MAATEWOOSI 4 - Qullaawa Maxaafa

YESUUSI JIFAMA

¹ Hakkunni gedensaanni Sheexaanu jifannosi gede, Qullaawu Ayyaani Yesuusa halalli gobba qole haa're ha'risi.

² Hakkiicho shoyilloo barranna shoyilloo hashsha itikkinni keeshshe hudi'ri.

³ Hatte yannara jifannohu Yesuusiwa daye, «Hanni ati Maganu Beettootiro, tini kinna timma ikkitanno gede hajaji!» yiisi.

⁴ Yesuusi kayinni, «‹Mannu Maganu afiinni fulanno qaali baalunni ikkinnina, sagale callatenni dihee'ranno› yine borreessinoonni» yee dawarisi.

⁵ Hakkunni gedensaanni, Sheexaanu Yesuusa Qullaawa Katama Yerusaalame masse Qullaawu Mini guunxo iimira fushshe uurrise,

⁶ «‹Lekkakki kinchu gane gawajjannohekki gede, angansa woroonni worte irkissahera, Maganu sokkaasinesi hajajannohe› yine borreessinoonnina, hanni ati Maganu Beetto ikkoottoro kawiichinni umokki eela qolte tugi!» yiisi.

⁷ Yesuusi qole, «‹Mooticha Maganokki jiffooti!› yineno borreessinoonni» yiisi.

⁸ Sheexaanu lede Yesuusa lowo geeshsha seedu ilaali iimira haa're fushshe, alamete gashshooti ayirrinye baala leellishe,

⁹ «Anera kumbuulittoero konne baala eemmohe» yiisi.

¹⁰ Hatte yannara Yesuusi, «‹Mootichu Maganikkira kumbuuli; iso calla magansi'ri!› yine borreessinoonnina, ati Sheexaanu anewiinni fafi!» yiisi.

¹¹ Hakkunni gedensaanni Sheexaanu Yesuusa agure ha'reenna, sokkaasine dagge towattusi.

YESUUSI GALIILAHO ROSIISA HANAFI

¹² Yesuusi Yohaannisi usuraminota macciishshe,

¹³ Naaziretete Katama agure, Zaabilooninna Nifitaalemi gobbara Galiilu Wayi mule noo katama Qifirinahoomi ha'ri.

¹⁴ Kuni ikkinohu himanaanchu Isayaasi,

¹⁵ «Baarunniwa massitanno doogoranna Yordaanoosi Wayira widoonni heedhannori, Zaabilooninna Nifitaalemi gobba, amma'nitinokki daga Galiilunniti,

¹⁶ tunsote hee'ranno manni, lowo xawaabba lai. Reyote caali gobbara heedhannorira caabbichu fuli» yee himanino himani wo'manno gedeeti.

¹⁷ Hatte yannanni kayise Yesuusi, «Gordu Gashshooti gambisinona, cubbo'ne aagintaabbe!» yaanni rosiisa hanafi.

YESUUSI QULXU'ME WOSHSHAADDANNORE SHOOLE MANNA WOSHSHI

¹⁸ Yesuusi Galiilu Baari muleenni hige sa"anni hee're lame roduuwa Pheexiroosi yiniha Simiooninna rodoosi Indiriyaasi afi. Insa qulxu'me woshshaaxxate woshshaadonsa baaru giddo tugge no.

¹⁹ Yesuusino, «Ane hoode amme, ani manna woshshaaddinanni gede asseemmo'nena!» yiinsa.

²⁰ Insano hakkawoyintenni woshshaadonsa agurte isi hoode hadhu.

²¹ Hakkiinni shiimare sae, lame roduuwa Zebidewoosi ooso Yaiqoobinna Yohaannisi afi. Insa anninsa Zebidewoosi ledo yowolote aana heedhe woshshaadonsa biddi assidhanni noore afe woshshinsa.

²² Insano hakkawoyintenni annansanna yowolo agurte Yesuusi hoode hadhu.

YESUUSI DHIWAMAASINE HURSI

²³ Yesuusi Ayihudete xaadi mine rosiisanninna gordu Gashshootiha Dancha Duduwo kulanni, addi addi dhibbinni amadamino manna hursanni Galiilu gobba baala tuqi.

²⁴ Duduwisi Sooriyu gobba baala iillino daafira, addi addi dhibbinninna dhiddonni qarrantinore, durriisu ganinore, hawwunatu noonsarenna laanshaabbinore baala Yesuusiwa haadhe abbitu; isino baalanka hursi.

²⁵ Galiilu gobbanninna Tonne Katammanni, Yerusaalametenni, Yihudunninna Yordaanoosi Wayi widiidinni dayinohu lowo manni Yesuusi hoode ha'ri.