LAYINKI SAAMUEELI 9 - Qullaawa Maxaafa

DAAWITINNA MEMFEBOSTE

¹ Mitto barra Daawiti, «Miteekke lubbotenni noohu nooro Yoonaataani daafira yee eleemmona, Saaooli maate giddonni gate lubbotenni noohu no ikka?» yii.

² Saaooli maate giddo Tsiiba yinannihu mittu soqqamaanchi no; isira Daawitiwa maranno gede kullisi. Daawitino, «Tsiiba yinannihu ateetini?» yee xa'misi. Tsiibano, «Mooticha'ya ee aneeti» yee dawari.

³ Moote Daawitino, «Maganu albaanni coyi'roommo garinni eleemmosina Saaooli maate giddonni gate lubbotenni noohu nooni?» yee xa'mi. Tsiibano, «Yoonaataani ooso giddonni mittu lekka naafichu Memfeboste yinanni beetti no» yii.

⁴ Mooteno, «Xa hiikko nooyya?» yee xa'mi. Tsiibano, «Lodebaari yinanniwa Amieeli beetti Makiiri mine no» yee dawari.

⁵ Moote Daawitino Memfeboste Lodebaarinni woshshe abbisiisi.

⁶ Saaooli beetti Yoonaataani ilinohu Memfeboste dayi yannara, Daawiti albaanni umo heeshshi yee Daawitira ayirrinye leellishi. Daawitino, «Memfeboste» yee woshshisi. Isino, «Mooticha'ya yee!» yii.

⁷ Daawiti, «Waajjitooti! Annikki Yoonaataani daafira yee eleemmohe; ahaahikki Saaooli baattono gudise qoleemmohe; barru baala sagale ledo'ya ofolte itatto» yiisi.

⁸ Memfeboste umosi lowo geeshsha heeshshi asse, «Mooticha'ya, konne reyino woshicho laweemmohura kageeshshi elle assattoe?» yiisi.

⁹ Hakkunni gedensaanni moote Daawiti Saaooli soqqamaancho Tsiiba woshshe, «Saaoolinna maatesi jajja baala mootichikki beetti beettira Memfebostera oommo.

¹⁰ Ati, oosokkinna soqqamaanokki mootichikki Saaooli mini manniranna soqqamaanosira loossine sagalete ikkanno jajja fushshe. Memfeboste kayinni barru baala sagale ane ledo ofolle itanno» yii. Hatte yannara Tsiibira 15 labballi oosonna 20 soqqamaano noosi.

¹¹ Tsiibano, «Moote'ya, ati hajajattoere baala wonsheemmo» yee dawari. Kunni garinni Memfeboste mootete ooso gede ikke sagaleno mootete ledo ofolle itanni hee'ri.

¹² Memfebostera Miika yinannihu wedellichu beetti noosi. Tsiiba maate baalanti Memfeboste soqqamaano ikkitu.

¹³ Lamenta lekka naafinohu Memfeboste kayinni mootenniwa gamba yee ledosi ofolle sagale itanni Yerusaalamete hee'ri.