LAYINKI SAAMUEELI 23 - Qullaawa Maxaafa

DAAWITI GOOFIMARCHOHO COYI'RINO QAALE

¹ Kaaliiqi rooriidiha assinohu, Yaiqoobi Magani moote ikkanno gede buurinohu, Israeelete manni mereero dancha faarso faarsannohu Isseyi beetti Daawiti coyi'rinohu goofimarchu coyi konneeti:

² Kaaliiqi Ayyaani ane widoonni hige coyi'rino; qaalisino afii'yara no.

³ Israeelete Magani coyi'rinoe; Israeelete goli anera, «Ane Magano waajjatenni taashshe gashshanno moote,

⁴ gomichu nookki arrishsho soodote gedeeho; baatto hayisso fushshitanno gede assitara, xeenu gedensaanni fultanno arrishsho gedeeho» yiie.

⁵ «Ane ledo hegere gondooro eino daafira, ba"annokki namoomanna, soorrantannokki hexxo aannoe. Halaalinta Kaaliiqi sircho'ya kunni garinni maassi'ranno; tini anera halcho'yaati; qeelle'yano iseeti; Maganuno addinta konne coye wonshannoe.

⁶ Bushuullu kayinni, tunge agurroonni uti gedeereeti; ayino mulla anganni diamadannoreeti.

⁷ Konne uta amadannohu, siwiilu uduunninna amaxxote daabbinni gamba asse, hakko hee'reennanni co'o asse giiranno» yii.

MACCARI DAAWITI OLANTO

⁸ Maccare ikkitinorihu Daawiti olanto su'mi kunninni aane no: Umihu, Tahikimi ilama ikkinohu Yosheebi-Bashebeeti. Isi, sasunku qara macca gaaddora albisaho. Kuni manchi olunniwa amaxxotenni 800 manna mitte hige shiino.

⁹ Kuri sasunku wolqaataammi giddonni layinkihu Ahoohi ga'rehu Doodo beetti Aliaazaariiti. Mitto barra isinna Daawiti olaho qixxaabbe noo Filisxeemoota qarrissino. Israeelete manni badhe hige xooqita,

¹⁰ Aliaazaari kayinni uurre angasi bisete ledo qa'mita geeshsha Filisxeeme shee gudi. Hakko barra Kaaliiqi lowo qeelle abbino. Olu uurrihu gedensaanni Israeelete manni xooqinowiinni galagale hige reeshshu aaninni olu uduunne mulqi'ri.

¹¹ Sasunku wolqaataammi giddonni sayikkihu kayinni Harari ga'rehu maccahu Aage beetti Saamiiti. Mitto barra Filisxeemootu missira winxanni baattora Leehi yinanniwa gamba yite no; Israeelete mannino Filisxeemete albinni xooqi.

¹² Saami kayinni hakko uurre, Filisxeemete ledo olami; hakko barrano Kaaliiqi lowo qeelle abbino.

¹³ Gide gamba assinanni yanna rakke heedheenna 30 wolqaataammi giddonni 3 Daawiti noowa Adulaami Goda dirritu. Hatte yannara, Filisxeemete olanto giddonni shiimu manni Refayimi Lagichira ofolle no.

¹⁴ Daawiti qiinshoonni gaari aana hee'reenna, Filisxeemete olanto giddonni mitte gaamo Beeteliheme amaddu.

¹⁵ Daawiti gobbasi sinsinnaawe, «Beetelihemete huxxi waalchi mule noo buichonni waa abbe hayikkisannoeha maminni afi'ro ikka?» yii.

¹⁶ Kunnira sasunku maccari wolqaataammu olanto Filisxeemete ollaa tayisse sa'e buichote giddonni waa hinkiilte Daawitira abbitusi; isi kayinni agara dihasi'rino. Ikkollana Kaaliiqira kakkalo ikkanno gede dunihu gedensaanni,

¹⁷ «Kaaliiqa'ya, konne waa agammora didandoommo; anera konne waa aga, lubbonsa hunte hadhino wolqaataammi mundee agate yaate» yee waa aga giwi. Kunni aleenni ikkino coyi kuri sasunku bareedda assitinoho.

¹⁸ Tseruya iltino ooso Iyoaabiitinna Abisaati. Abisa kuri sajjuunku olantora roorrichaho. Isino urdetenni 300 manni ledo olame baalanka shee gude, hakkuri sasunku wolqaataammi gede maccaha ikki.

¹⁹ Sajjuunku giddo lowo geeshsha maccaha ikkino daafira insara roorricha ikkino. Ikkollana, hakkuri sasu wolqaataammi geeshsha di"ikkino.

²⁰ Wolu bareedi qole, Qabitsieeli gobbahu Yoodahe beetti Beenayaati. Isino egennantinore 2 Moaabi olanto calla ikkikkinni, bullaame kaade dirritanni heedheenna fule balete giddora e"e, doobbiicho shee bareendesi leellishino.

²¹ Qoleno mittu Gibitsete manchi amaxxo anga adhe hee'reennanni, Beenaya kayinni siqqo amaxxe mare angasinni amaxxo qiqqishe haa're mancho hatte amaxxonni qase shiino.

²² Wolootu sasunku wolqaataammi assitinonte gede Beenaya leellishino bareende tenneeti.

²³ Isi sajjuunku wolqaataammi giddo egennaminoha ikkirono, hakkuri sasunku bareedi geeshsha di"ikkino. Daawitino iso agaraanosira roorricha asse wodhi.

^24-39 Sajjuunku giddo kiirantannori su'mi kunninni aane nooho: Iyoaabi rodii Asaheeli sajjuu mereero no. Beetelihemennihu Doodi beetti Elihanaani, Haroodootu Shaaminna Eliiqa, Felexichu Heletsi, Teqoichu Iqeeshi beetti Irra, Anatootichu Abieezeri, Hushichu Mebunayi, Ahoohichu Selmooni, Nexofichu Mahirayi, Nexofichu Beaananna beettisi Helebi, Biiniyaami gobba giddo Gibia ilama ikkinohu Riibayi beetti Itayi, Piriatoonichu Beenaya, Ga"aashi Lagichi mule ilaminohu Hedayi, Arabichu Ebialbooni, Barihuumichu Azimaaweeti, Shalbonichu Eeliyaahiba, Yasheeni ooso, Yoonaataani, Hararichu Shaama, Hararichu Shaarari beetti Ahiaami, Maakichu Ahaasabayi beetti Eelifeleexi, Giilichu Akixoofeeli beetti Eliaami, Qermeloosichu Heetsiro, Arabichu Pa"arayi, Tsooba gobbahu Naataani beetti Yigiaali, Gaadichu Baani, Amoonichu Tseleqi, Iyoaabira bagado duhannohu Be"eraatichu Nahirayi, Yatiirootu Irranna Gaareebi, Hitichu Ooriyooti. Kuri wolqaataammu olanto mitteenni sajjiina lamalaho.