁹ Huluullamittokkinni hakkonne mancho shii. Iso shaate umi kincho ati oli. Hakkunni gedensaanni, mannu baalunku kinnatenni gane shoona.

¹⁰ Borojjimmatenni Gibitsete gobbanni fushshino'nehu Magani'ne Kaaliiqiwiinni huna'nera hasi'rinona, reya geeshsha kinnatenni ganne.

¹¹ Hakkunni gedensaanni, Israeelete manni baalunku konne coye macciishshe waajjanno. Ayino mereero'ne togooha busha coye layinkimeeshsho diassanno.

¹² «Magani'ne Kaaliiqi heedhinara aanno'ne katamma giddo mittu nafa togoo coye assanno yinanna macciishshitiniro,

¹³ mereeri'nenni bushu manni kae ki'ne affinoonnikkita kaphu maganna ha'ne magansi'no yaanni mittu katami manna so'risiisannoha ikkiro,

¹⁴ konne coye hasiisanno garinni ha'runsitine buuxxe. Kuni makki'nanni coyi mereero'ne ikkasi adda ikkituro,

¹⁵ hakko katamira hee'ranno mannanna saada baala shitine gudde; katamansano co'o assitine hunne.

¹⁶ Hakko kataminni qafaddine haadhinoonni uduunne baala songote xawira gamba asse. Katamanna giddosinni gamba assitinoonnire Magani'ne Kaaliiqira shilqote kakkalo assitine shiqishshe. Layinkimeeshsho minamannokki gede diigaminowa gatanno gede asse.

¹⁷ Kaaliiqi kaajjadu hanqisinni higanno gede, batte ikkinorichi giddonni mittore nafa adhitinoonte. Isino maarosi leellishanno'ne; mararanno'ne. Annuwa'nera uyino hexxo garinni kiiro'ne batisanno gede,

¹⁸ techo ani eemmo'neta hajajosi baalanta agadhitinanninna isi hasi'rannore baala wonshitinanni Magani'ne Kaaliiqi albaanni dancha coye asse.