MARRO 10 - Qullaawa Maxaafa

MUSE TONNE HAJAJO LAYINKIMEESHSHO HAA'RI

¹ «Hakkunni gedensaanni Kaaliiqi, ‹Albiri gedeere 2 bocame kinna qixxeessite haqqetenni saaxine seekkite anewa ilaalu iimira amo.

² Ati hiiqqite hunitto kinna aana noo qaale tenne kinna aana ani galagalche borreesseenna, saaxinete giddo worattona› yiinoe.

³ «Kunnira, baatete haqqichinni saaxine seekkoommo; albiri gedeere 2 bocame kinnano seekkoommo. Lamenta bocame kinna anga haa're ilaalu iimira fuloommo.

⁴ Kaaliiqi alba xaadu barra giirate giddo hee're ki'nera coyi'rino'neta alba borreessinota tonnenta hajajo tenne bocame kinna aana borreessino. Kaaliiqi tenne bocame kinna anera uyino.

⁵ Anino ilaalu aaninni galagale dirroommo. Kaaliiqi hajajinoe garinni seekkoommo saaxine giddo bocame kinna woroommo. Tini bocame kinnano xaa geeshsha hakkiicho no» yii.

⁶ (Israeele Yaqaani gosa untino bale wayinnitewiinni ka'e, Moseera yinanniwa martu. Aarooni hakkiicho reenna madaarroonnisi. Beettisi Aliaazaarino isi darga qeesicha ikki.

⁷ Hakkiinnino ka'e Gudigooda yinanniwa martu. Qolteno wayi fulannowa Yoxibaata yinanniwa martu.

⁸ Hatte yannara, Kaaliiqi Gondooru Taaboota dukkanno gede, soqqantasira albasiinni uurritanno gedenna mannu maassamanno gede huuccitara Kaaliiqi Leewi ga're doorino. Techo geeshsha Leewi ilamati soqqanshonsa tenneeti.

⁹ Leewaawootaho roduuwinsa mereero beehachu woy baattote iqqi noonsakkihu kunniraati. Magani'ne Kaaliiqi kulinonsa garinni iqqinsa Kaaliiqaati.)

¹⁰ Qoleno Muse, «Anino albinte gede, ilaalu aana huuccanni 40 hashshanna 40 barra keeshshoommo. Kaaliiqino huuccatto'ya macciishshinoe; ki'ne huneemmo yiinotano agurino.

¹¹ Hakkunni gedensaanni Kaaliiqi, ‹Annuwane'ra aara xaarino gobba iillitinanni gede albisammo'nera soyinoe› yii.

KAALIIQI AYIRRINSASIRA HASI'RANNO

¹² «Xaano Israeelete manna, Magani'ne Kaaliiqi ki'ne ayyirrissinannisi gede, doogosi baala hadhinanni gede, baxxinannisi gede, wo'mu wodani'nenninna wo'ma lubbo'nenni soqqantinannisi gede hasi'ranno.

¹³ Seyanno'ne gede techo ani eemmo'ne hajajonna woga baalanta agadha hasiissanno'ne.

¹⁴ «Gordunna gordoho aleenni noo gordi, baattonna aanase noori baalu Magani'ne Kaaliiqiho.

¹⁵ Kaaliiqi annuwa'ne wodanisinni gudise baxinonsahura, sirchonsa ikkitinoonnire ki'ne dagate mereerinni dooreenna'ne techo geeshsha ki'ne isi mannaati.

¹⁶ Kunni daafira, wodana co'o yitine keeraa'me; kakkachimma'neno agurre.

¹⁷ Magani'ne Kaaliiqi magannate Maganooti; mootoollate Mootichaati. Jawa Maganooti; wolqaataamohonna waajjishannoho. Godowa dihosannoho; gubbono di"itannoho.

¹⁸ Isi annanna ama afidhinokkiriranna gunnootaho coyi'rannonsa. Manninke ledo hee'rannoha manni gobba mannano sagalenna imaana aanni towatannonsa.

¹⁹ Ki'neno Gibitsete gobbara heedhinoonni yannara manni gobba mannaatina, wole gobbanni dayino manna towattensa.

²⁰ Magano'ne Kaaliiqa ayirrisse; magansidhesi. Isi ledo ammanamatenni heedhe. Isi su'mi callunni xaarre.

²¹ Konne ille'nenni la'iniha jawanna waajjishanno coye assino'nehu Magani'ne isootina galattesi.

²² Annuwa'ne Gibitse dirritu yannara 70 manna callaho. Xa kayinni Magani'ne Kaaliiqi gordu beeddahe gede batisino'ne.