LUQAASI 20 - Qullaawa Maxaafa

YESUUSI ROORRE

¹ Mitto barra Yesuusi Qullaawa Mine rosiisannanna Maganu qaale kulanna Qeesootu roorrootinna Seeru rosiisaano cimeeyyete ledo mitteenni Isiwa ka'e dagge,

² «Hanni kulinke, konne baala assate roorre maminni afi'ritto? Tenne roorre ayi uyihe?» yite xa'mitusi.

³ Yesuusi qole, «Anino mitte xa'mo xa'meemmo'nena qolle"e:

⁴ Yohaannisi cuua Maganuwiinniitinso mannuwiinniiti?» yee xa'minsa.

⁵ Insa insanaawa, «‹Maganuwiinniiti› yinummoro, ‹Ammana mayira gibbiniyya?› yaannonke.

⁶ ‹Mannuwiinniiti› yinummoro, mannu baalu Yohaannisi himana ammananno daafira, kinnatenni awwaalannonke» yitu.

⁷ Kunnira, «Hiikkiinniitiro dianfoommo» yitu.

⁸ Yesuusi qole, «Anino mayi roorrenni loosanni noommoro dikuleemmo'ne» yiinsa.

WOYINETE HAQQE KAASANNOHU LAWISHSHA

⁹ Hakkunni gedensaanni Yesuusi mannaho, «Mittu manchi woyinete haqqe kaasi'ri; loossannorira kiraho ee lowo yanna keeshshara fule wole gobba ha'ri.

¹⁰ Gamba assinanni yanna dagguta, iillannosi beehacho abbannosi gede soqqamaanchosi fushshe soqqi; loossannori kayinni soqqamaanchosi gante mulla anganni qoltu.

¹¹ Xaano wole soqqamaancho fushshe soqqi. Loossannori hakkonneno gante shollishshe mulla anganni qoltu.

¹² Xaano lede sayikki soqqamaancho fushshe soqqi. Hakkonneno gante madiissite fushshite tuggu.

¹³ Woyinete anni, ‹Hanni ma asso? Xa baxeemmoha mitto beetto'ya soyemmo; iso ayirrisa dihoogganno› yii.

¹⁴ Loossannori kayinni beetto affuti mimmitoho, ‹Ragi'rannohu konneeti; ragge ninkera ikkitanno gede amme shine hunnona!› yitu.

¹⁵ Kunnira woyinete gobbaanni fushshite shite huntu. Woyinete anni konne manna hiissannonsaha lawanno'ne?

¹⁶ Woyinete anninni kae daanno; kore loossannore shee gudanno; woyinesino wolootaho aanno» yii. Mannu konne coye macciishshe, «Togoo coyi horonta ikkoonke!» yii.

¹⁷ Yesuusi insa widira hige lae, « ‹Mine mintannori mishshe agurtino kinchi, mineho dhaawa ikkino› yine borreessinoonnihu mayira lawanno'ne?

¹⁸ Hakko kinchi aana uwannohu baalu hiiqqaqqamanno. Kinchu aanasi uwannohu kayinni daahamanno» yiinsa.

¹⁹ Hatte yannara, Seeru rosiisaanonna qeesootu roorrooti, maammaashshu insa kisannoha ikkinota affe, hakkawoyintenni Yesuusa amaddara hasidhu. Ikkollana manna waajjitino.

GIWIRE BAATATE DAAFIRA SHIQQINO XA'MO

²⁰ Kunnira, injiitanno yanna galaalchitanni no. Mite sao coyi'reenna amadde gashshinohu roorreranna wolqara sayisse uyitara, elo labbe giddota haadhannore fushshite Isiwa sokku.

²¹ Hakkuri marte Yesuusa, «Rosiisaancho, kulattonkerinna rosiisattonkeri halaale ikkinota anfoommo. Mallaadittokkinni taashshite Maganu doogo mannaho rosiisatto.

²² Maahoyyena, Qeesaarira giwire baatanke garahonso garimalete?» yitusi.

²³ Yesuusi xagarronsa afe,

²⁴ «Hanni saante leellishshe"e! Aanase noo misilenna su'mu ayeho?» yee xa'minsa. Insano, «Qeesaariho» yite qoltu.

²⁵ Yesuusino, «Qeesaariha Qeesaarira uuyye; Maganunniha Maganoho uuyye!» yiinsa.

²⁶ Xa'mitino xa'monni mannu albaanni woshshaaddasira didandiitino. Qolino qolonni dhaggeeffatte sammi yite agurtu.

REYOTENNI KA"ATE DAAFIRA SHIQQINO XA'MO

²⁷ «Reyotenni ka"a dino» yitanno Saduqooti giddonni gamu Yesuusiwa shiqqi yite,

²⁸ «Rosiisaancho, Muse borreessino Seeri, ‹Mittu manchi galte adhe kae ooso ilikkinni reyiro, hattenne mancho rodiisi gashshe rodiisira sircho sayisona› yiino.

²⁹ Lamalu roduuwi ilante heedhanna, bayiru galte adhe kae ooso ilikkinni reyino.

³⁰ Galtesi layinkihu gashshino.

³¹ Sayikkihuno gashshino. Kunni garinni lamalunku ooso iltukkinni reyitino.

³² Goofimarchoho manchono reyitino.

³³ Lamalunku adhitinota ikkituna, reyotenni ka'nanni waro tini mancho hiikkunnita ikkitanno?» yite xa'mitusi.

³⁴ Yesuusi qole, «Tenne gobba manni adhannonna adhamanno.

³⁵ Dagganno alamera hee'ranna reyotenni ka"a maltinonsari diadhitanno; diadhantanno.

³⁶ Sokkaasinete gedeere ikkitanno daafira direyitanno; reyotenni ka'ino daafirano Maganu oosooti.

³⁷ Reyotenni ka"ate daafira kayinni, Muse citu mule hee're hasaawi yannara Mooticha, ‹Abirihaami Magano, Yisihaaqi Magano, Yaiqoobi Magano› yee woshshino.

³⁸ Kunnira, Maganu heedhannori Maganooti ikkinnina reyitinoriha di"ikkino. Wo'munku Isira heedhannoreeti» yii.

³⁹ Seeru rosiisaano giddonni mitu mitu, «Rosiisaancho, dancha coye coyi'rootto» yitu.

⁴⁰ Hakkunni gedensaanni seyate Yesuusira xa'mo shiqishinohu mittuno dino.

KIRISTOOSI AYE BEETTOOTI

⁴¹ Hakkunni gedensaanni Yesuusi, «Kiristoosa hiitto ‹Daawiti beettooti› yitanno?

^42-43 Daawiti umisi Faarsote Maxaafi giddo: Mootichu Mootichi'yara, ‹Diinakki lekkakkira woroonni qolammo geeshsha, qiniite'yaanni ofolli› yiino» yee borreessino.

⁴⁴ Daawiti umisi, «‹Mooticha› yee woshshisina, hiitto ikke beettosi ikkannoyya?» yee xa'minsa.

YESUUSI SEERU ROSIISAANO AGADHINANNI GEDE QOROPHISIISI

⁴⁵ Mannu baalu macciishshanni hee'reenna Yesuusi rosaanosi,

⁴⁶ «Seeda uddano uddidhe ka'anna kawa ha'rama, dikkote keere haa'nansara, xaadu mineno woyyaawino barcimira ofollanna jilu mineno ayirrado darga ofolla baxxannore Seeru rosiisaano agadhe.

⁴⁷ Leellantara yite seeda huuccatto assitanni, gunnootu mine mulqitanno. Kunnira, insa rooru qorichi agarannonsa» yii.