LEEWAAWOOTA 17 - Qullaawa Maxaafa

MUNDEETE LEDO NOO MAALA ITA HOOLLOONNITE

^1-2 Kaaliiqi Muse Aaroonira, oososiranna Israeele baalantera aane noo seera kulanno gede hajajanni,

^3-4 «Israeelete giddonni ayino anera kakkalo shiqishate hede Xaadu Dukkani nafarira abba agure booto, ge'recho woy meicho wolewa masse gorriro, mundee dunasi saote kiirantannosi; isino manni'ya ledo dikiiramanno.

⁵ Kunni daafira, Israeelootu kakkaltanno kakkalo anewa abba hasiissannonsa. Konneno qeesichunniwa Xaadu Dukkaniwa abbite anera mittimmate kakkalo assite shiqishsho ikkinnina xawoho mullawa gorritoonke.

⁶ Qeesichuno mundee Xaadu Dukkani nafara noohura kakkalo'ya dargira wixona; coomano anera tashshi yaanno fooliha asse shilqishona.

⁷ Kunni albaanni anera ammanama hoogatenni meu golfara kakkaltu garinni, kunni ka'a aye kakkalono kakkala dihasiissannonsa. Kuni insaranna gedensiidi ilama baalantera hegere seera ikkonsana.

⁸ «Qolteno, shilqote kakkalo woy wole kakkalo kakkalannohu Israeelichano ikko giddonsa hee'rannohu manni gobba manchi,

⁹ Xaadu Dukkani nafara anera kakkalo shiqisha hoogiro, hakko manchi manni'yawiinni badame bao.

¹⁰ «Giddonsa hee'rannohu Israeelichano ikko wole gobba manchi, mundeete ledo noo maala itiro, ani dibaxeemmosi; manni'ya ledono dikiireemmosi.

¹¹ Kalaqamu lubbo mundeete giddo noo daafira, kakkallanni darga cubbo agursiisate mundee oommo'ne; mundee umise lubbo ikkitino daafira, mannu lubbora cubbo agursiissanno.

¹² Kunnira, Israeeloota: Ki'ne giddonni ayeno mundeete ledo noo maala itoonke; giddo'ne hee'rannohu wole gobba mannino mundeete ledo noo maala itoonke.

¹³ «Intanni saada woy cea ugaaxe amadinohu, Israeelicha ikko giddo'ne hee'rannohu wole gobba manchi, mundee giddonni dune, aanaho bushsha ganona;

¹⁴ kalaqamu baalu lubbo mundeete giddo no. Kunni daafira, Israeeloota, ‹Mayi kalaqami maalano mundeete ledo ittinoonte; itannohu baalu manni'ya ledo dikiiramanno› yoommonsa.

¹⁵ «Reyinoha woy moyichu shiinoha itannohu Israeelicha ikko wole gobba manchi, imaanasinna bisosi hayishshi'rona; hawarra geeshshano lagaawinoha ikko; hakkunni gedensaanni keeraa'manno.

¹⁶ Imaanasinna bisosi hayishshi'ra hoogiro kayinni, loosino cubbira xa'mamanno yite kulinsa» yii.