LUQAASI 2 - Qullaawa Maxaafa

YESUUSI KIRISTOOSI ILAMINO GARA

¹ Hatte yannara Roomu gashshooti giddo noo manna baala kiirranni gede Jawu Moote Awugisxoosi hajajo fushshi.

² Umo assine manna kiirri yannara Qerenewoosi Sooriyu gobbara moohe no.

³ Mittu mittunku kiiramara ilamino gobba ha'ri.

⁴ Yooseefi ilama Daawiti sircho ikkino daafira, Galiilunni Naaziretete kataminni kae, Yihudu gobbara nooha Daawiti katama Beeteliheme ha'ri.

⁵ Kiiramara ha'ri woyite, huucci'rinota Maariyaami ledo adhe ha'rino. Hatte yannara ise godowinni no.

⁶ Beetelihemete heedheenna Maariyaamira iltanno yanna iillituse.

⁷ Hakkiicho heedhe bayira beettose iltu; wosinu galanno dargi nookki daafira, hoccunni xaaxxe hoowete saadate hayisso worranni badiri aana goxissu.

ALLAALAASINENNA SOKKAASINE

⁸ Hakko qooxeessira, hashsha xawoho saadansa agadhite galtino allaalaasine no.

⁹ Insara Mootichu sokkaasinchi leellinsa; hakkunni gedensaanni Mootichunnihu ayirrinyu xawaabbi gaangaawinsara xawi. Insano lowo geeshsha waajjitu.

¹⁰ Sokkaasinchu kayinni, «Waajjitinoonte! Mannu baalunkura ikkannoha dancha duduwo kulammo'nera dayommo.

¹¹ Kuneeti, techo Daawiti katamira Gatisaanchu ilamino'ne. Isi Mooticha Kiristoosaati.

¹² Malaateho, qaaqqo hoccunni xaanxeenna hoowete saadate hayisso worranni badiri aana goxe nooha affinanni» yiinsa.

¹³ Hedeweelcho haammata gordu sokkaasine sokkaasinchu ledo dagge Magano faarsitanni,

¹⁴ «Iima gordoho Maganoho ayirrinyu ikkosi! Baattote aanano Maganu hagiidhannonsa baalira keeru iillo» yitu.

¹⁵ Sokkaasine insawiinni baxxite gordo fultuta, allaalaasine insa insanaawa, «Ka'e Beeteliheme ha'ne, xa ikki coyenna Maganu kulinonkere la'nona» yitu.

¹⁶ Rakke hadhe Maariyaami, Yooseefinna saadate hayisso worranni badiri aana goxe noo qaaqqo la'u.

¹⁷ Qaaqqo affuhu gedensaanni, qaaqqu daafira sokkaasinchu kulinonsare hasaabbu.

¹⁸ Konne coye macciishshihu baalu allaalaasine kultinonsare dhaggeeffati.

¹⁹ Maariyaami kayinni, konne coye baala wodanisenni hiincitanni agarte no.

²⁰ Allaalaasine, wo'munku coyi sokkaasinchu yiino gede ikkinota affinohuranna macciishshitinohura Magano ayirrissanninna galattanni dargansa higgu.

QAAQQO YESUUSA HAA'NE QULLAAWU MINIRA MASSINI

²¹ Settikki barra qaaqqo barcimshiishate seera wonshinanni hee'ne su'ma Yesuusa yine fushshinisi. Kuni su'mi, godowamara albaanni sokkaasinchu fushshinosi su'maati.

²² Muse Seeri garinni, keeraa'mate Seera wonshinanni yanna iillituta, Yooseefinna Maariyaami qaaqqo Yesuusa Mootichu albira shiqishate Yerusaalame haadhe hadhu.

²³ Hatto assitinohu Mootichu Seerira, «Umo ilaminohu labbaa beetti baalu Mootichaho uyineenna qullaawa ikkanno» yine borreessinoonni hajajo noo daafiraati.

²⁴ Qolleno Maganu Seerira, «Lame lemboola woy lame bukukkaama kakkalote shiqisha hasiissanno» yine borreessinoonni.

²⁵ Hatte yannara Yerusaalamete Simiooni yinannihu mittu manchi no. Isi Maganoho galino keeraanchooti. Israeelennita gatote hexxo agadhanni hee'rino; Qullaawu Ayyaanino ledosi no.

