LEEWAAWOOTA 8 - Qullaawa Maxaafa

QEESIMMATE BUURAMA SEERA

¹ Kaaliiqi Musera,

² «Aarooninna labballi oososi Xaadu Dukkani xullichira massitine, qeesimmate uddano, buurranni zayite, cubbu kakkalora booto, 2 ge'rechu goconna shiishinokki tima aanaho worroonni masoowe haadhine abbe;

³ manna baalano Xaadu Dukkani xullichira gamba asse» yii.

⁴ Museno Kaaliiqi hajajinosi gede assi. Mannu Dukkanu xullichira gamba yeenna,

⁵ «Kaaliiqi hajajino hajajo tenneeti» yiinsa.

⁶ Museno Aarooninna oososi alba qole shiqqi asse, hayishshidhanno gede assinsa.

⁷ Aaroonira qeesimmate qamisenna kaabba uddisiise, halloho hiito qodhisiisi; hakkunni aanano, Efuudi yinannita gagasu uddano lede, goondoonni hiito hallisira usuri.

⁸ Hatti Efuudi yinanni uddano gagasoho kiise afidhinote. Kaaliiqi hedo egensiisannore Uriiminna Tumiimi yinannire hattenne kiisera wori.

⁹ Kaaliiqi hajajinosinte gede, Muse Aarooni Kaaliiqira aamaminoha ikkasi egensiisannoha culku irra aanaho worroonniha xaanxoonni koffiya umoho worisi.

¹⁰ Museno buurranni zayite haa're, Dukkanu giddo noore baala buuri. Kunni garinni baalanka Maganoho baxxinoha assi.

¹¹ Shiima zayite haa're kakkallanni darga 7 hige wixi; Maganoho qullaawa assate uduunnu baalu aananna uduunne hayishshinannitera lekkaame gawate aana wixi.

¹² Maganoho baxxinoha ikkanno gede Aarooni umirano zayite duni.

¹³ Kaaliiqi hajajinosi garinni, Muse Aarooni ooso alba qole shiqqi asse, qeesimmate qamiseno uddisiise, hiito hallinsara qodhisiise, addi koffiya umoho worinsa.

¹⁴ Hakkunni gedensaanni, Muse cubbu kakkalora middicha haa're abbeenna, Aarooninna oososi angansa bootu umi aana wortu.

¹⁵ Muse middicha gorre, kakkallanni dargi Maganoho baxxinoha ikkanno gede, shiima mundee qubbichunni haa're kakkallanni darga shoolente maddera noo buuddara buuri; gattino mundee kakkallanni dargira woroonni duni. Kunni garinni kakkallanni darga keereense Maganoho baxxinoha assi.

¹⁶ Qoleno godowiru cooma, mulenna aanasi noo cooma, hattono qaccete afale haa're kakkallanni darga shilqishi.

¹⁷ Kaaliiqi hajajinosinte gede, Muse gatino maala, gogunna helleete ledo qachaho gobbaanni fushshe giiri.

¹⁸ Muse shilqote kakkalora ikkannoha ge'rechu goco shiqisheenna, Aarooninna oososi angansa gocu umi aana wortu.

¹⁹ Muse goco gorre, mundee kakkallanni darga shoolunku midaadira wixi.

^20-21 Kaaliiqi hajajinosinte gede, ge'rechu maala danu danunkunni babbade, godowirenna badhiidi daduwe hayishshihu gedensaanni umo, coomanna maala baala mitteenni kakkallanni darga masse shilqishi. Tenne kakkalo foolino Kaaliiqira tashshi yaannoha ikkanno.

²² Muse layinkimeeshsho qeesimmate buurranni seerira ikkannoha wole ge'rechu goco shiqisheenna, Aarooninna oososi angansa gocu umi aana wortu.

²³ Muse goco gorrihu gedensaanni shiima mundee haa're, Aaroonita qiniiticho macca qaccera, qiniiticho angasi qubbichi lowiidihuranna qiniiticho lekkasi qubbichi lowiidihura kisiisi.

²⁴ Aarooni ooso alba qole shiqqi asse, shiima mundee haa're qiniiticho maccansa qacce, qiniiticho angansa qubbicho lowiidihanna qiniiticho lekkansa qubbicho lowiidiha kisiisi. Gattino mundee, kakkallanni darga shoolunku midaadira wixi.

²⁵ Farru cooma, godowiru cooma, qaccete afale, mule, aanasi noo coomanna qiniiticho haye haa're,

²⁶ Kaaliiqira shiqinshannita shiishshukkinni ganne saffu aana worroonni timma sasunku garite giddonni mitto mitto haa're, coomunna hayu aana wori.

²⁷ Tenne sagale baala masse Aarooninna oososi anga wori; insano qolte Kaaliiqira addi fushshaate assite shiqishshu.

²⁸ Hakkunni gedensaanni, Muse sagale angansanni haa're, Kaaliiqira kakkallanni darga shilqote fushshaati aana masse shilqishi. Kuni fushshaati qeesimmate buurama seerira ikkannoho. Isino Kaaliiqira tashshi yaannoho.

²⁹ Kaaliiqi hajajinosinte gede, Muse umisi qeechasi ikkinoha rachote maala haa're, Kaaliiqira addi fushshaate asse shiqishi.

³⁰ Qoleno Muse shiima buurranni zayitenna kakkallanni darga noota shiima mundee haa're, Aarooninna oososi aana, qoleno uddanonsa aana wixi; hatto assatenni Muse insanna uddanonsa Kaaliiqira baxxitinore assi.

³¹ Muse Aarooniranna oososira, «Maala Xaadu Dukkani nafara gaffe; hakkiicho, ‹Aarooninna oososi itto?› yine hajanjoonnie garinni, qeesimmate kakkalora saffeho worre shiqinshoonni timi ledo itte.

³² Gatino maalanna tima giirre;

³³ qeesimmate buuramate seeri wo'ma geeshsha 7 barra hakko Xaadu Dukkani nafara keeshshe.

³⁴ Cubbo'ne agursiisate Kaaliiqi hajajinore techo wonshinoommo;

³⁵ Kaaliiqi hajajinore baala wonshitinanni, 7 barranna 7 hashsha wo'ma Dukkanu nafara keeshshe. Hatto assa hoogginiro kayinni reyitinanni. Tini baala Kaaliiqi hajajinoe hajajooti» yii.

³⁶ Aarooninna oososi, Kaaliiqi Muse widoonni qole hajajinore baala wonshitu.