MAARQOOSI 10 - Qullaawa Maxaafa

ADHANTINORI BABBAXXITOONKE

¹ Yesuusi hakkiinni kae, Yihudu gobbanna Yordaanoosi Waa widoonni fuli. Hakka woyite lowo manni isiwa gamba yeenna albinte gede rosiisinsa.

² Farisootu isiwa dagge jiffe la'asira yite, «Manchu galtesi fushshe ha'risannota Seeru fajjannoni?» yite xa'mitu.

³ Yesuusi qole, «Konne coye Muse ma yee hajajino'ne?» yiinsa.

⁴ Insa qolte, «Muse, ayiddaanni fushshe ha'risate woraqata anga wore harisanno gede fajjino» yitu.

⁵ Hakka woyite Yesuusi, «Muse tenne hajajo borreessino'nehu, wodani'ne dillaawa ikkinohuraati.

⁶ Ikkollana Maganu umo kalaqamu waro, labbaahanna meyata asse kalaqino.

⁷ Kunnira manchu annasinna amasi agure galtesi ledo hee'ranno.

⁸ Lamunku mitto biso ikkitanno. Kunni ka'a xaate insa mitto bisooti ikkinnina lame manna di"ikkitanno.

⁹ Kunnira, Maganu mitto assinore mannu badoonke» yii.

¹⁰ Mine hee'reenna rosaanosi hakkonne coye kayisse ledde xa'mitusi.

¹¹ Isino, «Galtesi ha'rise wole adhannohu, galtesi agure foorinoho yaate.

¹² Galtese agurte woleho assidhanno meyatino foortinote yaate» yee qolinsa.

YESUUSI QAAQQUULLE MAASSI'RI

¹³ Yesuusi anga aanaho worannonsa gede mannu qaaqquulle haa're isiwa abbanni hee'reenna, rosaanosi kayinni abbino manna ruffu.

¹⁴ Yesuusi konne coye afe hanqe rosaanosi, «Maganu Gashshooti kuriuu gedeerihona, qaaqquullu anewa dayona hooltinoonte!

¹⁵ Halaale kuleemmo'nena, Maganu Gashshoote qaaqqu gede ikke adhannokkihu baalu horonta dieanno» yii.

¹⁶ Qaaqquulle haa're hanqafe, angasi aanaho wore maassi'rinsa.

DUREESSU WEDELLICHI XA'MINO XA'MO

¹⁷ Yesuusi hakkiinni fule wolewa ha'ranna mittu manchi dodanni daye, albasiinni guluphe, «Dancha Rosiisaancho, hegere heeshsho afi'rammora ma asso?» yee xa'mi'ri.

¹⁸ Yesuusi qole, «Mayira dancha yiittoe? Mittu ka'a danchu dino. Isino Maganoho.

¹⁹ Shitooti, foortooti, moortooti, kaphunni naqqassooti, doggooti, annakkinna amakki ayirrisi yitanno hajajo egennootto?» yii.

²⁰ Manchu qole, «Rosiisaancho'ya, tenne hajajo anjenni kayise agadhe hee'reemmo» yii.

²¹ Yesuusi mancho lae baxe, «Mittu coyilla gatinohe; hadhe afi'roottore baala hirte woxe buxanete beehi; gordoho jiro afi'rattona. Hakkunni gedensaanni hoode'ya amo!» yiisi.

²² Manchu konne coye macciishshe alba kolishshi'ri; lowo jiro noosi daafira dadillanni ha'ri.

²³ Yesuusi rosaanosi widira caaqqi yee lae, «Dureeyyete Maganu Gashshoote ea mageeshshi qarraati!» yiinsa.

²⁴ Rosaanosi yiino coye dhaggeeffattu. Yesuusi qole, «Ooso'ya, Maganu Gashshoote ea hiittoo qarraati!

²⁵ Dureessu Maganu Gashshoote eantenni, gaalu marfete xullo giddoonni lulluqqa shota coyeti» yiinsa.

²⁶ Rosaanosi konne coye lowo geeshsha dhaggeeffatte, insa insanaawa, «Hatto ikkiro, ayi gatannoyya?» yitu.

²⁷ Yesuusi insa la"anni, «Addanko, konne coye Magano ikkinnina, mannu didandaanno. Maganu baalankare dandaanno» yiinsa.

²⁸ Hatte yannara Pheexiroosi, «Kuneeti, ninke baalankare agurre ate hoode ha'nanni hee'noommo» yii.

²⁹ Yesuusi qole, «Halaale kuleemmo'nena, aneranna Danchu Duduwi daafira yee mine woy labbaa roduuwa woy meyaa roduuwa woy ama woy anna woy ooso woy gatesi agurannohu,

³⁰ roore afi'ranno. Xiiwanturo nafa, tenne yannarano mine, labbaa roduuwa, meyaa roduuwa, amuuwa, oosonna gate agarannohu xibbe ero afi'ranno; dagganno yannarano hegere heeshsho afi'ranno.