²⁶ Isi Mootichunniha Buuramino Moote afikkinni reyannokkita Qullaawu Ayyaani kulinosi.

²⁷ Hakko barra Qullaawu Ayyaani qaagiisseennasi kae Qullaawu Minira ha'ri. Yooseefinna Maariyaami Seeru garinni wonsha hasiissannonsare wonshate qaaqqo haadhe Qullaawu Minira e'uta,

²⁸ Simiooni qaaqqo haa're hanqafe, Magano galatanni,

²⁹ «Mooticha'ya, kuneeti oottoe hexxo wonshoottona, xaate ane borojjichokki keerunni geegiissie.

³⁰ Gatisaanchimmakki ille'yanni afoommo;

³¹ hattino mannu baalunku albaanni qixxeessoottote.

³² Isi mannaho halaale leellishanno caabbicho ikkanno. Israeelete mannirano ayirrinyeho» yii.

³³ Yooseefinna Maariyaami qaaqqu daafira yinoonnire dhaggeeffattu.

³⁴ Simiooni maassi'rinsahu gedensaanni amasi Maariyaami, «Kuneeti, kuni qaaqqi Israeelete giddo lowo mannira baote, lowo mannira gatote malaate ikkanno. Lowo manni giwannosi.

³⁵ Kunninni kainohunni lowo manni wodani giddo go'lite noo hedo xawo fultanno. Ate wodana kayinni bise xoroorrite sa'anno» yiise.

³⁶ Hatte yannara Aseeri ga'reti Faanueeli beetto Haanna yinanni himanaancho no. Iseno lowo geeshsha geerchote; ayiddaannise ledo lamala diro heedhuhu gedensaanni isi reyi.

³⁷ Hakkunni gedensaanni settayina shoole diro ikkase geeshsha Qullaawu Mininni baxxitukkinni ita aga agurte huuccidhanni, hashshanna barra Maganoho soqqantanni heedhino.

³⁸ Hatte yannara ise dagge Magano galatte, qaaqqunnire Yerusaalamete gato hexxotenni agadhanni noo baalira hasaabbu.

³⁹ Yooseefinna Maariyaami, Maganu Seeri giddo borreessinoonnire baala wonshituhu gedensaanni Galiilaho noota qaensa Naazirete higgu.

⁴⁰ Qaaqquno lophe jawaata ikki; afano wo'mitusi; Maganu eltono ledosi no.

YESUUSI QULLAAWU MINI GIDDO

⁴¹ Yooseefinna Maariyaami diru dirunkunni Agure Sa"ate Ayyaana ayirrisara Yerusaalame ha'ranno.

⁴² Yesuusira tonaa lame diro ikke hee'reennasi, rosinsa garinni Agure Sa"ate Ayyaana ayirrissara hadhu.

⁴³ Ayyaana ayirrinse ka'nihu gedensaanni, Yooseefinna Maariyaami qaera higguta, Yesuusi hakko Yerusaalamete gatino. Yesuusi hakko gatinota insa kayinni diafino.

⁴⁴ Doogaasinete ledo daanni nooha laweennansa mittu barri doogo hadhu. Hakkunni gedensaanni Yesuusa fiixinsawanna egentino manniwa hassu.

⁴⁵ Hasse afa hooggino daafira galagalte Yerusaalame higgu.

⁴⁶ Sasu barri gedensaanni Qullaawa Mine affusi; hakkiicho Ayihudete rosiisaano mereero ofolle macciishshanninna xa'manni no.

⁴⁷ Macciishshituri baalu egennosinna qolanno dawaro maalale assidhu.

⁴⁸ Yooseefinna Maariyaami Iso Qullaawa Mine affe dhaggeeffattu. Amasi qolte, «Beetto'ya, togo mayira assittonke? Annikkinna ani ate hansanni qarrammoommo» yitusi.

⁴⁹ Yesuusi qole, «Mayira hassinannie? Anera Anni'ya mine hee'ra hasiissannoeta diegentinoonni?» yiinsa.

⁵⁰ Insa kayinni yiinonsa coye dihuwattino.

⁵¹ Hakkunni gedensaanni Yesuusi ledonsa Naazirete ha're insara hajajamanni hee'ri. Amasi kayinni baalanka coye wodanaho wodhite no.

⁵² Yesuusi Maganunna mannu albaanni baxame, afatenninna manninatunni lophi.