LEEWAAWOOTA 16 - Qullaawa Maxaafa

CUBBO AGURSIISATE BARRA

¹ Lame Aarooni ooso Kaaliiqi albira shiqqi yite reyituhu gedensaanni Kaaliiqi Musera,

² «Ani maarote barcimi aana gomichunni leelleemmona, rodiikki Aarooni dukkote giddo Qullaawa Holge Taabootu aana noohuwa maarote barcimiwa hasiisanno yannara calla eanno gede kulisi. Hajajama giwiro kayinni reyanno.

³ Aarooni Qullaawu dargira eanno yannara, cubbu kakkalora 1 middicha, shilqote kakkalora 1 ge'rechu goco haa're abbona.

⁴ Qullaawu Holgira eara albaanni biso hayishshi're, fuuttunni gannoonnita giddoyidi uddanonna qamise uddi'rona; luko lukona; hiito hallisira qodhona; umisirano xaanxoonni koffiya wodhona. Kuri baalu qullaawa imaanaati.

⁵ «Israeelete manniwiinni cubbu kakkalora 2 meichu goco, shilqote kakkalora 1 ge'rechu goco haa're abbona.

⁶ Aarooni umisiranna minisi mannira cubbo agursiisate, middicha cubbu kakkalo asse shiqishona;

⁷ lamenka meichu goco masse Xaadu Dukkani nafara ane albaanni uurrisona.

⁸ Aarooni 2 kinna haa're, mitto hixa Kaaliiqira, layinki hixa facci assine agurranni gocira ganona.

⁹ Hixunni anera iillino goco abbe cubbu daafira kakkalona.

¹⁰ Layinkiha ane albira abbe, cubbo agursiisate halallitte gobba qole facci asse agurona.

¹¹ «Aarooni umisiranna minisi mannira cubbo agursiisate, middicha kakkalanno woyite,

¹² ane albaanni noohu kakkalote darginni haa'noonni kashilo wonshinoonni baccicho anga amadona; 2 hoowo ikkannoha maniissinoonniha su'naanno hixaana haa're abbona; kore baala haa're dukkote giddoonni noohuwa Qullaawu Holgira eona.

¹³ Reyannokki gede, hixaanu wiliile maarote barcima guggushshitanno gede, ane albaanni hixaana giirate aana worona.

¹⁴ Middichunnita shiima mundee haa're, maarote barcimira albiidira angichunni wixona; qoleno, Gondooru Taabootira albaanni angichunni 7 hige wixona.

¹⁵ «Meichu gocono mannu kakkalo cubbunnitera gorrona; mundeeno dukkote giddora Qullaawu Holgira masse, middichu mundee assinte gede, maarote barcimira albaanninna Gondooru Taabootira albaanni wixona.

¹⁶ Togo assatenni Qullaawa Holge keereense, Israeelete battenna bunshensa baala agursiisanno. Konne assannohuno, Xaadu Dukkani lagaawinohura mannu hee'ranno qachi giddo noo daafiraati.

¹⁷ Aarooni cubbo agursiisara Qullaawu Holgira e"e umisiha, minisi mannihanna Israeelete manni baalunku cubbo agursiise fula geeshsha ayino Xaadu Dukkani giddora eoonke.

¹⁸ Hakkiinnino fule, kakkalote dargira dayona; middichunnitanna gocunnita shiima mundee haa're, kakkallanni darga shoolente maddera noo buuddara kisiisona.

¹⁹ Israeelootu batteessitinoha keereensatenna qullaawa assate, mundee haa're kakkallanni darga angichisinni 7 hige wixona.

²⁰ «Aarooni Qullaawa Holge, Xaadu Dukkaniranna kakkallanni darga cubbo agursiisate seera wonshihu gedensaanni, lubbotenni nooha facci assine agurranniha meichu goco haa're shiqishe,

²¹ lamenta angasi gocu umi aana worona. Aanasi Israeelootu sao, bunshenna cubbo baala ifaate, gocu umi aana duunona. Gocono, tenne hajara worroonni manchi halallitte gobba qole shorre agurona.

²² Gocu cubbonsa baala duqqe halallitte gobba hige ha'ranno; manchuno goco mannu hee'rannokkiwa qole shorre agurona.

²³ «Hakkunni gedensaanni, Aarooni Xaadu Dukkaniwa mare, Qullaawu Holgira eanno woyite uddi'rinoha fuuttu imaana fushshe hakko woranno.

²⁴ Qullaawa Darga mare bisosi hayishshi're, umisi imaana uddi'rona; hakkiinni fule umisihanna mannu cubbo agursiisate, shilqote kakkalo 1 umisira 1 mannaho yee shiqishona.

²⁵ Cubbu kakkalora shiqinshoonni saadaha cooma kakkallanni darga masse shilqishona.

²⁶ «Facci assine agurranni goco haa're ha'ranno manchi galagale qacha eara albaanni, imaanasinna bisosi hayishshi'rona.

²⁷ Middichunna cubbo agursiisate mundeesi Qullaawu Holgira eessinanni goci meichunnihu goga, maalanna godowire qachaho gobbaanni fushshine giirrona.

²⁸ Kore giiranno manchino galagale qacha eara albaanni, imaanasinna bisosi hayishshi'rona.

²⁹ «Ki'nera uyinoonnihu hegere seeri konneeti: Lamalki agani eihunni tonnikki barra, ki'neno ikke giddo'ne hee'rannohu wole gobba manni sagale ittinoonte; mittoreno loossinoonte;

³⁰ hakku barri cubbi'ne baalunku agurameenna, ane albaanni keeraa'mitinanni barraati.

³¹ Kuni barri, Qullaawa Fooliishshote Barra ikkino daafira, mannu sagale itoonke; mitto loosono loosoonke. Kuni seerino dagganno ilama geeshsha agarranniho.

³² Qeesootu qara ikkate annisi darga amade buuraminohunna shoomaminohu, cubbo agursiisona; isino qullaawa imaana uddi'rona.

³³ Qullaawa Holge, Xaadu Dukkananna kakkalote darga mare qeesootahonna mannu baalunkura cubbonsa agursiisona.

³⁴ Kuni hegerera seera ikko'ne; kunni seeri garinni, dirunni mitte hinge mannu baalunku cubbo agursiinsona» yiisi. Museno Kaaliiqi hajajinosi gede assi.