MAARQOOSI 9 - Qullaawa Maxaafa

¹ Yesuusi qole, «Halaale kuleemmo'nena, konniicho uurritinori giddonni mitu mitu Maganu Gashshooti lowo wolqanni daanna la'a geeshsha reyitannokkiri no» yii.

YESUUSI AYIRRINYESI LEELLISHI

² Leyu barri gedensaanni Yesuusi Pheexiroosi, Yaiqoobinna Yohaannisi calluwansa haa're seeda ilaala fuli. Insa albaanni soorrame wolu daniha ikki;

³ uddanosino waajjo qoffe ikkitu; uullate aana ayino hayishshe fushshe afannokki garinni waajjidhu.

⁴ Hatte yannara, Musenna Eeliyaasi Yesuusi ledo hasaabbanna affu.

⁵ Hakka woyite Pheexiroosi Yesuusa, «Rosiisaancho'ya, ninkera konniicho hee'ra danchate. Kunnira, sase daase, mitto atera, mitto Musera, mitto Eeliyaasira qansoni?» yii.

⁶ Insa waajjite noo daafira, Pheexiroosi umisi ma coyi'ranni nooronni diafino.

⁷ Hakka woyite gomichu daye golinsa; gomichu giddonni, «Baxeemmohu Beetti'ya konneeti; isi yaannota macciishshe!» yitanno huuro daggu.

⁸ Hedeweelcho caaqqi yite la'anno woyite, insa ledo Yesuusa agurranna wolu noohu dino.

⁹ Ilaalunni dirritanni heedheenna Yesuusi, «Konne xa la'inoonnire Manchi Beetti reyotenni ka"a geeshsha, ayerano kultinoonte!» yee hajajinsa.

¹⁰ Insano yiinota macciishshitu; ikkollana, «Reyotenni ka"ate yaa ma yaate ikka?» yitanni insa insanaawa hasaabbu.

¹¹ Insano Yesuusa, «Muse Seeri rosiisaano, ‹Balaxe daa hasiisannosihu Eeliyaasiiti› mayiralla yitanno?» yite xa'mitu.

¹² Isi kayinni, «Halaaleho, Eeliyaasi balaxe daye baalankare darga qolanno. Ikkollana Manchi Beetti qarra adhannotanna shollannota borreessinoonnihu mayiraati?

¹³ Ani kayinni kuleemmo'ne: Eeliyaasi dayino. Isi daafira borreessinoonni gede, mannu isi aana hasi'rinore assino» yee qolinsa.

YESUUSI BUSHU AYYAANI AMADINO BEETTO HURSI

¹⁴ Insa te'enne rosaanowa ka'e dagganno woyite, lowo manni insa doyisse noonsa. Muse Seeri rosiisaanono insa ledo moronsho amadde no.

¹⁵ Mannu baalu Yesuusa afe, lowo geeshsha mase, dodanni mare keere haa'ri.

¹⁶ Yesuusi manna, «Ki'ne insa ledo mayi daafira coyi'rantinanni?» yee xa'minsa.

¹⁷ Hakkiicho noo manni giddonni mittichu, «Rosiisaancho'ya, beetto'ya bushu danqichu ayyaani amadeenna, atewa abbi'roommo.

¹⁸ Ka"anno woyite, tugannosi; hambiishshannosi; qoleno hinko quruuxisanno; reeshshu gede qoromoddisannosi. Konne busha ayyaana fushshitara rosaanokkira kulummota didandiitino» yii.

¹⁹ Yesuusi, «Ki'ne ammantinannikki ilama, ani ki'ne ledo mageeshshi geeshsha hee'reemmo? Ki'nere mageeshshi geeshsha cinceemmo? Hanni beetto anewa abbe!» yii.

²⁰ Insano beetto haadhe abbitu. Bushu ayyaani Yesuusa afanni hee'renni, beetto uulla tuge fittifachiishi. Qoleno uulla gongo'mishanni hambiishshi.

²¹ Yesuusi beettu anna, «Togo assisinkunni yanna mageeshshaati?» yee xa'mi. Annu qole, «Anjesinni kayiseeti.

²² Roore yanna shee hunara giiratenna waaho tugannosi. Ati kayinni dandiittoro, mararte kaa'linke» yiisi.

²³ Yesuusi qole, «Dandiittoro yaatto? Ammanannohura baalunkuri dandaamanno» yiisi.

²⁴ Beettu anni hakkawoyintenni, «Amma'noommona, roorse amma'neemmo gede kaa'lie!» yee naggi asse coyi'ri.

