LUQAASI 24 - Qullaawa Maxaafa

YESUUSI REYOTENNI KAI

¹ Meentu qixxeessino shitto haa're lamalate umi barra soodo guto waammanniwa ha'ri.

² Hakkiira iillanno woyite tu'noonni kinchi waammate afiinni gongo'me ho'le nooha afi.

³ Waammate giddora eanno woyiteno Mootichu Yesuusi reeshsha diafino.

⁴ Konne coye maala'lanni hee'reenna kuneeti, waajjo uddano uddidhinori lamu manni dagge mulensa uurritu.

⁵ Meentu lowo geeshsha waajje umo heeshshi yee hee'reenna mannootu, «Heeshshonniha reyitinori mereero mayira hasidhinanni?

⁶ Isi kawiicho dino; reyotenni kaino. Alba Galiilaho hee're kulino'nere qaagge.

⁷ ‹Manchi Beetto cubbaataammu angara sayinse uyinanni; sutame sayikki barra reyotenni ka"a hasiissannosi› yiino'ne» yitu.

⁸ Meentuno Yesuusi qaale qaagi.

⁹ Waammatewiinni hige konne coye baala tonaa mitunkuranna wolootaho kuli.

¹⁰ Konne coye rosaanosira kultinori Megidelitte Maariyaamiitinna Yohaananna Yaiqoobi ama Maariyaamiiti. Wolu meentino insa ledo no.

¹¹ Insa kayinni kuni coyi haaqee laweennansa diammanino.

¹² Pheexiroosi kayinni rahe dodanni mare waammanniwa iilli. Hakkiira iille heeshshi yee la"anno woyite, waammate giddo kafanu uddano wolewa ubbe no. Ikkino coye dhaggeeffatanni minira ha'ri.

YESUUSI LAME ROSAANORA LEELLI

¹³ Hakko barranni Yesuusi hoode hadhannori giddonni lamu Yerusaalamete kataminni fulte Eemahusi yinanni ollaa hadhu. Eemahusi Yerusaalametenni 11km fafanno.

¹⁴ Insano ikkino coye baala kayisse insa insanaawa hasaabbanni no.

¹⁵ Konne coye hasaabbanninna xa'mantanni heedheenna Yesuusi umisi insawa shiqqi yee ledonsa ha'ri.

¹⁶ Ikkollana illensanni la'anni heedhenni ewelummasi bada didandiitino.

¹⁷ Yesuusino, «Hadhinanni heedhine doogote aana hasaabbinanni gari hiittooho?» yee xa'minsa. Insano dadillite sammi yite uurritu.

¹⁸ Insa giddonni mittichu Qeleyopha yinannihu, «Tenne barrubba giddo Yerusaalamete ikkinore diafootto? Ati wosinchohoni?» yiisi.

¹⁹ Yesuusino, «Mayi ma ikkino?» yiinsa. Insano, «Naaziretete Yesuusi aana ikkino coyetiwe! Isi Maganunna mannu baalu albaanni qaalunninna loosunni jawaata himanaanchooti.

²⁰ Qeesootu roorrootinna gashshaanonke reyote yoora sayisse uyitino. Masiqalu aanano suttino.

²¹ Ninke kayinni, ‹Israeele gatisannohu isooti› yine hexxine agadhine hee'noommoho. Ikkollana kuni baalu coyi ikkinkunni kuneeti techo sase barraati.

²² Ninke ledo noohu mitu mitu meenti dhaggeeffachishinonke; insa techo soodo gute waammanniwa marino.

²³ Yesuusi reeshsha kayinni diafino. ‹Reyotenni kaino!› yitanno sokkaasine ajuujatenni anfoommo yaanni galagale dayino.

²⁴ Ninke giddonnino mitu mitu waammanniwa marte meentu yiino coyi adda ikkinota buuxxino. Yesuusa kayinni diaffino» yitusi.

²⁵ Yesuusino, «Ki'ne wodanchitinannikkirinna himanaano coyidhinore baala ammanate wodanu dunkino'neri!

²⁶ Kiristoosi konne baala qarra adhanna ayirrinyu darga iilla dihasiissannosi?» yiinsa.

