LAYINKI PHEEXIROOSI 3 - Qullaawa Maxaafa

MOOTICHUNNITA LAYINKIMEESHSHI DAA

¹ Jaalla'ya! Tini borreesseemmo'neti layinkimeeshshu sokkaati; lamenta sokka borreessoommo'nehu konne coye qaagiissatenni suwashsho hedo heedhanno'ne gede baqqi assammo'nera yeeti.

² Kunni albaanni qullaawa himanaano coyidhino qaalenna soqqamaasine'ne widoonni afidhinoonniha Mootichinkenna Gatisaanchinke hajajo qaagginara hasi'reemmo.

³ Balaxxine konne coye wodanche: goofimarchu yannara hasidhu gede faasiiqqannorinna halchonsa hoode hadhanno haariimaasine dagganno.

⁴ Insa, « ‹Daanno yini hexxo hiikkituyya?› Akaakkanke reyitu warinni kayise baalunku coyi kalaqamunni xaa geeshsha noo garinnilla no» yitanno.

⁵ Kuni manni lowo yannara albaanni gordu Maganu qaalinni kalaqaminotanna baattono wayinni xaadde wayi mereero noota affanni heedhenni, afinokkihu gede ikkitanno.

⁶ Hatte yannara noo baatto wayinni egemmante ba'ino.

⁷ Magano magansidhannokkiri, xa noo gordinna baatto sa'anno barri yoonnihu geeshsha giirate qixxaabbe agartanno.

⁸ Jaalla'ya! Ki'ne kayinni, Mootichunniwa mittu barri kumu diri gede, kumu diri mittu barri gede ikkinota konne mitto coye habbinoonte.

⁹ Mitu mitu heddanno garinni ikkikkinni, Mootichu uyino hexxo wonshate dikeeshshanno. Ikkollana, baalunku aagintaawe higaranna ayino ba"ara hasi'rinokki daafira ki'nera yee cincanno.

¹⁰ Mootichu barri kayinni mooraanchu gede hedeweelcho daanno. Hakko barra gorduwa lowo luulinni ba'anno; kalaqamu baalu giirame ba"anno. Baattonna baattote aana loonsoonniri baalu giiramanno.

¹¹ Kuni baalu hatto ikke ba"annoha ikkiro, ki'ne qullaawa heeshshonninna Magano lawatenni hee'ra mayira gibbinanniyya?

¹² Kunnira, Maganu barri daannota quqquxamatenni agadhitinannirenna rahe daanno gede loossinannire ikke; hakko barra gordu giirame ba"anno. Kalaqamuno giirate iibbillinni shiilanno.

¹³ Ninke kayinni uyinonke hexxo garinni keeraanchimma heedhannoha haaro gordonna haaro baatto agadhineemmo.

¹⁴ Kunnira, jaalla'ya! Kuni baalu ikkanno barra galaalchitinanni heedhiniro, Mootichu saalunna minshanniri nookkire ikkitine keere heedhineenna afi'ranno'ne gede feeffattine heedhe.

¹⁵ Mootichinke cinca gato'nera ikkitinota affe. Baxaminohu rodiinke Phaawuloosino uyinoonnisi egenno garinni borreessino'nehuno konneeti.

¹⁶ Isi tenne hajare sokkasi baalantera kunni garinni borreessino. Sokkasi giddo mitu mitu buuxate qarrisanno coyi no; egenno xe'inonsarinna yawaawulootu wole qullaawa maxaaffa shokkishshannonte gede, konne coyeno shokkishshanno. Hatto assansanni uminsa ba'anno.

¹⁷ Jaalla'ya! Ki'ne kayinni konne coye balaxxine affinoonni daafira, haxawarrootu so'ronni goshooshantine murte'newiinni ba'inannikki gede qorophe!

¹⁸ Roorenka, Mootichinkenna Gatisaanchinke Yesuusi Kiristoosi eltonninna egennonni lophe; isira xaano hegere geeshsha ayirrinyu ikkosi! Hamii'ni.