LAYINKI TESELONQE 1 - Qullaawa Maxaafa

¹ Maganu Anninkenna Mootichinke Yesuusi Kiristoosirira, Teselonqe beetekiristaane ammanaanora Phaawuloosi, Silaasinna Ximootewoosi sokkino sokka.

² Maganu Anninketinna Mootichu Yesuusi Kiristoosi eltonna keeri ki'ne ledo hee'ro.

KIRISTOOSI DAANNO WOYITE YAANNO YOO

³ Roduuwa'ya, ki'nenni kainohunni Magano wo'manka woyite galanteemmo. Galatano hasiissannonkete; galanteemmohuno, ammana'ne roore lophitanni noohuranna mimmiti'nera noo'ne baxillino lexxanni noo daafiraati.

⁴ Kunnira lowo qarrinna shetto iillitu'nerono, cincaaleeyyenna ammanatenni kaajjitinoonnire ikkitinoonnita kullanni, ninkeno wole ammanaano mereero hee'ne ki'nenni naaxxineemmo.

⁵ Kuni coyi baalu, Maganu yoo halaalaancho ikkitinotanna ki'ne qarra adhitinoonnihura Maganu gashshootira guuta manna ikkitinoonnita leellishanno.

⁶ Maganu halaalaancho yoo yaannoha ikkinohura, qarra kalaqqino'nere qarra abbe qorichishanno.

⁷ Xa qarra adhitinannirira ninke ledo fooliishsho aanno'ne. Hatto assannohu, Mootichu Yesuusi wolqaataame sokkaasinesi ledo wala yitanno giiranni gordunni daanno warooti.

⁸ Hatte yannara, Magano egentinokkirenna Danchu Duduwi Mootichu Yesuusihura hajajantannokkire qorichishanno.

⁹ Insa Mootichu albinninna wolqaataamu ayirrinyisiwiinni baxxite, hegere qoricha adhitanno.

¹⁰ Qorichansa adhitannohu, mannu baaluwiinni ayirrinye adharanna ammantinosiri baalu guwissasira daanno yannaraati. Ki'neno ninke kulloommo'ne sokka adhitinoonni daafira insa ledo kiirantinanni.

¹¹ Konne coye hedatenni ki'ne daafira wo'manka woyite huucci'neemmohu Maganinke, woshshino'ne heeshshora maltinoonnire ikkitinanni gedenna dancha coye assate noo'ne halchonna ammana'ne looso baala wolqasinni guuttinannire assanno'ne gedeeti.

¹² Mootichinke Yesuusi su'mi ki'nenni ayirranno gedenna ki'neno Maganinkenna Mootichinke Yesuusi Kiristoosi elto garinni isinni ayirritinanni gede Magano huuccineemmo.