LAYINKI MOOTOOLLA 9 - Qullaawa Maxaafa

IYU BUURAME ISRAEELETE MOOTE IKKI

¹ Himanaanchu Elsai himanaanote gaamo giddonni mitto woshshe, «Ka'e tenne zayitete maaqqe haadhe Geleaadira Raamooti Katama ha'ri.

² Hakkiira iillatto woyite, Nimishi beetti Iyosaafiixi ilinoha Iyu hasi. Iso jaallasiwiinni badde mittu minira eessi.

³ Hakkunni gedensaanni tenne ejersu zayite umisi aana dunte, ‹Kaaliiqi: Israeelete moohatto gede buuroommohe› yiino yite kulte, rakke waalcho fa'nite fulte xooqi» yiisi.

⁴ Wedellichu himanaanchino kae Raamooti Katama ha'ri.

⁵ Hakkiichira iille olantote hajajaano gamba yite nootenni xaade, «Mooticha'ya, atera sokka abboommohe» yii. Iyuno, «Ninke giddonni ayeraati?» yee xa'misi. Isino, «Mooticha'ya, ateraati» yee dawari.

⁶ Iyuno kae minira e"eenna wedellichu himanaanchi ejersu zayite Iyu umira dune, «Israeelete Magani Kaaliiqi, ‹Manni'yara Israeelete moote ikkatto gede buuroommohe.

⁷ Atino mootichikki Akiaabi maate shiteenna, ani qole himanaano'yanna wole soqqamaano'ya shitinota Elzaabeeli rabbisi'reemmo.

⁸ Akiaabi maatenna sirchisi baalu goofa hasiissanno; isi godowa ikkinohanna borojje labbaaha baala gudeemmo.

⁹ Akiaabi maate, Israeelete mootoollata Iyorbiaamitanna Baasha maate assummo gede asseemmo.

¹⁰ Elzaabeeli, moogo nafa diafidhanno; reeshshase Iyiziraeeli Katami mule woshshu itanno› yiino» yee waalcho fa'ne fule xooqi.

¹¹ Iyu fule olantote hajajaano jaallasiwa marita, «Maaho keereho? Kuni macharaaraami atewa mayira dayino?» yee xa'misi. Iyu, «Manchono coyi'ranno coyeno ki'ne affinoonni» yee dawari.

¹² Insano, «Dogganni noottonkena, halaale coyi'ri» yitusi. Iyuno, «Kaaliiqi, ‹Israeelete moote ikkatto gede buuroommohe› yiino yee kulinoe» yiinsa.

¹³ Hakkawoyintenni ledosiri olu hajajaano aanaanni uddidhino imaana fushshite kaxxe fulanno dirimi aana kartu. Isono hakko uurranno gede assite xurumba ufuuffanni, «Iyu moohino» yite lallabbu.

IYU IYORAAMI SHII

^14-15 Hakkunni gedensaanni Nimishi beetti Iyosaafiixi ilinohu Iyu Iyoraamira gano gani. Hatte yannara Iyoraami olantosi baala anga adhe Sooriyu moote Azaheeli ledo Raamooti olamanni madi're Iyiziraeeli Katamira goxe no. Iyuno olu hajajaano jaallasira, «Ki'ne addanka ane ledo heedhinoonniha ikkiro, duduwo kulate mittuno Ramootinni fule Iyiziraeeli Katama ha'rannokki gede asse!» yii.

¹⁶ Hakkunni gedensaanni Iyu faradi gaaresira ofolle Iyiziraeeli ha'ri. Hatte yannara Iyoraamira mada dihurtinosi. Yihudu moote Akaaziyaasino iso xa'mara hakkiira mare no.

¹⁷ Iyiziraeeli Katami shae aana noo agaraanchi Iyunna ledosi manni daanna afe, «Kuneeti mannu daanni no!» yee lallawe coyi'ri. Iyoraamino, «Mitto mancho farashshunni sokke, ‹Keerunkunni dagginoonni?› yee xa'manno gede assi» yee hajaji.

¹⁸ Sonkoonni manchino gulufe mare Iyu, «Moote, ‹Keerunkunni dagginoonni?› yiino» yee xa'mi. Iyuno, «Keeru daafira ate mayi dhiwihe? Hattenne agurte badheenni higge hoode'ya amo!» yiisi. Agaraanchuno, «Sonkoonnihu mare iillino. Kayinnilla galagale dihigino» yee kuli.

