MAATEWOOSI 19 - Qullaawa Maxaafa

YESUUSI GALTE FUSHSHINE HA'RINSANNIKKI GEDE ROSIISI

¹ Yesuusi konne coye coyi're kaihu gedensaanni Galiilunni kae, Yordaanoosi Wayira widoonni noota Yihudu gobba fule ha'ri.

² Lowo mannino hoodesi ha'ri; hakko manni giddonni dhiwantinore hakkiicho hursi.

³ Hatte yannara Farisootu isiwa dagge jiffe la'asira hasidhe, «Manchu kaimu baalunni galtesi fushshe ha'risa Seeru aannoni?» yite xa'mitu.

⁴ Yesuusi daware, «Maganu umo kalaqamu waro, labbaahanna meyata asse kalaqinota dinabbabbinoonni?

⁵ Qoleno, ‹Kunnira manchu annasinna amasi agure galtesi ledo karsamanno. Lamunku mitto biso ikkanno.›

⁶ Kunnira, insa kunni ka'a mitto bisooti ikkinnina lame di"ikkitino. Xaate Maganu mitto assinore mannu badoonke» yii.

⁷ Farisootu qolte, «Muse mayiralla, ‹Ayiddaanni galtesi fushshe ha'risate woraqata anga wore ha'riso› yaannoyya?» yitu.

⁸ Yesuusi, «Muse galte'ne fushshitine ha'rissinanni gede fajjino'nehu, wodani'ne dillaawa ikkinohuraati; alba kayinni dihattooti.

⁹ «Ani kayinni, ‹Mittu manchi galtesi foorretenni kainohunni ikka hoogiro, hakkuyi ka'a galtese ha'rise wole adhiro foorinoho› yaate» yeemmo'ne.

¹⁰ Rosaanosi, «Ayiddaanninna ayiddaama coyi togo ikkannoha ikkiro adhama hooga woyyate» yitu.

¹¹ Yesuusi kayinni, «Kuni coyi aamaminonsarira ikkinnina baalaho didandaamanno.

¹² Kalaqamunni mureeyye ikkite ilantinori no; mannu qaarinori no; Gordu Gashshootira yite umonsa mureeyye assitinori no. Kunnira konne coye adha dandaannohu hee'riro adho» yiinsa.

YESUUSI QAAQQUULLE MAASSI'RI

¹³ Hatte yannara Yesuusi anga aanaho wore huuccannonsa gede mannu qaaqquulle haa're isiwa abbi. Rosaanosi kayinni abbino manna ruffu.

¹⁴ Yesuusi, «Gordu Gashshooti insa gedeerihona, qaaqquullu anewa dayona hooltinoonte!» yii.

¹⁵ Anga aanaho worinsahu gedensaanni hakkiinni kae ha'ri.

DUREESSU WEDELLICHI XA'MINO XA'MO

¹⁶ Mitto barra mittu manchi Yesuusiwa daye, «Rosiisaancho, hegere heeshsho afi'rate danchare ma asso?» yee xa'mi.

¹⁷ Yesuusi qole, «Danchu coyire mayira xa'mattoe? Danchu Mitto callaho. Hegere heeshshowa ea hasi'rittoro hajajo agadhi» yiisi.

¹⁸ Manchuno, «Hiittenne hajajo?» yii. Yesuusi qole, «‹Shitooti, foortooti, moortooti, beebbatenni naqqassooti.

¹⁹ Annakkinna amakki ayirrisi; manna umikki gede assite baxi!› yitanno hajajooti» yiisi.

²⁰ Wedellichuno, «Tenne baalanta hajajo albanni wonshoommo; woliri gatinoeri nooni?» yii.

²¹ Yesuusi qole, «Co'onta guuta ikka hasi'rittoro, hadhe afi'roottore baala hirte woxe buxanete beehi; gordoho jiro afi'rattona. Hakkunni gedensaanni hoode'ya amo!» yiisi.

²² Wedellichaho lowo jiro noosi daafira, konne coye macciishshe dadillanni ha'ri.

²³ Hakkunni gedensaanni Yesuusi rosaanosira, «Halaale kuleemmo'nena, dureessaho Maganu Gashshoote ea lowo geeshsha qarraho» yiinsa.

²⁴ Qoleno, «Dureessu Maganu Gashshoote eantenni, gaalu marfete xullo giddoonni lulluqqa shota coyeti» yiinsa.

²⁵ Rosaanosi konne coye macciishshite lowo geeshsha dhaggeeffatte, «Hatto ikkiro ayi gatannoyya?» yitu.

²⁶ Yesuusi insa widira hige lae, «Konne coye mannu didandaanno. Maganu kayinni baalankare dandaanno» yiinsa.

²⁷ Hatte yannara Pheexiroosi, «Kuneeti, ninke baalankare agurre ate hoode ha'nanni hee'noommo; afi'neemmori maatiyya?» yii.

²⁸ Yesuusi, «Halaale kuleemmo'nena, Manchi Beetti ayirrinyu barcimira ofollannowa haaro gobbara ane hoode hadhinanniri, ki'neno tonaa lamu ayirrinyu barcimira ofoltinanni; tonaa lamente Israeelete ga'rera yoo yitinanni.

²⁹ Ane daafira yee minna woy labbaa roduuwa woy meyaa roduuwa woy ama woy anna woy ooso woy gate agurannohu baalu xibbe ero adhanno; hegere heeshshono afi'ranno.

³⁰ Ikkollana albiidiri gedensiidire ikkitanno; gedensiidiri albiidire ikkitanno» yii.