MAATEWOOSI 17 - Qullaawa Maxaafa

YESUUSI AYIRRINYESI LEELLISHI

¹ Leyu barri gedensaanni Yesuusi Pheexiroosi, Yaiqoobinna Yaiqoobi rodoo Yohaannisi calluwansa haa're seeda ilaala fuli.

² Hakkiicho heedheenna albansaanni danisi wole ikki; albisino arrishshote gede xawi; uddanosino waajjo qoffe ikkite caabbichimma xabbu.

³ Hatte yannara, Musenna Eeliyaasi Yesuusi ledo hasaabbanna affu.

⁴ Pheexiroosi Yesuusa, «Mooticha, ninkera konniicho hee'ra danchate. Kunnira, maahoyye yiittoro sase daase, mitto atera, mitto Musera, mitto Eeliyaasira qaseemmo» yii.

⁵ Pheexiroosi hatto yee coyi'ranni hee'reenna, xawanno gomichi daye golinsa; gomichu giddonni, «Hagiirsiisannoehu, baxeemmohu Beetti'ya konneeti; isi yaannota macciishshe!» yitanno huuro daggu.

⁶ Rosaanosi tenne huuro macciishshitu yannara lowo geeshsha masse, baattote aana ubbe gombisantu.

⁷ Yesuusi kayinni insawa shiqqi yee angasinni amade, «Ka'e, waajjitinoonte!» yiinsa.

⁸ Insa gotti yite la'anno woyite Yesuusa agurranna wole diaffino.

⁹ Ilaalu aaninni dirritanni heedheenna Yesuusi, «Konne xa la'inoonnire Manchi Beetti reyotenni ka"a geeshsha ayerano kultinoonte!» yee hajajinsa.

¹⁰ Rosaanosi, «Muse Seeri rosiisaano, ‹Umo ikke daa hasiissannohu Eeliyaasiiti› yitannohu mayiraatiyya?» yite xa'mitusi.

¹¹ Yesuusi qole, «Halaaleho, Eeliyaasi balaxe daye baalankare darga qolanno.

¹² Ikkollana Eeliyaasi albanni balaxe dayinota kuleemmo'ne. Mannu kayinni diafinosi. Afa hoogino daafira hasi'ri gede assinosi. Manchi Beettino insa anga qarra adharaati» yii.

¹³ Hatte yannara rosaanosi, Yesuusi coyi'rinohu Cuuaanchu Yohaannisire ikkinota huwattu.

YESUUSI BUSHU AYYAANI AMADINO BEETTO HURSI

¹⁴ Mannunniwa ka'e dagguta, mittu manchi daye Yesuusi lekka hunda guluphe,

¹⁵ «Mooticha, beetto'ya mararisi; tugannohu bushu ayyaani lowo geeshsha qarrisannosi; batinye hige giiratenna wayi giddo uwanno.

¹⁶ Rosaanokkiwano abboommo; insa kayinni hursa didandiitino» yii.

¹⁷ Yesuusi qole, «Ki'ne ammantinannikkiri shokkadda ilama, ki'ne ledo mamooti geeshsha hee'reemmo? Ki'ne coye mageeshshi geeshsha cinceemmo? Hanni beetto anewa abbe!» yiinsa.

¹⁸ Yesuusi busha ayyaana rufita beettu giddonni fuli. Beettuno hakkawoyintenni huri.

¹⁹ Hakkunni gedensaanni rosaanosi calluwinsa Yesuusiwa shiqqi yite, «Ninke busha ayyaana fushsha hoongummohu mayiraati?» yite xa'mitusi.

²⁰ Yesuusi, «Ammana'ne xe'inohuraati. Halaale kuleemmo'nena, shiimiidi gumi geeshshi amma'na heedhoomme'nero konne ilaala, ‹Kawiinni kai!› yitiniro ha'ranno; dandiitinannikkiri mitturino dihee'ranno.

²¹ Kunni gari ayyaani kayinni qatumme Magano huucci'nikkinni horontanni difulanno» yiinsa.

YESUUSI REYOSIRE LEDE COYI'RI

²² Rosaanosi Galiilaho gamba yitu yannara Yesuusi, «Manchi Beetto mannu angara sayinse uyinanni;

²³ insano shitannosi; isi kayinni sayikki barra reyotenni ka"anno» yiinsa. Rosaanosi kunni coyira lowo geeshsha dadillitu.

QULLAAWU MINIRA UYINANNI FUSHSHAATE

²⁴ Yesuusinna rosaanosi Qifirinahoomi iillitu yannara, Qullaawu Mini giwire gamba assitannori Pheexiroosiwa shiqqe, «Rosiisaanchi'ne Qullaawu Mini giwire diaanno?» yite xa'mitusi.

²⁵ Pheexiroosi, «Aannowe» yiinsa. Pheexiroosi minira eita Yesuusi balaxe, «Simiooni Pheexiroosi, mayi leeltannohe? Tenne Alame gashshaano qaraxonna giwire adhitannohu ayewiinniiti? Gobbansa manniwiinniitinso wole gobba manniwiinniiti?» yee xa'misi.

²⁶ Pheexiroosi qole, «Wole gobbanni dayino manniwiinniiti» yii. Yesuusino, «Hatto ikkiro, gobbate manni giwire diaanno yaateyya!

²⁷ Kayinnilla insa ninkenni gufidhannokki gede, hadhe baaru giddo woshshaado tugi; umo assite amadatto qulxu'michi afoo fanittoro, giddosi woxe afi'ratto. Hakkonne massite anehanna ateha uyi» yiisi.