LAYINKI TESELONQE 3 - Qullaawa Maxaafa

HUUCCATTO BAALUNKU COYI'RA DANCHATE

¹ Roduuwa'ya, ki'newa ikkinonte gede, Mootichu qaali baalankawa rahe hala'lannonna ayirranno gede Magano huuccenke.

² Baalunku ammanannoha ikkinokki daafira, bushunna shokkashshu manniwiinni ganteemmo gede huuccenke.

³ Mootichu kayinni ammanaminohona, jawaachishanno'ne; bushuwiinnino agaranno'ne.

⁴ Kulloommo'ne coye xaano albillitteno assitinanni gede Mootichunni addaxxineemmo'ne.

⁵ Mootichu wodana'ne Maganu baxilliwanna Kiristoosi cincawa qole xaaddeesso'ne.

LOOSO LOOSA HASIISSANNO

⁶ Roduuwa, cee'maleeyyenna kulloommonsa coye wonshitannokki ammanaasinewiinni baxxitinanni gede Mootichinke Yesuusi Kiristoosi su'minni hajanjeemmo'ne.

⁷ Ninke faale ha'ra hasiissanno'neta ki'ne umi'ne egentinoonni. Ninke ki'ne ledo hee'noommo woyite cee'maleeyye di"ikkinoommo.

⁸ Aye sagaleno mulla di"intoommo; ayerano duha ikkineemmokki gede hashshanna barra daafurranni diinaggaambe loonsoommo.

⁹ Hatto assinoommohu, ki'ne ninke faale hadhinara hasi'neeti ikkinnina, hasiisannonkere adhate doyicho hoonge di"ikkino.

¹⁰ Ki'ne ledo hee'nummo yannara, «Loosa baxannokkihu itoonke» yitanno wodho worroommo'ne.

¹¹ Togo yineemmohu ki'ne mereero mitu mitu cee'maleeyye noota macciishshinoommohuraati. Insa loosi'ra agurte wolu manni coyi giddora e'anni qaxxaamurtanno.

¹² Hattoo manni gabbi yee loosi'ranni sagale fushshi'ranno gede, Mootichu Yesuusi Kiristoosi su'minni hajanjeemmonsanna seejjineemmonsa.

¹³ Ki'ne kayinni roduuwa'ya, daafurrummo yitine dancha looso loosa cee'mitinoonte.

¹⁴ Tenne sokkanni amaalleemmo'ne amaale adhannokkihu hee'riro, wodana assitine la'e. Hattooha affiniro, saalfatona ledosi xaaddinoonte.

¹⁵ Ikkirono, roduu gede amaallesi ikkinnina diinu gede assitine la'inoontesi.

JEEFOTE DHAANSA

¹⁶ Keeru Mootichi umisi wo'manka woyite baalunku coyinni keere oo'ne. Mootichuno ki'ne baalunku ledo hee'ro.

¹⁷ Konne keere ani Phaawuloosi anga'yanni borreessoommo. Sokka'ya baalate giddo hee'ranno malaati konneeti. Borreesseemmohuno kunni garinniiti.

¹⁸ Mootichinke Yesuusi Kiristoosi elto ki'ne baalunku ledo heedho.