LUQAASI 13 - Qullaawa Maxaafa

AAGINTAAWA HOONGIRO BA'NANNI

¹ Hatte yannara gamu manni Yesuusiwa dagge, Philaaxoosi Galiilu manna shiinotanna mundeensano kakkalonsa ledo karsiisinota kultusi.

² Yesuusi qole, «Kunni Galiilu mannira tini bao iillitinohu wolu manni Galiilunnihunni roore cubbo loosseennaatini?

³ Dee'ni, dihattooti; cubbo'ne aagintaawa hoogginiro ki'neno ba'inanni.

⁴ Selihoomihu kinchu huxxi aanaho toe shiihu tonaa settu mannire ma yitinanni? Insa Yerusaalamete hee'ranno manni baalunni roore cubbaataamma ikkitinoha lawanno'neni?

⁵ Dee'ni, dihattooti; cubbo'ne aagintaawa hoogginiro, ki'neno ba'inanni» yiinsa.

LAALTANNOKKI BALASE LAWISHSHA

⁶ Hakkunni gedensaanni Yesuusi masalsanni, «Mittu manchira woyinete haqqe darga kaansoonniti mitte balasete haqqicho noosi. Laalo adhara maranno woyite, aanaho mitturino dino.

⁷ Kunnira gatesi loosannohura, ‹Tenne balase aaninni laalo adhammora sase diro wo'ma hodhoommo; ikkollana mitte laalono diafi'roommo. Xa ise murte huni; mulla baatto mayira mooshshitanno› yiisi.

⁸ «Gatesi loosannohu kayinni, ‹Mooticha'ya, hanni konne diro calla agari. Qooxeessase loose ha'rishsha woreemmo;

⁹ daanno dirira laalo uyituro danchaho. Laalo aa gibburo kayinni murantanno› yiino» yii.

YESUUSI UKKITTE MANCHO FOOLIISHSHOTE BARRA HURSI

¹⁰ Fooliishshote barra Yesuusi mittu xaadu mini giddo rosiisanni no.

¹¹ Tonaa sette diro wo'ma battete ayyaani amade hallo ukkiseenna heedhanno mancho no. Hallo ukkitino daafira horonta subbe uurra didandiitanno.

¹² Yesuusi ise afe woshshe, «Tee mancho, dhibbikkinni hurootta» yiise.

¹³ Angasi aanase woreenna, hakkawoyintenni subbe uurritu; Maganono galaxxitu.

¹⁴ Fooliishshote Barra hursinohura, xaadu mini roorrichi hanqe mannaho, «Lamalate giddo loosunnihu leyu barri no. Hatte barruwanni daggine hurre; Fooliishshote Barra kayinni di"ikkanno» yiinsa.

¹⁵ Mootichu qole, «Ki'ne lawisiisaano, Fooliishshote Barra handosi woy harrichosi hadirinni tire waa hayikkisi'rara adhe ha'rannokkihu nooni?

¹⁶ Tini Abirihaami ilama ikkitino mancho, tonaa sette diro wo'ma Sheexaanu usureenna heedhinoti, usurantinowiinni Fooliishshote Barra tidhama dihasiissannose?» yiinsa.

¹⁷ Yesuusi tenne qolonni qoxxissannosire baala irraawisi. Mannu kayinni isi assino maalale baalatenni hagiidhi.

SHIIMU GUMI LAWISHSHA

¹⁸ Yesuusi lede, «Maganu Gashshooti maricho lawanno? Woy mayinni masalseemmo?

¹⁹ Maganu gashshooti manchu haa're gate wixinoha shiima guma lawanno. Gumu mu're haqqicho ikki. Ceano sinnate aana mine mi'nitu» yii.

GAMAANCHU LAWISHSHA

²⁰ Yesuusi lede, «Maganu Gashshoote mayinni masalseemmo?

²¹ Mitte mancho hongoonni abbichi hoqe itate iillanno gede wortino gamaancho lawanno» yii.

RUUKKASHSHO WAALCHO

²² Hakkunni gedensaanni, Yesuusi Yerusaalame ha'ranni, katammatenna qachuwate giddoonni hige rosiisanni sai.

²³ Hattenne giddo mittu manchi, «Mooticha, gatannohu shiima mannaatini?» yee xa'mi. Yesuusi qole,

²⁴ «Ruukkashsho waalcho higgine eate, wolqa'ne uyitu deerrinni jawaatte; kuleemmo'nena, hakko waalchi widoonni hige eate lowo manni hasi'ranno; ea kayinni didandaanno.

²⁵ Minu anni kae waalcho cufanno. Ki'ne gobbaanni uurritine woshshitinanni, ‹Mooticha, ninkeetina faninke!› yitinanni. Isi qole, ‹Maminni dagginoonniro diegennoommo'ne› yaanno'ne.

²⁶ «Ki'neno, ‹Ate ledo intoommo; angoommo. Kataminkerano rosiisoottonke› yitine qoltinanni.

²⁷ «Isi daware, ‹Maminni dagginoonniro diegennoommo'nena, ki'ne bunshe loossinoonniri baalu anewiinni faffe!› yaanno'ne» yiinsa.

²⁸ Yesuusi lede, «Abirihaami, Yisihaaqi, Yaiqoobinna himanaano baala Maganu Gashshooti giddo affinanni; ki'ne kayinni gobbaanni tugantine gattinanni woyite, wi'lanna hinkote quruuxa ikkanno'ne.

²⁹ Hakka woyite mannu soojjaatinni galchiminni, aliyyenninna wodiidinni daye, Maganu Gashshooti giddo jilaho ofollanno.

³⁰ Kunnira albiidiri gedensiidire, gedensiidiri albiidire ikkitanno» yii.

YESUUSI YERUSAALAMETE DAAFIRA WI'LI

³¹ Hatte yannara gamu Farisooti Yesuusiwa dagge, «Heeroodisi shaahera hasanni noohena, kawiinni ka'e wolewa ha'ri» yitusi.

³² Yesuusi qole, «Hadhine hakko yeedaalchira, ‹Techonna ga'a durriisa fushsheemmo; dhiwantinoreno hurseemmo. Sayikki barra looso'ya gudeemmo yiino› yitine kullesi.

³³ Ikkollana, himanaanchu Yerusaalamete ikkinnina wolewa direyannona, techonna ga'a, oyimbarrano doogo'ya ha'ra hasiissannoe.

³⁴ «Yerusaalame, Yerusaalame, himanaano shaattati, atewa sonkoonnireno kinnatenni awwaalattati, lukkicho caacurrese qoolise giddo hanqafidhannohu gede, oosokki me"e hige hanqafammora hasi'rummo. Atinna mannikki kayinni dihasidhinoonni.

³⁵ Kunnira, mini'ne onanno. Halaale kuleemmo'nena, ‹Mootichu su'minni daannohu maassaminoho› yitina geeshsha ane horonta diaffinannie» yiinsa.