LAYINKI SAAMUEELI 8 - Qullaawa Maxaafa

DAAWITI OLUNNI LOWO QEELLE AFI'RI

¹ Shiima yanna gedensaanni Daawiti Filisxeeme qase qeeli. Meteegi Aama yinanni Katamano angansanni adhi.

² Hakkiino aanche Moaaboota qase qeeli. Qafadantinoreno dirante barxa yitanno gede asse, sasu diri giddonni lame dira shii. Kunnira Moaabootu Daawiti angara higge giwire uyitusi.

³ Hakkunni gedensaanni Daawiti Efiraaxisi Wayi mule noo gobba amadara marino widoonni Sooriyu gashshooti giddo nooha Tsooba yinanni gobba moote Rehoobi beetto Hadadiezeeri qasi.

⁴ Daawiti Hadadiezeerire 1,700 faradaasinenna, 20,000 lafo qafadi. Gaare goshooshannoha 100 farado gatise, hakkuyi ka'i farado morgogeenya mure aguri.

⁵ Demaasiqote hee'rannohu Sooriyu manni Tsooba moote Hadadiezeeri kaa'late manna soyi yannara, Daawiti olanto 22,000 manna shitino.

⁶ Hakkunni gedensaanni Daawiti Sooriyu gobbara olanto kunseentannowa qixxeessi. Sooriyootuno angasira higge isira giwire uyitannore ikkitu. Kaaliiqi Daawitira ha'ri faro baalate qeelle uyisi.

⁷ Daawitino Hadadiezeeri ledo gashshaano anganni culku wonquwa haa're Yerusaalame abbi.

⁸ Qoleno Hadadiezeeri gashshinotenni Bexahinna Berotayi yinanni katammanni lowo camo adhi.

^9-10 Hamaati moote Tooi Hadadiezeeri ledo olamanni keeshshino daafira, Daawiti Hadadiezeeri olanto baala qeelinota macciishshe, keerunna hagiirru sokka iillishannosi gede beettosi Yoraami Daawitiwa soyi. Yoraamino Daawitira culkunni, birrunninna camotenni seekkinoonniha addi addi afansha haa're massisi.

^11-12 Moote Daawitino qeelino daga baalatewiinni: Sooriyunni, Moaabinni, Amooninni, Filisxeemetenna Amaaleqinni haa're abbino birranna culka, qoleno Hadadiezeeri anganni adhe dayinohu aaninni bade Kaaliiqi minira uyi.

¹³ Daawiti, Maxinete Lagichira 18,000 Edoomoota shee higi yannara, albinni roore maccaha ikki.

¹⁴ Edoomi gobba baalate olanto kunseentannowa seekki. Edoomootu baalu Daawiti angara higgu. Kaaliiqino Daawiti mariwa baala qeellenniha assisi.

¹⁵ Daawiti Israeele baalate moohe, manna taashshe halaalunni gashshi.

¹⁶ Tseruya iltinohu Iyoaabi olantosi roorrichaati. Ahiluudi beetti Iyosaafiixino ikkinore baala borreessannoho.

¹⁷ Akixoobi beetti Saadooqinna Abiyaataari beetti Ahimeleeki qeesootaho. Seeraya qole mootete mini borreessaanchooti.

¹⁸ Yoodahe beetti Beenaya Dawiitira gamba yitino agaraasinera roorrichaho. Daawiti oosono mootete mini amaalaasineeti.