¹⁹ Wole manchono sonkeenna mare Iyu, albihu yiinota yee xa'misi. Iyuno, «Keeru daafira ate mayi dhiwihe? Badheenni sa'e hoode'ya amo!» yiisi.

²⁰ Xaano agaraanchu, «Layinkihuno mare iillino. Kayinnilla galagale dihigino. Olantote albaanni noohu, faradi gaare macharaaraamu gede asse gananni noona, Nimishi beetto Iyu ikkikkinni digatanno» yee kuli.

²¹ Iyoraamino, «Rakkine faradi gaare'ya koorre"e» yee hajaji. Faradi gaare koorreennasi isinna moote Akaaziyaasi umi uminsa faradi gaarera ofolte Iyunni xaaddara fultu. Marte Naabute baatto mule xaaddu.

²² Iyoraamino Iyu afanni hee'renni, «Iyu, keerunkunni dayitto?» yee xa'misi. Iyuno, «Amakki Elzaabeeli abbitinoti kaphu magannanna kiilaano wo'mite noowa mayi keeri no!» yee dawarisi.

²³ Iyoraamino xooqara faradi gaaresi badhera qolanni hee're, «Akaaziyaasi, tini ganotewe!» yii.

²⁴ Iyu noosi wolqa baalatenni digaana bedeede facci asse agurino worbichi mare Iyoraamira lamente qeho mereero qase e"e, wodanaho mare gawa'li. Iyoraamino ree faradi gaarete aana diriiri.

²⁵ Iyuno faradi gaaresi ganannoha Bidiqaari, «Reeshsha haadhe massite Naabute gate tugi. Atinna ani annasi Akiaabi dukkinse ha'nanna Kaaliiqi Akiaabira coyi'rino coye qaagi.

²⁶ Hakku coyino, ‹Be'ro Naabutetanna oososi reyo afoommo; ateno tenne baatto aana qorichisheemmohe› yaannoho. Kunnira, Kaaliiqi coyi'rino coyi wo'manno gede Iyoraami reeshsha haadhe Naabute gate tugi» yee hajaji.

IYU AKAAZIYAASI SHII

²⁷ Yihudu moote Akaaziyaasino konne coye lae, faradi gaaresira ofolle Beetihagaani Katama hige xooqi. Iyuno shorranni, «Isono shiiyye!» yee hajaji. Insano Yubileaami Katami mule Guuri Baga aana faradi gaaretenni buuwanni hee'reenna qasse madiissitusi. Isi kayinni ikkinta ikke xooqe Megido Katama iille hakkiicho reyi.

²⁸ Ledosi gashshaano reeshshasi faradi gaarete worte haadhe massite Yerusaalamete Daawiti Katamira mootoollate waammara madaartusi.

²⁹ Akaaziyaasi Yihudaho moohinohu, Israeelete moote Akiaabi beetti Iyoraami moohihunni tonaa mitikki dirooti.

IYU ELZAABEELI SHII

³⁰ Hakkiinnino Iyu mare Iyiziraeeli iilli. Elzaabeelino konne coye macciishshite illete kuula buudhite, umo amaxxite mootete mini aana minnoonni minira heedhe masikootete giddoonni eela qolte doogo la'anni no.

³¹ Iyu huxxu waalcho sae eanni hee'reenna, «Koo Zimiiri! ate mootichakki shoottoha kawiira mayi abbihe?» yite cancitu.

³² Iyuno iima hige lae qoonqosi naggi asse, «Ane garo ikkannohu ayeti?» yii. Lame, sase ikkitannori mootete mini roorrooti masikootenniwa shiqqi yite iso la'u.

³³ Iyuno, «Elzaabeeli woro qoltine tugge!» yii. Insano uulla qolte tuggeenna, mundeese kaatte huxxunna faradu aana ubbu. Isino faradonna faradi gaare reeshshise aanaanni gani.

³⁴ Iyuno mootete minira e"e ite agihu gedensaanni, «Ikki garano ikkiro mootete beettootina, hattenne rumantino mancho massitine madaarre» yii.

³⁵ Madaarara marino manni kayinni umu qooncho, lekkatenna angate miqicho agurranna wole mittoreno diafino.

³⁶ Galagalte higge konne coye Iyura kultu. Isino, «Kuni baalu ikkinohu Kaaliiqi balaxe soqqamaanchisi Eeliyaasi widoonni qole, ‹Elzaabeeli maala Iyiziraeeli baattora woshshu itanno.

³⁷ Gatinohu manninatise fudu gede hakkiicho billaallanno. Kunnira ewelummase bade afannohu dihee'ranno› yiino garinniiti» yii.