LEEWAAWOOTA 12 - Qullaawa Maxaafa

MEYATI ILTUHU GEDENSAANNI KEERAA'MITANNO GARA

¹ Kaaliiqi Musera,

² «Israeelete mannira, ‹Meyati labbaaha ilturo, godowu daannose yanna gede, 7 barra lagaabbanno.

³ Ilamino qaaqqo settikki barra barcimshiinshona.

⁴ Ilaancho mundee higgeennase keeraa'mita geeshsha, 33 barra keeshshitona; co'o yite keeraa'mita geeshsha qullaawaricho kissoonke; Qullaawu Minirano e'oonke.

⁵ Meyata iltinoha ikkiro kayinni, godowu dayinose yanna gede, lame lamala lagaabbanno; mundee higgeenna keeraa'mita geeshsha, 66 barra keeshshitona.

⁶ «‹Mitte mancho labbaaha woy meyata ilturo, keeraa'mitanno yannara, mittu diriha ge'rechu goco shilqote kakkalora, lemboolcho woy bukukkaama cubbu kakkalora haadhe Xaadu Dukkaniwa abbite qeesichaho uyitona.

⁷ Qeesichuno fushshaatese haa're, anera shiqishe seera wonshihu gedensaanni keeraa'mitanno. Labbaaha woy meyata iltino mancho, wonshitanno woga tenneeti.

⁸ Mancho ge'rechu goco abbitanno wolqa hoogguro, 2 lemboolcho woy 2 bukukkaama haadhe, mitte shilqote kakkalora, mitte cubbu kakkalora shiqishshona. Qeesichu haa're lagose hoolate woga wonsheenna, seeru garinni keeraa'mitanno› yiinsa» yii.