²⁷ Hakkunni gedensaanni Musenna himanaanote maxaaffanni kayise, Qullaawa Borro baalate giddo Isi daafira coyi'noonnire xawise kulinsa.

²⁸ Insa hadhanni noo qacha iillituta, Yesuusi sae ha'rannoha lawinsa.

²⁹ Insa kayinni, «Yanna hashshitino; arrishshono e'araatina ninkewa gali» yite duudhe huuccitusi. Isino insawa galara ei.

³⁰ Insa ledo sagale itara ofolli; tima haa're galatu huuccatto assihu gedensaanni hiiqqaqqe uyinsa.

³¹ Hatte yannara illensa fa'niteenna Yesuusa ikkinota affu. Isi hakkawoyintenni albinsanni go'li.

³² Insa insanaawa, «Doogote hee'neenna hasaawisanninkenna Qullaawa Borro qaagiissanni kulinke yannara wodaninke giirate gede ikke dibuwinke!» yitu.

³³ Insano hakkawoyintenni ka'e Yerusaalame higgu. Hakkiicho tonaa mitunku rosaano wolootu ledo gamba yite noore affu.

³⁴ Insano, «Halaalintanni Mootichu Yesuusi kaino! Simioonirano leellino!» yitu.

³⁵ Lamunku rosaano doogote aana ikkino coyenna Mootichu Yesuusi tima haa're hiiqqaqqi yannara hiitto ikkite affinosiro kultunsa.

YESUUSI ROSAANOSIRA LEELLI

³⁶ Lamunku rosaano konne coye kultanni heedheenna Yesuusi umisi mereeronsa uurre, «Keeru ledo'ne hee'ro!» yiinsa.

³⁷ Insa kayinni ekera affinoha laweennansa masse waajjillunni huxidhu.

³⁸ Yesuusi kayinni, «Mayira massinanni? Mayira lame wodana ikkitinanni?

³⁹ Anguwa'yanna lekkuwa'ya la'ine ane ikkoommota buuxxe. Amammaddine la'e; ane la'inanninte gede, ayyaanu maalanna miqicho diafi'rino» yiinsa.

⁴⁰ Hatto yiihu gedensaanni anguwasinna lekkuwasi leellishinsa.

⁴¹ Insano hagiirrunna dhaggeeffatate batinyinni kainohunni xaara diammantino. Yesuusi, «Mitiri intanniri noo'ne?» yee xa'minsa.

⁴² Insano shiima du'rinshoonni qulxu'micho uyitusi.

⁴³ Isino adhe insa albaanni iti.

⁴⁴ Yesuusino, «Ki'ne ledo noommo yannara Musera uyinoonni Seeri, Himannatenna Faarsuwate borro giddo ane daafira borreessinoonniri baalu wo'ma hasiissanno yee kulummo'ne qaali konneeti» yiinsa.

⁴⁵ Hakkunni gedensaanni Qullaawa Borro wodanchitanno gede wodanansa fane,

⁴⁶ «Kiristoosira qarru iillannositanna sayikki barra reyotenni ka"annota balanxe borreessinoonni.

⁴⁷ Su'misinni aagintaambannitanna cubbu maaro afi'nannita, Yerusaalametenni kayinse gobba baalate mannira kullannita coyi'noonni.

⁴⁸ Ki'ne kunni baalunku coyira naqaashshete.

⁴⁹ Kuneeti! Ani Anni'ya uyino hexxo soyemmo'ne. Ki'neno gordunni wolqa uddidhina geeshsha Yerusaalamete agarre» yiinsa.

YESUUSI GORDO HA'RI

⁵⁰ Hakkunni gedensaanni Yesuusi rosaanosi Yerusaalametenni fushshe Biitaaniya haa're ha'ri. Hakkiichono angasi diriirse maassi'rinsa.

⁵¹ Maassi'ranni hee're insawiinni baxxe gordo fule ha'ri.

⁵² Insano Isira kumbuulte lowo hagiirrinni Yerusaalame higgu.

⁵³ Magano galaxxitanni barru baala Qullaawu Mininni baxxitukkinni heedhu.