MAATEWOOSI 28 - Qullaawa Maxaafa

YESUUSI REYOTENNI KAI

¹ Ayihudete Fooliishsho Barri saihu gedensaanni lamalate umi barra soodo guto, Megidelitte Maariyaaminna wole Maariyaami waamma la"ara ha'ri.

² Hedeweelcho baatto lowo geeshsha shafantu; Maganu sokkaasinchi gordunni dirre waammate tu'noonni kincho gongo'mishe hoole aanaho ofolli.

³ Sokkaasinchu albino belequ gede xawanno; uddanosi kaadete gede waajjote.

⁴ Agaraasine sokkaasincho waajjite qece yite reyinohu gede ikkitu.

⁵ Sokkaasinchu kayinni meentoho, «Ki'ne woyite waajjitinoonte; suntiha Yesuusa hasidhinanni heedhinoonnita afoommo.

⁶ Isi konniicho dino; balaxe coyi'rinonte gede kaino. Madaarroonnisi darga kuneeti daggine la'e!

⁷ Xa hadhine rosaanosira, ‹Reyotenni kaino; ki'ne balaxe Galiila ha'rinona hakko affinannisi› yitine kullensa; kune kuloommo'ne» yiinsa.

⁸ Hakkunni gedensaanni, meentu waajjillunninna lowo hagiirrinni waammatewiinni rahe fule rosaanote kulara dodi.

⁹ Yesuusi doogote ha'ranni noore afe, «Keeru ki'ne ledo hee'ro!» yiinsa. Insano isiwa shiqqi yee, lekkasira uwe kumbuuli.

¹⁰ Hatte yannara Yesuusi, «Waajjitinoonte! Hadhine Galiila sa'anno gede roduuwi'yara kulle. ‹Hakkiicho affinanniena yiino› yiiyyensa» yii.

GAADDO YESUUSI KAINOTA QEESOOTU ROORROOTIRA KULTU

¹¹ Meentu ha'ranni hee'reenna, gaaddote giddonni gamu katama hadhe ikkino coye baala qeesootu roorrootira kultu.

¹² Qeesootu roorrooti geerru ledo gamba yite amaalantuhu gedensaanni, gaaddote lowo woxe uyite,

¹³ «‹Ninke gonxe hee'neenna hashsha rosaanosi dagge moorte adhite hadhino› yitine mannaho kulle.

¹⁴ Konne coye gobbate gashshaanchi macciishshiro, ki'ne affinoonnikki gede assine kulleemmona yaaddinoonte» yitunsa.

¹⁵ Kunnira gaaddo woxe adhite kulloonninsa gede assitu. Kuni coyi techo geeshsha Yihudu gobbara kullanna hee'ranno.

YESUUSI TONAA MITE ROSAANOSIRA LEELLI

¹⁶ Tonaa mitunku rosaano Yesuusi hadhe yiinowa Galiilu Ilaala hadhu.

¹⁷ Iso affe magansidhusi; gamu kayinni huluullantu.

¹⁸ Yesuusi insawa shiqqi yee, «Roorre baala gordohonna baattote uyinoonnie.

¹⁹ Xaate hadhine gosa baala Annu, Beettunna Qullaawu Ayyaani su'minni cuu'inanni rosaano'ya assensa.

²⁰ Hajajoommo'nere baala assitanno gede rosiissensa! Kuneeti, gobbate goofimarchi geeshsha ani ki'ne ledo noommo» yiinsa.