LUQAASI 18 - Qullaawa Maxaafa

BUXICHO GUNNITTEHANNA YOO YAANNOHU LAWISHSHA

¹ Hakkunni gedensaanni, Yesuusi wo'manka woyite jawaatte huuccidhanno gede rosaanosira lawishsha kulanni,

² «Mittu katamira Magano waajjannokkihu, mannano saalfatannokkihu mittu yoo yaanno manchi no.

³ Hakko katamira mitte buxicho gunnitte no. Ise hakkunni yoo yaannohuwa dagganni, ‹Baarigaari'ya ledo nooe coyira yoo yiie› yitannosi.

⁴ Isi coyese laikkinni lowo yanna keeshshi. Gedensaanni kayinni, ‹Magano waajjanna manna saalfata hoogummorono,

⁵ tini gunnitte wo'ma woyite dagganni qarrissannoe daafira, yoo yeemmose. Hatto assa hoogummoro kayinni, wo'manka woyite dagganni qarrissannoe› yiino» yii.

⁶ Mootichu lede, «Hakku kaajjadu, yoo yaanno manchi coyi'rino coye qaagge.

⁷ Maganu hashsha barra Isiwa higge raartannorira roorse halaalu yoo diyaannonsa? Lashshi asse agureenna kaa'lo keeshshitannonsani?

⁸ Kuleemmo'nena, keeshshikkinni yoo yaannonsa. Ikkollana, Manchi Beetti daanno woyite uullate aana amma'na afi'ra ikka?» yii.

BOONALEESSA DUREESSANNA JOOGU QARAXAASINCHI LAWISHSHA

⁹ Qoleno Yesuusi, ninke keeraanote yite umonsa bokkeessite wole manna mishshannorira,

¹⁰ «Lamu manchi huuccidhara Qullaawu Minira hadhu. Mittu Farisichaho; layinkihu qaraxaasinchoho.

¹¹ «Farisichu uurre wodanisinni, ‹Magano'ya, ani wolootu gede mulqi'reemmoha, jaddo looseemmohanna fooreemmoha ikka hooga'yara galaxxeemmohe. Roorenka kunni qaraxaasinchi gedeeha ikka hoogoommohura galaxxeemmohe.

¹² Ani mitte lamala giddo lame hige ita aga agure huucci'reemmo; afi'reemmori baalu giddonni tonnunni mitte anga eemmo› yaanni huucci'ri.

¹³ «Qaraxaasinchu kayinni fafe uurre, iima gordo hige la"ara nafa diuggino. Ikkollana angasinni gagaso ga'nanni, ‹Magano'ya, ani cubbaataamohona cubbo'ya aguri!› yee huucci'ri.

¹⁴ Kuleemmo'nena, keeraa'me minisira higinohu hakkonne qaraxaasinchooti ikkinnina Farisicha di"ikkino. Umosi gotti assannohu baalu heeshshi yaanno; umosi heeshshi assannohu kayinni gotti yaanno» yiinsa.

YESUUSI QAAQQUULLE MAASSI'RI

¹⁵ Yesuusi anga aanaho worannonsa gede mannu qaaqquulle haa're Isiwa abbi; rosaanosi kayinni abbino manna ruffu.

¹⁶ Yesuusi qaaqquulle woshshe, «Maganu Gashshooti insa gedeerihona, qaaqquullu anewa dayona hooltinoonte!

¹⁷ Halaale yeemmo'nena, ayino Maganu gashshoote qaaqquullu gede ikke adhannokkihu dieanno» yiinsa.

UULLATE AANI JIRONNA MAGANU GASHSHOOTE

¹⁸ Ayihudete roorrooti giddonni mittu Yesuusa, «Dancha Rosiisaancho, hegere heeshsho afi'rammora ma asso?» yee xa'mi.

¹⁹ Yesuusi qole, «Mayira dancha yaattoe? Mittu Magani ka'a danchu dino.