²⁵ Yesuusi mannu hooramanni isiwa hige daannota afe, busha ayyaana, «Ati macciweelunna danqichu ayyaani, beettuwiinni fulatto gedenna layinkita eattokki gede hajajeemmohe!» yee rufi.

²⁶ Bushu ayyaani beetto fittifachiishe, lowo qaalinni raare fuli. Beettu kayinni reyinohu gede ikke dalagi; kunnira lowo manni, «Reyino» yii.

²⁷ Yesuusi kayinni anga amade kayise uurrisisi; beettuno kae uurri.

²⁸ Yesuusi minira e"eenna calluwinsa noowa, rosaanosi Yesuusa, «Ninke busha ayyaana fushsha hoongummohu mayiraati?» yite xa'mitusi.

²⁹ Isino, «Kunni gari ayyaani, qatumme Magano huucci'nikkinni difulanno» yiinsa.

YESUUSI REYOSIRE LEDE COYI'RI

³⁰ Yesuusinna rosaanosi hakkiichinni ka'e, Galiilu widoonni higge hadhu. Yesuusi kayinni mannu afannosita dibaxino.

³¹ Giwinohuno rosaanosira, «Manchi Beetto mannu angara sayinse uyinanni; insano shitannosi; shituhunni sayikki barra reyotenni ka"anno» yaanni rosiisanni noohura yeeti.

³² Rosaanosira kayinni kuni coyi dileellinonsa; xa'mitannokki gedeno waajjitino.

BAALANKA ROORANNOHU AYETI?

³³ Yesuusinna rosaanosi Qifirinahoomi Katama daggu. Yesuusi minira e"e kae rosaanosi, «Wonaankunni doogo hasaabbinanniri maati?» yee xa'minsa.

³⁴ Insa kayinni doogote aana, giddonsa rooriidihu ayetiro xa'mantanni hadhino daafira, sammi yitu.

³⁵ Ofollihu gedensaanni tonaa lamenka isiwa woshshe, «Umiha ikka hasi'rannohu, wo'munkura woriidihanna baalunku soqqamaancho ikko» yiinsa.

³⁶ Yesuusi mitto qaaqqo haa're albansaanni uurrise, angasinni hanqafe,

³⁷ «Ane su'minni togoo qaaqquulli giddonni mitto wosinchimma adhannohu, ane adhanno. Ane adhannohuno, ane calla ikkummokkinni, ane soyinoehano adhanno» yiinsa.

NINKE GIWANNOKKIHU NINKE WIDIHO

³⁸ Yohaannisi Yesuusira, «Rosiisaancho'ya, mittu manchi su'mikkinni durriisa fushshanna anfe, ninke ledoha ikkinokki daafira hoolloommo» yii.

³⁹ Yesuusi kayinni qole, «Ane su'minni maalale loosanni hee're, rahe ane aana busha coye coyi'ra dandaannohu dinona hooltinoontena agurre.

⁴⁰ Ninke giwannokkihu ninke widiho.

⁴¹ Halaale kuleemmo'nena, anere ikkitinoonni daafira, waa finiinchoho aanno'nehura nafa daafurisi diba"anno» yii.

SODHE SO'RISIISSOOTI

⁴² Yesuusi lede, «Ane amma'nitinori kuri shiimmaaddu giddonni mitto so'risiisanno manchi, lowo daamma haxote usudhe baaru giddo bairo woyyannosi.

⁴³ Kunnira, angakki cubboho massitannoheha ikkiro murte huni! Lame anga heedheennahe xo'annokkita gaannaamete giira eattonkunni, mitte angaha ikkite, heeshshonniwa ea woyyitannohe.

⁴⁴ [Hakkiicho insa itanno da'muulchi direyanno; giirano dixo'anno.]

⁴⁵ Lekkakki cubboho massitannoheha ikkiro murte huni! Lame lekka heedheennahe gaannaamete giira eattonkunni, mitte lekkaha ikkite heeshshonniwa ea woyyitannohe.

⁴⁶ [Hakkiicho insa itanno da'muulchi direyanno; giirano dixo'anno.]

⁴⁷ Illekki cubboho eessitannoheha ikkiro fushshite huni! Lame ille heedheennahe gaannaamete giira eattonkunni, mitte illeha ikkite Maganu Gashshoote ea woyyitannohe.

⁴⁸ [Hakkiicho insa itanno da'muulchi direyanno; giirano dixo'anno.]

⁴⁹ «Kakkalo maxinetenni faansinanninte gede, baalanka giiratenni faansinanni.

⁵⁰ Maxine danchate. Coommille hoogguro kayinni, hiitto assine coominshannise? Ki'nerano maxinete gedee coommilli heero'ne; ki'ne ki'neneewa sumuu yitine keere heedhe!» yii.