LEEWAAWOOTA 1 - Qullaawa Maxaafa

SHILQOTE KAKKALO

¹ Kaaliiqi Muse woshshe, Xaadu Dukkanira hee're kunninni aane noo coye coyi'rinosi:

² Israeelete, «Ki'ne giddonni ayino ane Kaaliiqira saadate fushshaate aanno yannara lalu, ge'reewu woy meu giddonni shiqishona.

³ «Shilqote kakkalora shiqishanno fushshaati lalunniha ikkiro, ani adheemmo gede, muso afi'rinokkiricho Xaadu Dukkani nafarira haa're abbona.

⁴ Shilqote kakkalo asse shiqishanno saada umi aana angasi woreenna, cubbosi agurate adheemmo kakkalo ikkitanno.

⁵ Bootono ane albaanni gorrona; Aarooni sircho ikkitinori qeesootu mundee anewa shiqishshuhu gedensaanni, massite Xaadu Dukkani nafara kakkallanni darga shoolente maddera wixxona.

⁶ Hakkunni gedensaanni shiqishino manchi goga dule hoolona; maalano dani danisinni fushshona.

⁷ Manchu togo assanni hee'reenna, qeesootu kakkallanni darga haqqe duunte giira giirtona.

⁸ Qeesootu murmurroonni maala, umonna cooma aanaho ledde duunnoonni haqqe aana wortona.

⁹ Hakku manchi, bootunniha godowirenna dadubba wayinni hayishshona; qeesichuno fushshaate baala gudise kakkalote darga masse shilqote kakkalo asse shiqishona; tenne giirre shiqinshanni kakkalo shilqonnite fooli anera tashshi yaannoha ikkanno.

¹⁰ «Shilqote kakkalora ge'reewu woy meu giddonni shiqishannoha ikkiro, muso afi'rinokki goco abbona.

¹¹ Kakkalo shiqishannohu, kakkallanni dargira aliyye ragaanni ane albaanni abbe gorrona; qeesootu mundee massite kakkallanni darga shoolente maddera wixxona.

¹² Shiqishinohu maala dani danisinni fushshona; qeesichuno umonna cooma lede kakkalote darga bubbara worroonni haqqe aana worona.

¹³ Godowirenna dadubba wayinni hayishshona. Qeesichu fushshaate baala abbe kakkalote darga shilqishona. Tenne shiqinshanni kakkalo shilqonnite fooli anera tashshi yaannoha ikkanno.

¹⁴ «Anera shilqote kakkalora shiqishanno fushshaati ceanniha ikkiro, bukukkaama woy lemboola haa're abbona.

¹⁵ Qeesichuno kakkallanni dargira masse umo micciirona; taino umono kakkalote darga masse shilqishona; mundeeno kakkalote dargi qooxeessira coccossona.

¹⁶ Ceate daammanna qoolla bade hoole kakkallanni dargira soojjaatoonni, buluulo dunnanniwa masse tugona.

¹⁷ Qoolla lamewa facona; kayinnilla gudise babbadoonke; qeesichuno kakkalote darga bubbanno giira aana shilqishona. Tenne shiqinshanni kakkalo shilqonnite fooli anera tashshi yaannoha ikkanno.