²⁰ Hajajo egennootto: ‹Insano, foortooti, shitooti, moortooti, kaphunni naqqassooti, annakkinna amakki ayirrisi!› yitannote» yiisi.

²¹ Manchu qole, «Rosiisaancho'ya, tenne hajajo anjenni kayise agadhe hee'reemmo» yii.

²² Yesuusi tenne macciishshihu gedensaanni manchoho, «Mittu coyi gate noohe; hadhe afi'roottore baala hirte woxe buxanete beehi; gordoho jiro afi'rattona. Hakkunni gedensaanni hoode'ya amo!» yiisi.

²³ Manchu kayinni lowo geeshsha dureessa ikkino daafira, konne coye macciishshe lowo geeshsha dadilli.

²⁴ Yesuusi manchu dadillinota afe, «Dureeyyete Maganu Gashshoote ea mageeshshi qarraati!

²⁵ Dureessu Maganu Gashshoote eantenni, gaalu marfete xullo giddoonni lulluqqa shota coyeti» yiinsa.

²⁶ Tenne macciishshanni noo manni, «Hatto ikkiro, ayi gatannoyya?» yii.

²⁷ Yesuusi kayinni, «Addanko, mannu dandaannokki coye Maganu dandaanno» yii.

²⁸ Pheexiroosino, «Kuneeti, ninke noonkere baala agurre ate hoode ha'nanni hee'noommo» yii.

²⁹ Yesuusi qole, «Halaale yeemmo'nena, Maganu Gashshootira yee minesi woy galtesi woy roduuwasi woy iltinosire woy oososi agurannohu,

³⁰ tenne gobbara erote ero adhanno. Dagganno alamerano hegere heeshsho afi'ranno» yii.

YESUUSI REYOSIRE SAYIKKIMEESHSHO COYI'RI

³¹ Yesuusi tonaa lamenka rosaanosi isiwa gamba asse, «Kuneeti, xa ninke Yerusaalame ha'nammoraati. Manchi Beettire borreessinoonni himani baalu hakko wo'manno.

³² Isono dagate angara sayinse uyinannisi. Insano yoo yitannosi; xontannosi; qacifattannosi.

³³ Lichetenni gantusihu gedensaanni shitannosi. Ikkollana sayikki barra ka"anno» yii.

³⁴ Rosaanosi kayinni coyi'rino coyi baalu giddonni mittoreno dibuuxxino. Coyi'ri coyi go'le noonsa; ma yiinorono diaffino.

YESUUSI IYYAARKOTE MITTO ILLIWEELO HURSI

³⁵ Yesuusi Iyyaarko gamba yii yannara, mittu illiweelu mitore uyinasira doogote gama ofolle huucci'ranni no.

³⁶ Mulesiinni hige sa"anni noohunnita lowo manni huuro macciishshe, «Kuni maati?» yee xa'mi.

³⁷ Mannuno, «Kuneeti, Naaziretete Yesuusi kawaanni higge sa'anni no» yite kultusi.

³⁸ Hatte yannara illiweelu, «Daawiti Beetto Yesuusa, eeggakkiitina maarie!» yiisi.

³⁹ Alba hige ha'ranni noo manni, «Sammi yii!» yee rufisi. Isi kayinni albinni roore qoonqosi naggi asse, «Daawiti Beetto eeggakkiitina maarie!» yii.

⁴⁰ Kunnira Yesuusi uurre, «Anewa abbesi» yee hajaji. Illiweelo mancho haa'ne abbineenna Yesuusi,

⁴¹ «Ma assammohera hasi'ratto?» yee xa'misi. Illiweeluno, «Mooticha'ya, la"ammora hasi'reemmo» yii.

⁴² Yesuusino, «Lai! Amma'nakki gatissinohe» yiisi.

⁴³ Manchuno hakkawoyintenni ille fa'niteennasi lai. Maganono galatanni Yesuusi hoode ha'ri. Mannu baaluno konne coye lae Magano galati.