LEEWAAWOOTA 7 - Qullaawa Maxaafa

ASSINOONNI SAORA SHIQINSHANNI KAKKALO

¹ «Lowo geeshsha qorombannita sao hoo'late kakkalo shiqinshanni seeri kunninni aane nooho:

² Tenne kakkalora shiqinshanni saada, kakkalote dargira aliyyeenni shilqote kakkalora gorrinanniwa massine gorrinona; mundeeno kakkallanniwa shoolente maddera winxona.

³ Cooma baala godowiru coominna farru ledo,

⁴ lamenka mulenna aanansa noo cooma baala, hattono qaccete afale kakkallanni dargira shiqinshona.

⁵ Qeesichu anera shilqote kakkalo asse kakkallanni darga shilqishona. Tinino sao hoo'late kakkalooti.

⁶ Qeesootu sircho ikkinohu labbaahu baalu tenne kakkalo ita dandaanno; lowo geeshsha qorombanniha ikkino daafira, Xaadu Dukkani mule tenne hajora hendoonniwa qullaawa darga massite ittona.

⁷ «Cubbunna saote daafira assinanni kakkalo seeri mittoho. Shilqinshanna gatino maala kakkalino qeesichi itona.

⁸ Kakkalloonni saada goga, shilqote kakkalo shiqishanno qeesichi adhona.

⁹ Booso dumboonniha, mixashshote gannoonniha woy xiltaame mixashshora rainsoonni timanna gidu fushshaate shiqishanno qeesichira uyinona.

¹⁰ Zayite worroonni gide ikko, callicho gidu fushshaate baala qeesootu taalo beeqqitona.

MITTIMMATE KAKKALO

¹¹ «Anera shiqinshanni kakkalo mittimmannihu seeri kunninni aane nooho:

¹² Mittu manchi anera galatu kakkalo shiqishanno woyite, saadate ledo shiishshinokkita liiqo bullee zayitetenni liinse gannoonniha 2 du'manna 1 shaalado tima zayite aanaho buurreenna shiqishona.

¹³ Qoleno, galataho ikkitanno kakkalo mittimmannitera, shiisheenna gannoonni tima shiqinshona.

¹⁴ Shoolunku gari timma aaninni mitto mitto haa're, anera addi kakkalo asse shiqishona; tenne timmano, mittimmate kakkalo mundee kakkallanni darga wixanno qeesichira uyinona.

¹⁵ Galataho shiqinshanniha mittimmate kakkalo maala, hakko barra inte gundo ikkinnina layinki barrira saoonke.

¹⁶ «Shiqinshanni kakkalo xanonnita ikkituro, woy banxe shiqinshannita ikkituro, hakko barra intona; woy gatturo layinki barra intona.

¹⁷ Sayikki barra iillituro kayinni giirre hunnona.

¹⁸ Mittimmate kakkalo maali sayikki barra itamiro, kakkalo asse diadheemmo; tini kakkalo battaabbino daafira, shiqishi'rinohura kakkalo ikkite dikiirantannosi. Konne maala sayikki barra itannohu baalu battaawanno; saosinnino dikeeraawanno.

¹⁹ «Lagaawinorichi kisino maala giirro ikkinnina intoonke. Seeru garinni keeraa'me noo manchi baalu wole maala itona.

²⁰ Ikkollana kayinni, mittu manchi keeraa'mikkinni mittimmate kakkalora shiqinshoonni maala itiro, manni'ya ledo dikiiramanno.

²¹ Aye manchino seeru garinni keeraa'minokki manna woy battaabbino saada woy lagaawinoricho kise hee're, anera shiqinshoonniha mittimmate kakkalo maala itiro, hakku manchi manni'ya ledo dikiiramanno» yii.

MUNDEETE LEDO NOO MAALANNA COOMA ITA HOOLLOONNITE

²² Kaaliiqi Musera,

²³ «Israeelete mannira togo yite kulinsa: Lalunniha, ge'reewunnihanna meu cooma ittinoonte.

²⁴ Reyitinotenniha, woy moyichu shiino saada cooma wole hajara hosiinso ikkinnina horontanni intoonke.

²⁵ Kaaliiqira shilqinshara abbinoonni saada cooma itanno manchi, manni'ya ledo dikiiramanno.

²⁶ Heedhiniwano heedhine, ceannitanna saadate mundee saga'litinoonte.

²⁷ Mundee saga'lannohu baalu, manni'ya ledo kiiramoonke» yii.

QEESICHU QEECHA

²⁸ Kaaliiqi Musera,

²⁹ «Israeelete mannira togo yite kulinsa: Mittimmate kakkalo shiqishannohu baalu, gamisa addi kakkalo asse anera shiqishona.

³⁰ Shilqote kakkalo shiqishannohu, isi umisi haa're anera shiqishona; cooma rachote ledo addi fushshaate asse anera shiqishona.

³¹ Qeesichu cooma kakkallanni darga shilqishona. Racho kayinni baalunku qeesootite.

³² Qiniiticho haye kayinni, baddine qeesichaho uuyye.

³³ Mittimmate kakkalora mundeenna cooma shiqishshanno qeesooti, qiniiticho haye uminsara adhitona.

³⁴ Israeelete manni mittimmate kakkalora shiqishannohu aaninni, itannokki gede hooloommo rachonna hayu qeesootaho addi qeechansaati; Israeelete manni konne wo'manka woyite qeesootaho oona» yiisi.

³⁵ Qeesimmatenni Kaaliiqira soqqantara shiqqanno barrinni kayise, Kaaliiqira shilqote kakkalora shiqinshoonnihu aaninni Aarooniranna sirchisira uyinannihu qeechu seeri aane nooho:

³⁶ Qeesootu buurantu barrinni kayise, shilqote kakkalora shiqinshoonnihunni, Aarooniranna sirchisira hegere geeshsha uyinanni gede Israeelete manna hajajinohu Kaaliiqaati.

³⁷ Kunnira, shilqote kakkalo, gidu fushshaati, cubbu kakkalo, sao hoo'late kakkalo, qeesimmate buurama kakkalonna mittimmate kakkalo seeri konneeti.

³⁸ Israeelete manni kakkalo shiqishanno gede kulinsa barra, Kaaliiqi Musera Siina Ilaalira halallitte gobbara uyinosi seeri konneeti.