³¹ Ikkollana albiidiri gedensiidire ikkitanno; gedensiidiri albiidire ikkitanno» yii.

YESUUSI REYOSIRE SAYIKKIMEESHSHO COYI'RI

³² Yerusaalame massitanno doogo aana heedheenna, Yesuusi albansaanni ha'ranni no. Rosaanosino dhaggeeffattu; badhensaanni hadhanni noorino waajjitu. Xaano galagale tonaa lamenka rosaanosi woshshe iillannosi coyire,

³³ «Kuneeti, xa ninke Yerusaalame ha'nammoraati. Manchi Beetto qeesootu roorrootiranna Muse Seeri rosiisaanora sayinse uyinanni. Insano reyote yoo yitannosi; dagate angara sayisse uyitannosi.

³⁴ Insano qacifattannosi; anjano tuffannosi; lichetenni gantannosi; shitannosi. Ikkollana sasu barri gedensaanni ka"anno» yii.

YAIQOOBINNA YOHAANNISI HUUCCATTO

³⁵ Zebidewoosi ooso Yaiqoobinna Yohaannisi Yesuusiwa marte, «Rosiisaanchonke, xa'mineemmore assattonkera hasi'neemmo» yitusi.

³⁶ Isino, «Ma assammo'nera hasidhinanni?» yiinsa.

³⁷ Insano, «Ayirrinyu barcimikkira ofollatto yannara, mittu qiniitekkiinni, mittu gurakkiinni ofollineemmo gede assinke» yitusi.

³⁸ Yesuusino, «Huuccidhinannire diegentinoonni. Ani ageemmohura qarru finiinchira aga dandiitinannini? Ani cuuameemmo cuuama cuuantine affinannini?» yee xa'minsa.

³⁹ Insano, «Ee, dandiineemmo» yitusi. Yesuusino, «Halaaleho, ani ageemmohura qarru finiinchira agginanni. Ani cuuameemmo cuuama cuuantine affinanni.

⁴⁰ Ikkollana, qiniite'yaanninna gura'yaanni ofolla qixxaabbinorite ikkinnina ofoshshiisheemmohu ane di"ikkoommo. Hatto assannohu Maganoho; hakko ofoshshiishannonsarino qixxaabbinoreeti» yii.

⁴¹ Gattinori tonnunku konne coye macciishshite, Yaiqoobiranna Yohaannisira hanqitu.

⁴² Yesuusi baalanka woshshe, «Dagate gashshaano roorrootaho yinansara mannu aana wo'ma roorre afidhannota egentinoonni.

⁴³ Ki'ne giddo kayinni hattoori hee'ra dihasiissanno. Wo'munkunni rooriidiha ikka hasi'rannohu kayinni, soqqamaancho'ne ikko.

⁴⁴ Hattono mereero'ne albiidiha ikkara hasi'rannohu, borojjicho'ne ikko.

⁴⁵ Manchi Beettino soqqamaranna lowo manna wode gatisate lubbosi sayise aara dayino ikkinnina, soqqammasira didayino» yii.

YESUUSI ILLIWEELU BERXEMOOSI ILLE FANI

⁴⁶ Hakkunni gedensaanni Iyyaarkote Katama daggu. Yesuusi rosaanosinna lowo manni ledo Iyyaarkote Kataminni fulanno woyite, illiweelu Xemoosi beetti Berxemoosi doogote gama ofolle no.

⁴⁷ Hakkaanni hige sa"anni noohu Naaziretete Yesuusa ikkinota macciishshe, «Daawiti Beetto Yesuusa, ballo mararie!» yaanni qoonqosi naggi asse coyi'ri.

⁴⁸ Lowo manni, «Sammi yii!» yee rufisi. Isi kayinni, «Daawiti Beetto ballo, mararie!» yaanni albinni roorse qoonqosi naggi asse coyi'ri.

⁴⁹ Yesuusi ha'ranni noohu taxxi yee, «Hakkonne mancho woshshe!» yii. Insano illiweelo, «Hagiidhi! Gotti yii! Yesuusi woshshanni noohe» yitusi.

⁵⁰ Isino handuruffi yee kae uddanosi tuge agure, Yesuusiwa mari.

⁵¹ Yesuusi, «Ma assammohera hasi'ratto?» yee xa'misi. Illiweeluno, «Rosiisaancho'ya, la"ammora hasi'reemmo» yii.

⁵² Yesuusino, «Amma'nakki hursitinohena, ha'ri!» yiisi. Manchuno hakkawoyintenni ille fa'niteennasi lai. Yesuusi hoodeno ha'ri.