MARRO 11 - Qullaawa Maxaafa

KAALIIQI JAWIMMA

¹ «Kunnira, Magano'ne Kaaliiqa baxxe. Wodhosi, wogasi, seerasinna hajajosi wo'manka woyite agadhe.

² Magani'ne Kaaliiqi seejjo, xirchosi, jawaata angasinna wolqaataame cigilesi affinorinna rossinori ooso'ne ikkitukkinni ki'ne ikkitinoonnita techo qaagge.

³ Gibitse, mootensa Feriooninna gobbansa baala shetisino garanna loosino dhagge affinoonni.

⁴ Gibitsootu olanto, faradinsanna faradi gaarensa shorritu'ne yannara, Kaaliiqi Duumu Baarira egemmisiisinsatanna co'o asse huninsa gara qaagge.

⁵ Halallitte gobbanni ka'ine kawiira iillitini geeshsha, assino'nere ki'ne affinoonni.

⁶ Roobeeli ga'renni Eeliyaabi ooso Daataaninna Aberooni maatensa, dukkaninsanna soqqamaanonsa baala saadansa ledo mittu mittunku albaanni baatto dadhante egemmitu gara affinoonni.

⁷ Kaaliiqi assino coye baalanka ille'nenni la'inoonniri ki'neeti.

HEXXOTE GOBBARA NOO ATOOTE

⁸ «Techo ani eemmo'ne hajajo baala agadhitiniro, Yordaanoosi tayissine fulatenna baatto ragi'rate wolqa afidhinanni.

⁹ Hakkunni gedensaanni, Kaaliiqi annuwa'neranna sirchinsara aara xaarinotera, hattenne malawunna ado lolakkanno baattora seeda diro heedhinanni.

¹⁰ Martine ragidhinanni baatto agurtine fultini gobba Gibitsennite gede wixidhinoonni gidira waa hayikkisidhinanni daafurtinannikkitenna kaashshoho nafa qarrantinannikkite.

¹¹ Martine ragidhinanni baatto gordu xeena aggannote; ilaallanna lagga noose baattooti.

¹² Tini baatto Magani'ne Kaaliiqi agarannosete. Wogga baalantera isi ille horonta dibaxxitannose.

¹³ «Techo ani oommo'ne hajajo ammanamatenni agadhitiniro, Magano'ne Kaaliiqa baxxinironna wo'mu wodani'nenninna wo'ma lubbo'nenni soqqantinisiro,

¹⁴ gide, haaro woyinenna zayite gamba assidhinanni gede badheessinna hawadi xeena baatto'nera yanna yannasira aanno'ne.

¹⁵ Saada'ne ittanno hayisso xawoho afidhanno. Ki'nerano ittine duubbinanni geeshshi sagale aanno'ne.

¹⁶ «Kaaliiqiwiinni faffine wole gobba maganna magansidhinannikki gedenna insara kumbuultinannikki gede agadhe.

¹⁷ Konne coye assitiniro Kaaliiqi hanqi aana'ne buwanno. Isino xeena ganannokki gede, baattono guma uyitannokki gede gordo cufanno. Ki'neno Kaaliiqi aanno'netenni dancha baattonni hakkawoyintenni ba'inanni.

¹⁸ «Konne qaale'ya, wodani'neranna surre'nera wodhe; malaate assidhine anga'nera xaaxidhe; albi'nerano usudhe.

¹⁹ Mine ofoltinanni woyite, doogo hadhinanni woyite, goxxinanninna ka'inanni woyiteno ooso'nera kultinanni rosiissensa.

²⁰ Mini'ne tanqiranna katami'ne huxxi waalchira borreessidhe.

²¹ Hatto assitiniro, Kaaliiqi annuwa'nera aara xaarino baattora ki'nenna ooso'ne baattote aleenni noo gordi hee'ranno geeshsha heedhinanni.

²² «Magano'ne Kaaliiqa baxxinanni gede, doogosi aana hadhinanni gedenna isi ledo mitto ikkitine heedhinanni gede oommo'neta tenne hajajo baalanta seekkitine agadhe.

²³ Hakkunni gedensaanni, Kaaliiqi tenne daga albi'nenni hoolanno. Ki'neno, ki'ne roortinota jawanna jawaata daga shorritine baattonsa ragidhinanni.

²⁴ Lekka'nenni kaddinanni dargi baalunku ki'neha ikkanno. Gashshooti'neno wodiidoonni halallitte baatto, aliyyeenni Libaanoosi Ilaali, soojjaatoonni Efiraaxisi Wayi, galchimaanni Mediteraaniyu Baari geeshsha iillanno.

²⁵ Ayino ittisa'nera didandaanno. Magani'ne Kaaliiqi uyino'ne hexxo garinni martinanni gobba baalate masissinannirenna waajjinannire assanno'ne.

²⁶ «Kune, techo ani doodhitinanni gede rumonna maasso alba'neenni woreemmo.

²⁷ Techo eemmo'neta Magani'ne Kaaliiqi hajajo wonshitiniro maasso afidhinanni.

²⁸ Magani'ne Kaaliiqi hajajo wonsha hoogginiro, affinoonnikkita wole maganna ha'runsitinironna ani hajajoommo'ne doogonni fultiniro rumantinanni.

²⁹ Magani'ne Kaaliiqi ragidhinara haa're massanno'ne baatto iillitinanni yannara, Geriizaani Ilaalira heedhine maasso, Gebaali Ilaalira heedhine rumo lallabbinanni.

³⁰ Tini ilaalla Yordaanoosi Lagira Kana"aanootu gashshootira Yordaanoosi Wayira galchimaanni Galgalaho albaanni qullaawa haqqe Morete mule no.

³¹ Magani'ne Kaaliiqi aanno'ne baatto Yordaanoosi fultine ragidhine heedhinanni yannara,

³² techo ani alba'neenni woroommota woganna seera seekkitine agadhe.