LAYINKI SAAMUEELI 11 - Qullaawa Maxaafa

DAAWITINNA BERSAABEHI

¹ Diru umira badheessu woggara mootoolla olaho fultanno yannara, Daawiti Iyoaabi, olantote hajajaanonna olanto baala gaadisiisisi. Insano Amoonoota qeelte Raaba Katama doyissite amaddu. Daawiti kayinni Yerusaalamete gati.

² Mitte soodo Daawiti barra goxinowiinni kae, minu aana minnoonni mini aana ka'anna kawa ha'ramanni hee're mitte mancho biso hayishshidhanni noota afi. Tini mancho dana xumate.

³ Daawitino ewelummase afara mitto sokkaancho isewa soyi. Sokkaanchuno, «Manchote su'mi Bersaabehiiti; annise Eeliyaabiiti; ayiddaannise Hitichu Ooriyooti» yee kulisi.

⁴ Daawiti manna soye ise woshshiishi. Iseno dagge isiwa e'eenna ledose goxi. Hatti yanna manchote godowu daye higeenna seerinsa garinni keeraa'mite no. Hakkunni gedensaanni ise minisera hadhu.

⁵ Manchote godowuno gatise. Daawitirano, «Godowu gaatinoe» yite sokka sokku.

⁶ Kunnira Daawiti Iyoaabi, «Hiticha Ooriyo anewa daanno gede assi» yee manna soyi. Iyoaabino Ooriyo Daawitiwa soyi.

⁷ Ooriyono kae Daawitiwa dayi. Daawitino, «Iyoaabinna olanto baala keereho? Oluno hiittooti?» yee xa'misi.

⁸ Qoleno, «Minikkira hadhe fooliishshi'ri» yiisi. Ooriyo Daawiti mininni fule ha'ranni hee'reennanni, Daawiti hakkawoyintenni hurbaatisi aaninni sagale haa're soyisi.

⁹ Ooriyo kayinni minisira ha'rikkinni mootete mini agaraasine ledo waalchu mule goxe gali.

¹⁰ Daawiti Ooriyo minisira ha'rinokkita afe, «Minikkinni dibaxxite keeshshoottohu dayitto? Minikkira ha'ra mayira giwitto?» yee xa'misi.

¹¹ Ooriyo daware, «Taabootu, Israeelenna Yihudu manni dukkanaho no. Mootichi'ya Iyoaabinna ledosi manni mullu xawira no. Ani itammoranna agammora qoleno galte'ya ledo galammora mini'yara ha'ro? Halaalikki afanna konne coye diasseemmo» yiisi.

¹² Daawitino qole, «Maahoyyena, ga'a ha'rattona techo konne hosi» yiisi. Ooriyono hakko barranna layinki barra Yerusaalamete keeshshi.

¹³ Layinki barra, Daawiti Ooriyora hurbaate itise, dimba geeshsha aganno gede assisi. Hakko hashshano Ooriyo minisira ha'rikkinni mootete mini agaraasine ledo kadhe gali.

¹⁴ Soodita, Daawiti borrote sokka qixxeesse Ooriyo haa're Iyoaabira massanno gede assi.

¹⁵ Borrote sokkano, «Ooriyo olu kaajjino widoonni alba qolte sayisse, qasame reyanno gede assi; ki'neno mulisinni ho'le» yitannote.

¹⁶ Iyoaabi katama doyisse hee're, diinunniti kaajjado olanto noo widoonni qole Ooriyo albaanni sayisi.

¹⁷ Katamu mannino fule Iyoaabi ledo olami. Daawiti bagadaano giddonni gamu reyitu; Ooriyono insa ledo reyi.

¹⁸ Hakkunni gedensaanni, Iyoaabi manna soye olunniwa ikkinore Daawitira kulisi.

¹⁹ Sokkaanchohono, «Olu ikkito mootete kulittohu gedensaanni,

²⁰ miteekke moote hanqe, ‹Olantini yannara katamunniwa gamba mayira yitini? Huxxu aanaanni qolle maxxa ollanni'neta diaffinoonni?

²¹ Gedewooni beetti Abemeleeki ikke reyino gara diqaagginanni? Iso Tebesi yinanniwa mitte mancho huxxu aanaanni qolte daammi-beetto tugge shitino. Tenne affinanni heedhine huxxunniwa gamba mayira yitini?› yiiro, ati qolte, ‹Olantokki giddonni reyinohu mittichu Ooriyooti› yite kulisi» yii.

²² Sokkaanchuno kae ha're, Iyoaabi hajajinosire baala,

²³ «Diininke wolqise qasankera katamunni fule xawu geeshsha dayino. Ninke kayinni katamu waalchi geeshsha shorrinoommo.

²⁴ Maxxa oltannori huxxu aanaanni qolte tugge, olantokki giddonni gama manna shitino. Soqqamaanchikki Hitichu Ooriyono reyino» yee Daawitira kulisi.

²⁵ Daawitino sokkaanchoho, « ‹Wonanni bagadu aye shaannoro dianfoonnina, hifattooti. Hatteentenni jawaatte olante katama amadi› yiinohe yite Iyoaabira kulisi; atino ledde jawaachishisi» yii.

²⁶ Ooriyo galte ayiddaannise reyinota macciishshite wi'litu.

²⁷ Wi'la gooffeenna xidda qasidhuhu gedensaanni, Daawiti soye minisira dagganno gede assise. Iseno dagge galte ikkite labbaa beetto iltusi. Ikkollana, Daawiti assino coyi Kaaliiqi albaanni diseyino.