LAYINKI SAAMUEELI 2 - Qullaawa Maxaafa

DAAWITI YIHUDAHO MOOHI

¹ Hakkunni gedensaanni Daawiti Kaaliiqa, «Mare Yihudu katamma giddonni mitto amadoni?» yee xa'mi. Kaaliiqino, «Ee marte amadi» yiisi. Daawitino, «Hiikkonne katama amado?» yee xa'mi. Kaaliiqi qole, «Kebirooni Katama amadi» yiisi.

² Daawitino lamunku meentisi ledo kae Kebirooni ha'ri. Meentisi Iyiziraeelitte Akinahoomiitinna Qermeloositte Naabaali galte Abigiyaati.

³ Qoleno Daawiti ledosi noo mannanna maatensa baala haa're hakkiira abbi. Insano marte Kebirooni qooxeessira noo katammara heedhu.

⁴ Yihudu mannino hakkiira daye, Daawiti buure Yihudu moote assisi. Geleaadi hee'rannohu Yabiisi manni Saaooli reeshsha haa're madaarinota Daawitira kulleennasi,

⁵ «Reeshshasi haadhine madaaratenni Mootichi'nera ammanantinoonnita leellishshinoonnihura Kaaliiqi maassi'ro'ne.

⁶ Qoleno Kaaliiqi shaqqillisinninna ammanamasinni towato'ne. Kunni assitinoonni coyira anino danchumma asseemmo'ne.

⁷ Xaate kaajje; jawaatte; mootichi'ne Saaooli reyino. Yihudu mannino ane buure mootensa assi'rinoe» yee sokkaancho soyi.

IYAABUSTE ISRAEELETE MOOHI

⁸ Saaooli olanto hajajaanchi Neeri beetti Abeneeri, Saaooli beetti Iyaabuste ledo Yordaanoosi Waa fule Mahinayimi yinanniwa xooqe ha'ri.

⁹ Abeneeri Iyaabuste Israeelete moohanno gede assi. Tini gobbano Geleaadi, Aseeri, Iyiziraeeli, Efireemiranna Biiniyaami ga'rete.

¹⁰ Saaooli beetti Iyaabuste Israeelete moohi yannara 40 diri manchooti. Isi 2 diro moohino. Yihudu manni kayinni Daawiti moohisi'rino.

¹¹ Daawiti Kebirooni teesso assi're Yihudu mannira 7 dironna darate moohi.

ISRAEELETENNA YIHUDU MEREERO KAINO OLA

¹² Neeri beetti Abeneerinna Saaooli beetti Iyaabuste ledo gashshaano Mahinayiminni ka'e Gebaooni Katama daggu.

¹³ Tseruya iltinohu Iyoaabinna wolootu Daawiti ledo gashshaano dagge Gebaooni Kofame mule xaaddu. Baalunku gaamo gaamotenni baxxite kofamete ka'aanna kawaanni ofoltu.

¹⁴ Hatte yannara Abeneeri Iyoaabira, «Manninkenna manni'ne giddonni wedella doorre fushshine olunni heewisantanno gede assino» yii. Iyoaabino, «Maahoyye assinosi!» yee dawari.

¹⁵ Kunnira Biiniyaami ga'renni Iyaabuste lekka ikkitinore 12 manna doorre, Daawiti widinnino 12 manna fushshine olaho xaadinsi.

¹⁶ Mittu mittunku manchi diinisi umo amade bise midashshisira xoroorrisi. Kunni garinni lemiina shoolunku manni mimmito shitu. Kunnira hattenne base, «Bisete baatto» yini.

¹⁷ Hakkunni gedensaanni lowo oli kaeenna Daawiti manni Abeneerinna Israeele qeeli.

¹⁸ Iyoaabi, Abishayinna, Asaheeli yinanniri sasunku Tseruya ooso hakkiicho no. Bullichimma dodannohu Asaheeli,

¹⁹ ka'a kawa higikkinni Abeneeri amadara shorri.

²⁰ Abeneeri badhe hige lae, «Asaheeli! Ateetini?» yii. Asaheelino, «Ee aneeti» yee dawari.

²¹ Abeneeri, «Ane shorra agurte, hatteentenni olantote giddonni mitto shorrite amadde angasi noore adhi» yiisi. Asaheeli kayinni ka'a kawa higikkinni iso lede shorri.

²² Abeneeri xaano, «Ane shorra aguri! Sheemmohe gede mayira ikkatto? Ate shuummoro rodiikki Iyoaabi alba hiitto ikke laeemmo?» yiisi.

²³ Asaheeli kayinni xaano shorra diagurino. Kunnira Abeneeri badhe qole urdetenni godowasi qase ka'aanni fushshi. Asaheelino darganko uwe reyi. Reeshshisi muleenni hige sa"annohu baalu uurre lai.

²⁴ Iyoaabinna Abishayi qolte Abeneeri shorritu. Shorritanni, Giyahira soojjaatoonni Gebaooni Halalla massitanno doogo fulte Aama yinanni Gaara iillituta arrishsho e'u.

²⁵ Biiniyaami ga're ikkino manni gamba yee Abeneeriwa daye, mittu gaari aana olaho qixxaawi.

²⁶ Abeneerino Iyoaabi woshshe, «Hegere geeshsha gaarammannilla hee'neemmo? Gedensaanni gaabbo agurranna lexxineemmori nookkita dihuwatatto? Ninke fiixahowe. Mannikki shorrankera worte agurattohu mamooti geeshshaati?» yii.

²⁷ Iyoaabino, «Heeshshote Magani afanna, ati tenne coyi'ra hoogoottoro manni'ya ga'a soodo geeshsha ki'ne shorra diaguraraati» yee dawarisi.

²⁸ Hakkunni gedensaanni Iyoaabi Israeele shorra aguranno gede ledosi noo mannira malaateho xurumba ufuufi; oluno uurri.

²⁹ Abeneerinna ledosi noori hashsha Yordaanoosi Lagicha tayisse sa'e, Yordaanoosi Waano fultu. Layinki soodono hadhanni hosse Mahinayimi dagge iillitu.

³⁰ Iyoaabino shorra aguri. Isino manna baalanka mittowa gamba assanno woyite, Daawiti manni giddonni Asaheeli agurranna, 19 manni xeino.

³¹ Daawiti manni, Biiniyaami ga're giddonni Abeneeri ledo noore 360 manna shiino.

³² Iyoaabinna ledosi noori Asaheeli reeshsha haadhe massite Beetelihemete ayiddisi waammawa madaartu. Hakkunni gedensaanni, hashsha wo'ma hadhanni galte duu'mo saaqquta marte Kebirooni iillitu.